Search
Sunday 21 January 2018
  • :
  • :
Latest News

‘దూరవిద్య’దూరం కానుందా?

edit2

‘గడప ముందుకు డిగ్రీ విద్య’ అనే నినాదంతో దేశంలోనే మొట్టమొదట నెలకొన్న అంబేద్కర్ ఓపెన్ యూనివర్శిటీ అధికారుల నిర్ణయాల వల్ల ‘దూరవిద్య’ దూరం అయ్యే ప్రమాదం పొంచి ఉన్నది. తెలంగాణ, ఆంధ్రప్రదేశ్ రాష్ట్రాల్లో రెగ్యులర్ డిగ్రీ కాలేజీల్లో రెండేళ్ల క్రితం ప్రవేశపెట్టిన సెమిస్టర్ విధానం ఇంకా కష్టాలు కన్నీళ్ళతోనే నడుస్తున్నది. రెగ్యులర్ డిగ్రీ కాలేజీలలో మంచి ఫలితాలు ఇవ్వక డిగ్రీ చదువు మా కొద్దు అని (సిబిసిఎస్) విద్యార్థులు ఓ పక్క లబోదిబో మంటుండగా, ‘సందెట్లో సడెమియా’ వలే డా॥ బి.ఆర్.అంబేద్కర్ సార్వత్రిక విశ్వవిద్యాలయం 201718 విద్యాసంవత్సరం నుండి చాయిస్ బేస్‌డ్ క్రెడిట్ ఎడ్యుకేషన్(సిబిసిఎస్) విధానానికి శ్రీకారం చుట్టటంతో విద్యార్థులు బెంబేలు ఎత్తిపోతున్నారు.
1982లో హైదరాబాద్ గడ్డమీద దేశంలోనే మొదటి దూరవిద్య విశ్వవిద్యాలయంగా అంబేద్కర్ యూనివర్శిటీ ప్రారంభం అయింది. లక్షలాదిమంది కాలేజీకి, విశ్వవిద్యాలయానికి వెళ్లలేని వారికి ఉన్నత విద్య అవకాశాలు అందించి దేశంలోనే మంచి యూనివర్శిటీగా పేరు పొందింది.
ప్రింట్ మెటీరియల్ ఇస్తూ, చక్కని కౌన్సెలింగ్ కాంట్రాక్టు తరగతులను అందించటమే కాక రేడియో, టెలివిజన్, ఆడియో, విడియో క్యాసెట్లు ద్వారా విద్యా గంథాన్ని దూరతీరాలకు చేరవేస్తున్నది. ఆదివారాల్లో కౌన్సెలింగ్ క్లాసులు నిర్వహించి రెగ్యులర్ డిగ్రీ, పీజీ చదువుకు సరిసమానమైన సర్టిఫికెట్లను , విజ్ఞానాన్ని అందిస్తున్నది. ‘తెలంగాణ, ఆంధ్రప్రదేశ్ రాష్ట్రాల్లో 215 అధ్యయన కేంద్రాలు 23 ప్రాంతీయ అధ్యయన కేంద్రాల ద్వారా సుశిక్షితులైన కౌన్సిలర్లతో క్లాసులు నిర్వహిస్తుంది.
జాతీయ స్థాయిలో మారుతున్న సమాజ అవసరాలకు అనుగుణంగా సిబిసిఎస్‌ను ప్రవేశపెట్టారు. ఉద్యోగ నైపుణ్యాలను కల్పించటానికి దేశవ్యాప్తంగా అమలు చేస్తున్న సంస్కరణలు, విద్యారంగంలోని మార్పులు దూరవిద్యకి అవసరమా అని విద్యావేత్తలు ప్రశ్నిస్తున్నారు.
సిబిసిఎస్ లేనప్పుడు సంవత్సరానికి 25 కాంట్రా క్టు క్లాసుల ద్వారా విద్యార్థికి తగిన విద్యా పరిజ్ఞానా న్ని కౌన్సెలర్లు అందించేవారు. ఇంటరాక్షన్ విధానం ద్వారా ప్రతి కౌన్సెలర్ 25 కాంట్రాక్టు క్లాసులలోనే సిలబస్ పూర్తి చేసేవారు. ఉద్యోగ బాధ్యతలు ఉన్నవారు, పదోన్నతుల కోసమే డిగ్రీ, పిజి కోర్సులు ‘ఓపెన్’ విశ్వవిద్యాలయంలో చదివేవారు. క్లాసులకు 40% మంది మాత్రమే హాజరై 100మార్కుల పేపర్‌ను రాసి పాస్ అయ్యేవారు. కొన్నిసార్లు కాంటాక్టు క్లాసు కి హాజరుకాని దూరవిద్య అభ్యర్థులు వార్షిక పరీక్ష లు రాసి వందమార్కుల పేపర్‌కు 60 మార్కులు తెచ్చుకొని లబ్దిపొందేవారు. ‘ఓపెన్’ విద్యలో హాజరుకు ప్రాధాన్యం లేనందువల్ల ‘సెల్ఫ్‌స్టడీ’ ద్వారా కూడా మంచి ఫలితాలు పొందేవారు.
