Search
Monday 24 September 2018
  • :
  • :

మన విశ్వవిద్యాలయాలు

university

ఉన్నత విద్యలో మనం అనుకున్నంత గా రాణించలేక పోతున్నాము. దేశంలో దాదాపు 800పైగా విశ్వవిద్యాలయాలున్నాయి. వాటిలో జాతీయ విశ్వవిద్యాలయాలు 47, రాష్ట్ర విశ్వవిద్యాలయాలు 382, ప్రయివేట్ విశ్వవిద్యాలయాలు 297, డీమ్డ్ విశ్వవిద్యాలయాలు 123, కళాశాలలు 42,500. ఈ మధ్యనే అసోచాం, ఎస్ ఇన్సిట్యూట్‌లు కలిసి విడుదల చేసిన 200 మంచి విశ్వవిద్యాలయాల జాబితాలో మన దేశం నుండి రెండు మాత్రమే ఉన్నాయి. అవి కూడా మన దేశ రాజధానిలో ఉన్న ఐఐటి, ఢిల్లీ విశ్వ విద్యాలయం మాత్రమే.
రాష్టంలో 19 విశ్వవిద్యాలయాలు , 3 జాతీయు విశ్వ విద్యాలయాలు, రెండు ప్రయివేటు విశ్వవిద్యాలయాలున్నాయి. ప్రైవేటు రంగంలో (ఇక్ఫాయ్ & ఐ ఐ ఐ టి) ఉన్నాయి. వాటిలో ఉస్మానియా విశ్వవిద్యాలయం (1918), కాకతీయ (1976), పాలమూరు (2008), తెలంగాణ (2006), శాతవాహన (2008), మహాత్మాగాంధీ (2008), ఆచార్య జయశంకర్ వ్యవసాయ (1963/2014), పి.వి. నర్సింహ రావు వెటర్న (2005/2014), కొండా లక్ష్మణ్ బాపూజీ ఉద్యాన వన (హార్టికల్చర్) (2007/2014), డా. కాళోజీ ఆరోగ్య విశ్వవిద్యాలయం(2014), ఇ ఫ్ ల్ యు (ఇంగ్లిష్ & ఫారన్ లాంగ్వేజెస్ విశ్వ విద్యాలయం), న్యాయ విశ్వ విద్యాలయం (నల్సార్) (1998), డా. బి. అర్ అంబేద్కర్ ఓపెన్ యూనివర్సిటీ (1982) జవహర్ లాల్ నెహ్రూ టెక్నలాజికల్ విశ్వవిద్యాలయం (2008), జవహర్ లాల్ నెహ్రూ ఆర్ట్ విశ్వవిద్యాలయం (2008), తెలుగు విశ్వవిద్యాలయం (1985), రాజీవ్ గాంధి టెక్నాలజీ విశ్వవిద్యాలయం, నిజాం ఇన్సిట్యూట్ ఆఫ్ మెడికల్ సైన్స్ , మౌలానా ఆజాద్ ఉర్దూ విశ్వవిద్యాలయం(1998) , హైదరాబాదు సెంట్రల్ యూనివర్సిటీ(1974).
జాతీయ స్థాయిలో వివిధ విశ్వవిద్యాలయాలల్లో ప్రొఫెసర్లు 1,10,879 మంది, అసోసియేట్ ప్రొఫెసర్లు 1,59, 912, అసిస్టెంట్ ప్రొఫెసర్లు 9,49, 925 ఉన్నారు. మన రాష్ట్రంలో 11 విశ్వ విద్యాలయాలలో పనిచేస్తున్న బోధన సిబ్బంది 1195 మంది మరి ఖాళీల సంఖ్య పని చేస్తున్న వారి కంటె ఎక్కువ (1551). వీటిలో ప్రభుత్వం 1061 మంది బోధన సిబ్బందికి మాత్రమే అనుమతులు ఇచ్చినది.
