Search
Sunday 18 November 2018
  • :
  • :
Latest News

సిఎం కెసిఆర్ జన్మదినోత్సవానికి భారీ ఏర్పాట్లు

KCR-Birth-Day

మన తెలంగాణ/ హైదరాబాద్ : టిఆర్‌ఎస్ అధినేత, ముఖ్యమంత్రి కె.చంద్రశేఖర్‌రావు జన్మదినోత్సవాన్ని శనివారం ఘనంగా నిర్వహించేందుకు టిఆర్‌ఎస్ శ్రేణులు పెద్ద ఎత్తున ఏర్పాట్లు చేస్తున్నాయి. ఇప్పటికే పలు జిల్లాల్లో బర్త్‌డే ఉత్సవాలు ప్రారంభించారు. టిఆర్‌ఎస్ పార్టీ కేంద్ర కార్యాలయం తెలంగాణ భవన్‌లో ఉదయం పది గంటలకే టిఆర్‌ఎస్ యువజన విభాగం, టిఆర్‌ఎస్ విద్యార్థి విభాగం ఆధ్వర్యంలో వేడుకలకు సన్నాహాలు చేశారు. ఇందులో భాగంగా రక్త దాన శిబిరాన్ని ఏర్పాటు చేశారు. భారీ కేక్‌ను కూడా సిద్ధం చేశారు. ఈ కార్యక్రమంలో మంత్రులు పట్నం మహేందర్‌రెడ్డి, తలసాని శ్రీనివాస్‌యాదవ్, ఎంపి కల్వకుంట్ల కవిత,టిఆర్‌ఎస్ ప్రధాన కార్యదర్శి జె.సంతోష్‌కుమార్, ఎంఎల్‌సి శంభీపూర్ రాజు హాజరుకానున్నారు. నానక్‌రామ్‌గూడ చిత్రపురిలో ఉదయం 8.45 గంటలకే ఏర్పాటు చేసిన రక్తదాన శిబిరాన్ని మంత్రి హరీశ్‌రావు ప్రారంభిస్తారు. అలాగే కెసిఆర్ సేవా దళం ఆధ్వర్యంలో మధ్యాహ్నం 12.30 గంటలకు తెలంగాణ భవన్‌లో జరిగే రక్తదాన శిబిరానికి ఉప ముఖ్యమంత్రి మహమూద్ అలీ, ఎంఎల్‌సి ప్రొఫెసర్ ఎం.శ్రీనివాస్‌రెడ్డి, రాష్ట్ర ప్రభుత్వ ఢిల్లీ ప్రతినిధి ఎస్.వేణుగోపాలాచారి, డిప్యూటీ మేయర్ ఫసియుద్దీన్ తదితరులు పాల్గొంటారు. మంత్రి తలసాని శ్రీనివాస్ యాదవ్ ఆధ్వర్యంలో జలవిహార్‌లో ప్రత్యేక కార్యక్రమాలకు ఏర్పాట్లు చేశారు. ఉదయం తొమ్మిది గంటలకు సికిందరాబాద్ ఉజ్జయిని మహంకాళి అమ్మవారి ఆలయంలో ఆయుష్షు హోం నిర్వహిస్తున్నారు. ఇందులో ఎంపి కవిత పాల్గొంటారు. ఉస్మానియా యూనివర్సిటీ ఆర్ట్ కాలేజీ వద్ద ఉదయం జరిగే వేడుకల్లో ఎంఎల్‌ఏ కిషోర్, ఎస్‌సి,ఎస్‌టి కమిషన్ చైర్మన్ ఎర్రోళ్ళ శ్రీనివాస్, టిఎస్‌టిఎస్ చైర్మన్ రాకేశ్‌లు పాల్గొంటారు.
విదేశాల్లో వేడుకలు
సిఎం కెసిఆర్ జన్మదినానికి ఒకరోజు ముందే విదేశాల్లో కూడా వేడుకలు ప్రారంభమయ్యాయి. కెసిఆర్ అభిమానులు, టిఆర్‌ఎస్, జాగృతి శాఖల ఆధ్వర్యంలో పలు దేశాల్లో రక్తదాన శిబిరాలు నిర్వహించారు. న్యూజిలాండ్, బహరెయిన్‌లలో శుక్రవారమే రక్తదానం చేశారు.

Comments

comments