Search
Wednesday 20 June 2018
  • :
  • :
Latest News

కోటాను కోర్టులు అడ్డుకోలేవు

supreme

చట్టానికి భాష్యం చెప్పే అధికారం మాత్రమే కోర్టుకు వుంది, రిజర్వేషన్‌లు ఎంతవుండాలి అని నిర్ణయించే అధికారం కోర్టుకు లేదు. ఒకవేళ రిజర్వేషన్‌లు ఇంతే వుండాలి అని పార్లమెంట్ చట్టం చేస్తే అది చెల్లుతుంది, కోర్టులు తమకు లేని అధికారాన్ని కట్టబెట్టుకొని రిజర్వేషన్‌లను నియంత్రిస్తున్నాయి.
మన దేశంలో రిజర్వేషన్లు స్వాతంత్య్రానికి పూర్వం నుండే వున్నాయి. కొన్ని సంస్థానాలలో వెనుకబడిన వారికి రిజర్వేషన్‌లు వున్నాయి. మనం ఒక రాజ్యాంగాన్ని రాసుకున్నాం, అందులోని ప్రవేశికలో సామాజిక, ఆర్థిక, రాజకీయ న్యాయాన్ని అందరికీ అందిస్తామని హామీ ఇచ్చాం. అందులో భాగంగానే రిజర్వేషన్‌లు కల్పిస్తే, 1951లో చంపకం దొరై రాజన్ అనే మహిళ ఆర్టికల్ 15(1) 29(2) ప్రకారం కుల ప్రాతిపదికన రిజర్వేషన్‌లు ఇవ్వటం రాజ్యాంగ వ్యతిరేకం అని కోర్టుకు వెళ్ళింది, కోర్టుకూడా రిజర్వేషన్‌లు ఇవ్వడం తప్పు అని చెప్పింది. దీనితో ప్రభుత్వం ఆర్టికల్ 15కు క్లాజ్ 4ను చేర్చడం జరిగింది. ఈ క్లాజ్‌లో
“ప్రభుత్వం సామాజికంగా, విద్యాపరంగా వెనుకబడిన వర్గాల కోసం ప్రత్యేక సదుపాయాలు కల్పించవచ్చు” అని రాజ్యాంగబద్దం చేసింది.
మండల్ కమీషన్ అమలు కోసం దేశవ్యాప్తంగా జరిగిన ఉద్యమంతో, రిజర్వేషన్‌ల విషయంలో కోర్టులు అంతకు ముందున్న వైఖరికంటే ఇప్పుడు చాలావరకు మార్చు
కొన్నాయి. కానీ, రిజర్వేషన్‌లు 50శాతం దాటరాదు అనే విషయంలో ఇప్పటికీ అదే మాటను చెపుతున్నాయి. శిరోధార్యమైనట్లు దీన్నే అన్ని రాజకీయ పార్టీలు పాటిస్తున్నాయి. 1963లో బాలాజీ వర్సెస్ స్టేట్ ఆఫ్ మైసూర్ కేసులో రిజర్వేషనులు 50శాతానికి మించకుండా వుంటే బాగుటుందని సుప్రీంకోర్టు చెప్పింది. అప్పటినుండీ కోర్టులు, రాజకీయ పార్టీలు రిజర్వేషన్‌లు 50శాతం మించకూడదని, ఈ విషయంలో సుప్రీంకోర్టు తీర్పుకు తిరుగులేదన్నట్లు మాట్లాడుతున్నాయి. కానీ, స్టేట్ ఆఫ్ కేరళ వర్సెస్ ఎన్.ఎవ్‌ు.థామస్ కేసులో జస్టిస్ రే, బేగ్, ముర్తుజా ఫజల్ అలీ, కృష్ణయ్యర్‌లు “ఒక రాష్ట్రంలో వెనుకబడ్డ తరగతుల జానాభా 80 శాతం వుంటే వాళ్ళకు విద్య, ఉద్యోగాలలో 80శాతం రిజర్వేషన్లు కల్పించాలని ఆ రాష్ట్ర ప్రభుత్వం నిర్ణయించుకుంటే అది తప్పవుతుందా”అని అన్నారు. అంతేకాదు, వసంత కుమార్ వర్సెస్ స్టేట్ ఆఫ్ కర్నాటక కేసులో జస్టిస్ చిన్నపరెడ్డి రిజర్వేషన్లకు గరిష్ఠ పరిమితి నిర్ణయించే అధికారం సుప్రీంకోర్టుకు ఎవరిచ్చారని ప్రశ్నించారు.