ఎక్కువ మంది బోధన సిబ్బంది కాంట్రాక్ట్ పద్ధతిన, పొరుగు సేవల ద్వారా విధులు నిర్వర్తిస్తున్నారు. ఉస్మానియా విశ్వవిద్యాలయంలో 1264 పోస్టులు మంజూరు కాగా 595 మాత్రమే పనిచేస్తున్నారు. 669 పోస్టులు ఖాళీలు ఉండగా ప్రభుత్వం తాజాగా 415పోస్టులకు మాత్రమే అనుమతి నిచ్చింది. కాకతీయకు 391పోస్టులు మంజూరు కాగా ప్రస్తుతం పనిచేస్తున్నది 182 సిబ్బంది మాత్రమే. కాని 209 పోస్టులు ఖాళీగా ఉన్నాయి. కాగా ప్రభుత్వం తాజాగా 136 పోస్టులు మాత్రమే అనుమతి నిచ్చింది. జెఎన్‌టియుకి 409 పోస్టులు మంజూరు కాగా 210 సిబ్బంది మాత్రమే పనిచేస్తున్నారు, 199 పోస్టులు ఖాళీలు ఉన్నాయి. కాగాప్రభుత్వం తాజాగా 186 పోస్టులకు మాత్రమే అనుమతి నిచ్చింది. అదే విధంగా మహాత్మాగాంధీ 34, పాలమూరు 63, శాతవాహన 40, తెలంగాణ 59, ఆర్జే కేయు టి 96, అంబేద్కర్ 10, తెలుగు 7, జేఎన్‌ఏఎఫ్‌ఏయు 15, మొత్తం తెలంగాణ వ్యాప్తంగా 1061 బోధన సిబ్బందికి మాత్రమే ప్రభుత్వం అనుమతి నిచ్చింది.
విశ్వ విద్యాలయాలల్లో పరిశోధన, విశేషాధ్యయనం ప్రధాన అంశాలుగా ఉంటాయి. విశ్వ విద్యాలయ ప్రాంగణాలు విజ్ఞాన పరిరక్షణకు వ్యాప్తికి తోడ్పడే విధంగా ఉండాలి. పరిశోధనకు ఉపపరిశోధనకు ఉపయుక్తంగా ఉండాలి. సమాచార సాంకేతిక విజ్ఞానాన్ని ఉపయోగించి విద్యార్థులకు , ఆచార్యులకు కోరిన సమాచారం వెంటనే అందించాలి.
తెలంగాణ లోఉన్న విశ్వవిద్యాలయాలలో బోధనా సిబ్బంది లేక వివిధ విభాగాల్లో ఒక్కొక్కరూ రెండు మూడు విభాగాలకు ఇంచార్జ్జ్‌గా పని చేస్తున్నారు. అదేవిధంగా టీచింగ్‌తోబాటు పరిపాలన సేవలు అందిస్తూ ఉండడం వలన అధ్యాపకుడు ఇటు బోధన గాని పరిపాలనకు సంబంధించిన పనులు గాని సరిగా చేయకపోవడం సమయం వృథా కావడం జరుగుతున్నది. ఇటీవల ఉన్నత విద్యా కౌన్సిల్ బాధ్యులు మాట్లాడుతూ 2025 నాటికి విశ్వవిద్యాలయాలల్లో ఆచార్యులు ఉండకపోవచ్చు అని చెప్పడాన్ని బట్టి చూస్తే బోధనా సిబ్బంది కొరత ఎంతగా ఉన్నదో తెలియజేస్తున్నది .