ఇప్పుడున్న సబ్జెక్టులు విద్యార్థులకు ఉద్యోగాలు కల్పించటం లేదని ఉద్యోగం వచ్చే చదువు చదవాలని, చాయిస్ బేస్‌డ్ క్రెడిట్ సిస్టమ్‌ను ప్రవేశపెట్టారు. రెగ్యులర్ డిగ్రీ, పీజీ కాలేజీకైతే ఏమో కాని దూరవిద్యకు సిబిసిఎస్ విధానం అవసరమా అని విద్యావేత్తలు, మేథావులు ప్రశ్నిస్తున్నారు.సిబిసిఎస్ సెమిస్టర్ విధానాన్ని అమలు చేస్తున్నా రు. గతంలో 3ఏళ్లలో మూడు పరీక్షలు రాస్తే అభ్యర్థికి డిగ్రీ పట్టభద్రుడు(గ్రాడ్యుయేట్) అయ్యేవాడు. ఇపుడు మూడు ఏళ్ల చదువును 6 సెమిస్టర్ల ద్వారా పాసు కావాలి. ప్రతి 6నెలలకు ఒక సెమిస్టర్ ఉంటుంది. వ్యాపారం, వ్యవసాయం, ఉద్యోగం చేసేవారు దూర విద్య పరీక్షల కోసం ఏటా ఐదు లేక 8 రోజులు ‘సెలవు’ పెట్టి వార్షిక పరీక్షలు రాసి పట్టాలు సులభంగా పొందేవారు. దేశంలో అన్ని యూనివర్శిటీలకన్నా అంబేద్కర్ ఓపెన్ విశ్వవిద్యాలయానికి విద్యార్థులు క్యూ కట్టేవారు. సిబిసిఎస్ విధానం అమలు చేస్తున్న విశ్వవిద్యాలయం 6నెలల ముందే పాఠ్యపుస్తక రచయితలను ఎంపిక చేసి కొత్తకోర్సు పాఠ్యపుస్తకాలను ముద్రించవలసి ఉంది. డిగ్రీ మొదటి సెమిస్టర్ కాంట్రాక్టు క్లాసులు ముగిసినప్పటికీ, ఇప్పటికీ మారిన మొదటి సెమిస్టర్ పాఠ్యపుస్తకాలు అన్నీ మార్కెట్‌కు విడుదల కాలేదు. కనీసం ఎపుడు ముద్రిస్తారో తెలియదు. మొదటి సెమిస్టర్ పరీక్షలు డిసెంబర్ నెలలో పూర్తి కావాల్సి ఉన్నా ఇంకా పరీక్షల ప్రస్తావన లేదు. మొదటి సెమిస్టర్ పరీక్షలు జరుపకుండా జనవరి ఆరు నుండి సెకండ్ సెమిస్టర్ క్లాసులు నిర్వహించమని ఆదేశించినట్లు సమాచారం. మొదటి సంవత్సరం గతంలో 24క్లాసులు ఉండగా, మొదటి, రెండవ సెమిస్టర్‌లో కలిపితే 10 క్లాసులు కావటం లేదని విద్యార్థులు ఆవేదన వ్యక్తం చేస్తున్నారు. క్లాసుల సంఖ్యను 24 నుండి 10కి తగ్గించటం పట్ల విద్యార్థులు ఆందోళన వ్యక్తం చేస్తున్నారు.
డిగ్రీ పూర్తి కావాలంటే విద్యార్థి 160 క్రెడిట్ల కోర్సులను చదవాల్సి ఉంటుంది. మొదటి నాలుగు సెమిస్టర్‌లలో ప్రతి సెమిస్టర్‌కు 25క్రెడిట్ల చొప్పున చదువాల్సి ఉంటుంది. ఐదు, ఆరు సెమిస్టర్‌లలో 30క్రెడిట్ల చొప్పున చదువవల్సి ఉంటుంది. అసలే దూరవిద్య ‘ఆదివారం చదువు’. దీనికి సెమిస్టర్ అవసరమా? అని డిగ్రీ చదివే విద్యార్థులు గందరగోళానికి గురి అవుతున్నారు. తికమక పడుతున్నారు. మొదటి, నాల్గవ సెమిస్టర్‌లలో ప్రతి ఐచ్ఛిక సబ్జెక్టుకు 5 క్రెడిట్లు, ఇతర