రాజ్యాంగంలో ఎక్కడా రాసిలేని విషయాన్ని, కోర్టు తమకు లేని అధికారాన్ని కల్పించుకొని రిజర్వేషన్లు 50 శాతం దాటరాదని చెప్పుతున్నారు. ఉదాహరణకు ఇదే కరెక్టు అనుకుందాం, పంచాయితీరాజ్ వ్యవస్థలో రిజర్వేషన్లు 70శాతం పైనే వుంది. అవి రాజ్యాంగ వ్యతిరేకం ఎందుకు కాదు.
కోర్టుకు ఇప్పటికీ అర్థం కాని విషయం ఏమిటంటే రిజర్వేషనులు కులం ప్రకారం వుండాలా లేక సామాజిక, ఆర్థిక వెనుకబాటుతనం ప్రామాణికంగా వుండాలా అనేది. ఎందుకంటే రాజ్యాంగంలో వెనుకబడిన వర్గాలు అనింది, కులాలు అనలేదు కాబట్టి కులాన్ని పరిగణనలోకి తీసుకోరాదు అంటున్నాయి కోర్టులు. కానీ, ఈ దేశంలో సామాజికంగా, విద్యాపరంగా, ఆర్థికంగా వెనుకబాటుతనానికి కారణం కులమే! ఈ వాస్తవం కోర్టుకు కనపడటం లేదు, కులం అనేది కళ్ళు మూసుకుంటే పోయేది కాదు అనేది కోర్టుకు ఎప్పటికి అర్థమౌతుందో. అంతేకాదు, మొట్టమొట్టది రాజ్యాంగ సవరణ సమయంలో డా.బిఆర్.అంబేద్కర్
‘వర్గాలు అంటే మరేమీ కాదు కొన్ని కులాలు, కొన్ని మతాలు మాత్రమే’ అన్ని అన్నారు.
రెండవది కుల జనగణన లేదు అని, ఇది నిజమే 1931 తర్వాత దేశవ్యాప్తంగా కుల జనగణన జరగలేదు. కుల జనగణన చేయాలని ఏ రాజకీయ పార్టీ కోరదు. కానీ, ఈ దేశం లో జనాభాలో బిసిలు యాభైశాతం వున్నారనేది నిజం. యాభైశాతం వున్న బిసిలకు 27శాతం రిజర్వేషన్లు అనేది ఎట్లా న్యాయం అవుతుంది. ఇప్పుడు దేశవ్యాప్తంగా కొన్ని కులాలు తమను బిసిలలో చేర్చాలని పోరాడుతున్నారు, ఈ సమస్యలకు పరిష్కారం దేశవ్యాప్తంగా బిసిలకు యాభై శాతం రిజర్వేషన్లను విద్య, ఉద్యోగాలలో కల్పించడం ఒక్కటే పరిష్కారం కాగలదు.
తెలంగాణ ప్రభుత్వం రిజర్వేషన్లను జనాభా దామాషా ప్రకారం ముస్లింలకు, ఎస్‌టిలకు, బిసిలకు పెంచుతామని అంటుంది. దీనిని రాజ్యాంగంలోని 9వ షెడ్యూల్‌లో చేర్పించుతామంటుంది. ఇది అంత సులభం కాదు, బిజెపి పార్టీ మతపరమైన రిజర్వేషన్‌లకు వ్యతిరేకం. తెలంగాణ ఒక ప్రాంతీయ అస్తిత్వ ఉద్యమాన్ని నడిపి విజయం సాధించింది. ఇప్పుడు రిజర్వేషన్‌ల సాధన కొరకు మరో అస్తిత్వ ఉద్యమాన్ని నడపాలి, అస్తిత్వ ఉద్యమంలో రిజర్వేషన్‌లు కూడా భాగమే.
చివరగా, కోర్టులకు శాసనాలు చేసే అధికారం లేదు, శాసనాలకు వాఖ్యానించటం మాత్రమే కోర్టు బాధ్యత అని, ఈ దేశంలో వెనుకబాటుతనానికి కులమే ప్రామాణికం అని ముందు కోర్టులు అంగీకరించే విధంగా పోరాడాలి. దీనికోసం కోర్టుల ప్రజాస్వామ్య వ్యతిరేక ధోరణికి వ్యతిరేకంగా అన్ని ప్రజా సంఘాలూ, పార్టీలు పోరాడాలి. అప్పుడే ముస్లింలకైనా, ఎస్‌టిలకైనా, బిసిలకైనా, ఎస్‌సిలకైనా పెరిగిన జనాభా ప్రకారం రిజర్వేషన్ పెరుగుతుంది.

Comments

comments