గ్రంథాలయాలు పూర్తి కాలపు గ్రంథ పాలకులు (మూడు యూనివర్సిటీలకు తప్పితే) లేకపోవడం శోచనీయం. ఇంచార్జ్‌లతో గ్రంథాలయాలు నడపబడుతున్నాయి. విశ్వవిద్యాలయాల గ్రంథాలయాలలో పనిచేసే సిబ్బంది దాదాపు 60% పై చిలుకు కాంట్రాక్ట్, పొరుగు సేవల ద్వారా విశ్వవిద్యాలయాల గ్రంధాలయాలు నడపబడుతున్నాయి అర్హత గల గ్రంథపాలకులను నియమించి నాణ్యమైన సమాచారాన్ని విద్యార్ధులకు అందించే ప్రయత్నం చేయాలి. తెలంగాణ రాష్ట్రంలో అన్ని విశ్వవిద్యాలయాలలో ఆధునిక డిజిటల్ గ్రంథాలయాలు ఏర్పాటు చేయాలి నూతన ఆవిష్కరణలకు అంటే ప్రయోగాలకు, పరిశోధనకు దారి తీయాలి భారతావనిలో మన విశ్వవిద్యాలయాలు అగ్ర భాగాన వెలుగొందాలంటే అద్భుతమైన విజ్ఞానపు సంపద కలిగిన డిజిటల్, ఎలక్ట్రానిక్ గ్రంథాలయాలు ప్రపంచంలో ఎటువంటి సమాచారాన్ని ఐనా సరే మన ఆధునిక గ్రంథాలయాల ద్వారా మన విద్యార్థి/ పరిశోధకుడు/ ఆచార్యులు పొందేవిధంగా ప్రయత్నం చేయాలి.
విద్యార్థులకు వసతి గృహాలు, మూత్ర శాలలు, మరుగుదొడ్లు అవసరమైనంతగా లేవు. నూతన వసతి గృహాలు, మూత్ర శాలలు, మరుగుదొడ్లను నిర్మించాలి. మారుతున్న కాలానికి అనుగుణంగా అంటే శాస్త్ర సాంకేతిక రంగాలు విద్యార్థులకు అందుబాటులో ఉండే విధంగా ప్రతి వసతి గృహంలో ఉచిత ఇంటర్నెట్ సేవలు, ఉచిత వైఫై సేవలు కల్పించాలి. ప్రతి సంవత్సరం గ్రంథాలయ బడ్జెట్‌లను కేటాయించాలి. చదువరులకు ఏది అవసరమో గుర్తించి వారి కనుగుణంగా వనరులు సమకూర్చాలి. గత నాలుగు సంవత్సరాలుగా విశ్వవిద్యాలయాలకు పాలకమండళ్ళు లేకపోవడంవల్ల కొన్ని ముఖ్యమైన నిర్ణయాలు తీసుకోలేకపోవడం వలన సమయం వృథా అవుతున్నది. పాలన కుంటుపడుతున్నది. ప్రతి విషయానికీ ప్రభుత్వం నుంచి అనుమతులు కోరాల్సిన పరిస్థితి.
ఈ మధ్యనే కేంద్ర మానవ వనరుల శాఖ ఉన్నత విద్యా సంస్థలకు ర్యాంకులు టీచింగ్, లేర్నింగ్, రిసోర్సెస్, రిసెర్చ్ అండ ప్రోఫెషనల్ ప్రాక్టిసేస్, గ్రాడ్యుయేషన్ అవుట్ కమ్, అవుట్ రిచ్ అండ్ ఇంక్లుసివ్, పర్షేపసన్ ఆధారంగ, ఈ సంస్థల్లో పిహెచ్‌డి విద్యార్దులు, అధ్యాపకులు పర్మినెంట్, అధ్యాపక విద్యార్థి నిష్పత్తి, ప్లేస్‌మెంట్ , హయ్యర్ స్టడీస్, బడ్జెట్ దాని వినియోగం, పరీక్షల ఫలితాలు ఆధారంగా కేటాయించింది. మన విశ్వవిద్యాలయాల పరిస్థితి గమనిస్తే మచ్చుకు మన ఉస్మానియా విశ్వ విద్యాలయం చూస్తే గత సంవత్సరం 23 వ స్థానం ఉండగా నేడు అది 28 స్థానం దిగజారడం కారణం పర్మినెంట్ అధ్యాపకులు, బడ్జెట్ లేమి, విశ్వవిద్యాలయాలల్లో మౌళిక వసతుల లేమి మున్నగు అనేక కారణాలు కలవు.