భాష, స్కిల్ కోర్సులకు మూడు, మరియు రెండు క్రెడిట్లు ఉంటాయి. విద్యార్థి మొదటి సెమిస్టర్ నుండి నాల్గవ సెమిస్టర్ దాక ప్రతి సెమిస్టర్‌లో 3 ఐచ్ఛిక సబ్జెక్టులు, 4 ఇతర చిన్న సబ్జెక్టులు చదువాల్సి ఉండటంతో దూర విద్య విద్యార్థులు గందరగోళానికి గురి అవుతున్నారు. ఐదు, ఆరవ సెమిస్టర్లలో పూర్తిగా 6ఐచ్ఛిక సబ్జెక్టులనే చదవాలని విశ్వవిద్యాలయం నిర్ణయించటం జరిగింది. గతంలో డిగ్రీ చదివే విద్యార్థి మొదటి సంవత్సరం తెలుగు, ఆంగ్లము, సాంఘిక శాస్త్రాలలో తప్పక పరీక్ష రాసే అవకాశం ఉండేది. కాని ఇపుడు మొదటి సంవత్సరమే విద్యార్థి ఐచ్ఛికాలు (ఆప్షనల్స్) ఎంపిక చేసుకోమని అంటున్నారు. ఇందులో మూడు రకాలైన కోర్సులు ఉంటాయి. అవి కోర్ సబ్జెక్టులు. ఎలక్టివ్ సబ్జెక్టులు, ఎబిలిటి ఎన్‌హాన్స్‌మెంట్ కంపల్సరీ కోర్సులు. ప్రతి విద్యార్థి డిగ్రీ పూర్తి చేయడానికి 40 రకాల కోర్సులను ఎంచుకోవాలని సూచించటంతో అసలుకే మోసం వచ్చింది. చాలా పాఠ్యపుస్తకాలు ముద్రణ కాలేదు. మొదటి సెమిస్టర్ క్లాసులు పూర్తి అయిన ఎగ్జామ్ తేది ఇంకా రాలేదు.
పద్ధతి ప్రకారం ఉన్న కోర్సులను సిబిసిఎస్ కింద సెమిస్టర్లుగా మార్చటం వల్ల క్లాసులోనే 40 రకాల విద్యార్థులు ఉంటున్నారు. 20మంది కన్నా ఎక్కువ విద్యార్థులు ఉంటేనే, కౌన్సెలర్‌ను క్లాసులు చెప్పటానికి అనుమతిస్తారు. ఎక్కువ సబ్జెక్టులను ఎంపిక చేసుకొనే అవకాశం ఇవ్వటంతో ఏ సబ్జెక్టుకి 10 మంది విద్యార్థులు లేరు. దీనితో రెండు రాష్ట్రాల్లో ఉన్న కౌన్సిలర్లు బజారున పడ్డారు. కోర్సుల్లో విద్యార్థులు అడ్మిట్ అయితేనే క్లాసులు ఇస్తామని విశ్వవిద్యాలయం చెబుతోంది. తెలంగాణ, ఆంధ్రప్రదేశ్ రాష్ట్రాల్లో రెగ్యులర్ డిగ్రీ కాలేజీలలోనే సెమిస్టర్ విధానం ఫలవంతం కాలేదు. రెగ్యులర్ డిగ్రీ అధ్యాపకులకే రెండు ఏళ్లు గడిచినా సిబిసిఎస్ విధానం అంటే తెలియటం లేదు. వారానికొక క్లాసు జరిగే, ఓపెన్ చదువుకి ఇది అవసరమా అని విద్యార్థులు,విద్యావేత్తలు ప్రశ్నిస్తున్నారు. తెలుగు రాష్ట్రాల్లో ఎన్నో విశ్వవిద్యాలయాలు దూరవిద్య విధానంలో ఎన్నో రకాలైన కోర్సులను నిర్వహిస్తున్నప్పటికీ అవి ఇంకా సిబిసిఎస్ పద్ధతి ప్రవేశపెట్టలేదు. పూర్తిగా సన్నద్ధం కాకముందే హడావిడిగా, సెమిస్టర్ విధానాన్ని ప్రవేశపెట్టి ఓపెన్ విశ్వవిద్యాలయం తన విద్యార్థుల సంఖ్యను తగ్గించుకున్నది. ఉద్యోగ, ఉపాధి రంగాల్లో పనిచేస్తూ చదివేవారు ప్రతి సెమిస్టర్‌కు సెలవులు పెట్టి పరీక్షలు రాయడం కష్టమని చెబుతున్నారు. తెలుగు రాష్ట్రాల్లో ఈ విధానాన్ని ఉపసంహరించుకోవాలని విద్యార్థులు, విద్యావేత్తలు కోరుతున్నారు.

Comments

comments