Home హైదరాబాద్ బ్లాక్ అండ్ వైట్

బ్లాక్ అండ్ వైట్

 దళారులకు వరంగా మారిన నోట్ల రద్దు
విచ్చలవిడిగా ఏజెన్సీల దందా
20 నుంచి 30 శాతం కమీషన్
పాత నోట్లు తీసుకుని కొత్త
నోట్లు ఇస్తున్న వైనం
నీరుగారుతున్న కేంద్ర ప్రభుత్వ నిర్ణయం

NOTES

మన తెలంగాణ/సిటీబ్యూరో: నోట్ల కొరత వ్యాపారులు, ఏజెన్సీలకు వరంగా మారింది. కొందరు దళారులు బ్లాక్‌ను వైట్‌గా మారుస్తామంటూ బేరాలు కుదుర్చుకుంటున్నారు. నల్లధనం కుబేరుల ఆట కట్టించడానికి కేంద్ర ప్రభుత్వం పెద్ద నోట్లను రద్దు చేస్తే కొందరి తీరుతో   ప్రభుత్వ ఉద్దేశం నీరుగారిపోతోంది. పెట్రోల్ బంక్‌లు, గ్యాస్ ఏజెన్సీలు, ఆయా ఫైనాన్స్ ఏజెన్సీలు వారి రోజువారి నగదును నల్లకుబేరులకు అప్పనంగా అప్పచెబుతున్నారు. కొత్త రూ.2000 నోట్లు, రూ.100 నోట్లను ఇస్తూ పాత నోట్లను తీసుకుంటున్నారు. ఇందుకు వందకు రూ.20 నుంచి రూ.30 వరకు కమీషన్ల రూపంలో దండుకుంటున్నారు. ఇటే నల్లకుబేరులు, అటు వ్యాపారులు దర్జాగా సంపాదించుకుంటున్నారు. నగరంలో వేలాది పెట్రోల్ బంక్‌లు, గ్యాస్ ఏజెన్సీలు ఉన్నాయి. అలాగే ప్రయివేటు ఫైనాన్స్ వ్యాపార సం స్థలు వేలకుపైగానే ఉంటాయి. వీరికి ప్రతి రోజు ఒక్కో ఏజెన్సీకి రూ.లక్ష నుంచి రూ.10 లక్షల కలెక్షన్ వస్తాయి. ఈ కలెక్షన్‌లను నల్లకుబేరులకు కట్టబెడుతున్నారు. ఆయా ఏజెన్సీలకు ప్రతి ఒక్కరికి కరెంట్ అకౌంట్‌కు ఉన్నాయి. నోట్ల రద్దు వల్ల ఈ ఏజెన్సీలు వారానికి రూ.50 వేలు కొత్త నోట్లను డ్రా చేసుకునే సదుపాయం ఉంది. అలాగే రోజు వారి వచ్చిన వీరి కలెక్షన్ (డబ్బు ఎంతైనా) ఖాతాలో జమా చేసుకునే అవకాశం ఉంది. కస్టమర్ల నుంచి వచ్చే చిన్న నోట్లను జమా చేసి నల్లకుబేరులకు కమీషన్ల రూపంలో ఇస్తూ ఆయా వ్యాపార సంస్థలు చేతి నిండ అక్రమంగా డబ్బు సంపాదిస్తున్నారు. ఇటే వైపు కూడా అధికారులు నిఘా పెంచాలని ప్రజలు కోరుతున్నారు. అడ్డదారిలో అనుకున్నంత డబ్బు దొరుకుతుండడ ంతో నల్లకుబేరులకు పండుగ చేసుకుంటున్నారని ప్రజలు ఆరోపిస్తున్నారు. తామోమో బ్యాంకులో గంటలపాటు లైన్‌లో నిలబడి చివరికి రెండు వేల రూపాయ లే దక్కుతున్నాయి. వీరికి మాత్రం అడ్డదారుల్లో లక్షల రూపాయలు వస్తున్నాయి. ఇదెక్కడి న్యాయమని ప్రజలు వివర్శిస్తున్నారు. రియల్ ఎస్టేట్ వ్యాపారం పూర్తిగా దెబ్బతినడంతో ఈ రంగంలో ఉన్న బ్రోకర్లు అందరూ కూడా బ్లాక్ అండ్ వైట్ మనీపై పడ్డారు. వ్యాపారులతో బేరసారాలు కుదుర్చుకోవడం, దానికి వీరి కమీషన్ జత చేసి నల్లకుబేరులకు వైట్ డబ్బు ముట్టచెప్పడం నగరంలో 15 రోజులుగా సాగుతున్న దందా ఇదీ. చాపకింద నీరులా ఈ వ్యాపారం నగరంలో గల్లీ గల్లీలో జరుగుతుంది.