అదేవిధంగా అన్ని విశ్వ విద్యాలయాల పరిధిలో ఉన్న డిగ్రీ కళాశాలల్లో కామన్ సిలబస్, కామన్ టైం ం లేక పరీక్షలు (ఎవరికీ నచ్చిన విధంగా వారు), వాటి ముల్యాంకనం విద్యార్థుల్లో అయోమయ పరిస్థితి నెలకొన్నది. కామన్ హాలిడేస్ ప్రకటించాలి. డిగ్రీ వ్యవస్థను ఉమ్మడి వ్యవస్థ కింద కు తీసుకరావాల్సిన అవసరమున్నది.
నూతనంగా అంటే 2007- 8 సంవత్సరాలలో ఏర్పడిన విశ్వవిద్యాలయాలు ఇప్పటికీ నత్తనడక నడుస్తున్నాయి కారణం అవసరాలకు అనుగుణంగా భవనాలు లేకపొవడం, క్లాస్ రూమ్‌లు పరిశోధనలకు నాణ్యత కలిగిన లాబ్ సౌకర్యాలు లేకపోవడం ఇప్పటికి టీచింగ్ నాన్ టీచింగ్ సిబ్బంది కొరత దురదృష్టకరం, విశ్వవిద్యాలయాలకు రూసా నుండి గాని, యుజిసి నుండి నిధులు రావాలి అన్న పైన వివరించిన మౌలిక అవసరాలు సమకూర్చాలసిన అవసరమున్నది అ సౌకర్యాలు ఉంటేనే న్యాకో మంచి గ్రేడ్ సాధించడానికి అస్కారం ఉన్నది లేనిచో అనుకున్నంత నాణ్యమైన విద్యను అందించలేము, నిధులు రాబట్టలేము.
విశ్వ విద్యాలయాలను అభివృద్ధి చేయక పొతే కెజిటు పిజి ఉచిత నాణ్యమైన విద్యను విద్యార్థులకు ఎలా అందించ గలం. అదే విధంగా నాణ్యమైన పరిశోధనలు, నూతన ఆవిష్కరణలు జరగకుండా అభివృద్ధి చెందడం కలయే మరి అందుకే విశ్వవిద్యాలయాలను అభివృద్ధి బాటలో నడిపించాల్సిన బాధ్యత ప్రభుత్వాలదే. అదే విధంగా బోధనా సిబ్బంది లేకుండా నాణ్యమైన విద్యను అందించడం కలయే సుమా. మన విశ్వ విద్యాలయాల్లో నూతన ఆవిష్కరణలు, పరిశోధనలు, నూతన టీచింగ్ పద్ధతులు ఈ దేశానికి మరి ముఖ్యం గా సమాజానికి అందించాల్సిన బాధ్యత మన పై ఉన్నది. ఈ మధ్యనే ప్రభుత్వం ప్రైవేటు విశ్వవిద్యాలయాల బిల్లును ఉమ్మడి సభలు ఆమోదం పొందింది. కాని విద్యనూ వ్యాపారంగా పరిగణిస్తే మానవ విలువలు నశిస్తాయి. విద్యారంగంలో ఏ చట్టాలు తీసుకోవాలి అన్న మానవీయ వారి సంక్షే మ కోణంలో తీసుకోవాలి ముఖ్యంగా మన తెలంగాణ సమాజానికి ఉచిత నాణ్యత కలిగిన విద్యనూ విద్యార్థికి అందించాలి అంటే ప్రభుత్వ విశ్వవిద్యాలయాలలో మాత్రమే.

Comments

comments