Home ఎడిటోరియల్ వణికిస్తున్న భూతాపం

వణికిస్తున్న భూతాపం

Conference of Climate Change of United Nations

 

పారిస్ ఒప్పందం 2015 ప్రకారం భూతాపాన్ని అదుపులో ఉంచడానికి చర్యలు తీసుకోవాలి. పారిశ్రామిక విప్లవ కాలం నాటి భూమి ఉష్ణోగ్రత కన్నా 2 డిగ్రీల సెంటిగ్రేడు లోపలే భూతాపం ఉండేలా చర్యలు తీసుకోవాలి. అంతేకాదు, వీలయితే 1.5 డిగ్రీల సెంటిగ్రేడులోపే భూమి ఉష్ణోగ్రత పెరుగుదల పరిమితమయ్యేలా చేస్తే మరీ మంచిది. కాని ఈ లక్ష్యాలు సాధించగలమా? భూతాపం పెరుగుదల దాదాపు 1.5 డిగ్రీల డిగ్రీల సెంటిగ్రేడు వరకు వచ్చేసింది. 2 డిగ్రీల సెంటిగ్రేడును చేరుకోవడం కూడా ఎంతో కాలం పట్టకపోవచ్చు.

పారిశ్రామిక విప్లవకాలం నాటి భూతాపం కన్నా 1.5 డిగ్రీలకు మించని విధంగా భూమి ఉష్ణోగ్రత పెరుగుదలను కట్టడి చేయాలంటే 2050 కన్నా ముందు కాలుష్యాల విడుదల అస్సలు లేకుండా చేయాలి. లేకపోతే భూతాపాన్ని కట్టడి చేయలేము. కాలుష్యాల విడుదల లేకుండా చేయాలంటే శిలాజ ఇంధనాలను దహనం చేయడం ఆగిపోవాలి. కాని ఇది జరిగేలా కనబడడం లేదు. పారిస్ ఒప్పందం ఈ వాస్తవాన్ని గుర్తించింది. పర్యావరణ పరిరక్షణ గురించి మాట్లాడేవారు ఎవరయినా సరే ఈ వాస్తవాన్ని గుర్తించక తప్పదు. 2050 నాటికి బొగ్గుపులుసు వాయువు విడుదల పూర్తిగా శూన్యస్థాయికి చేరుకోవడం చాలా అవసరమని శాస్త్రవేత్తలు ఏకాభిప్రాయంతో ఉన్నారు. కాని 2050 కన్నా ముందే అంటే 2035 నాటికే ఈ లక్ష్యాన్ని సాధిస్తే తప్ప భూతాపాన్ని 1.5 డిగ్రీల సెంటిగ్రేడ్ పరిధిలో ఉంచడం సాధ్యపడదు.

భూతాపం 1.5 డిగ్రీల సెంటిగ్రేడ్‌కు సంబంధించి అంతర్జాతీయ వాతావరణ మార్పలు వేదిక IPCC నివేదికలో కాలుష్యాల విడుదలను శూన్యస్థాయికి చేర్చడం ఈ కాలవ్యవధిలో సాధ్యం కాదని అభిప్రాయపడింది. అందువల్ల కాలుష్య వ్యతిరేక సాంకేతిక పరిజ్ఞానంపై ఆధారపడాలని భావిస్తున్నారు. ఇందులో కార్బన్ కాప్చర్ అండ్ స్టోరేజ్ ఒకటి. ఈ సాంకేతిక పరిజ్ఞానం ప్రకారం బొగ్గుపులుసు వాయువును గాలి నుంచి పీల్చుకుని భూగర్భంలో నిల్వ ఉంచాలి. ఈ విధంగా వాతావరణంలో బొగ్గుపులుసు వాయువును తొలగించడం గురించి పోలెండ్‌లోని కటోవైజ్‌లో జరిగిన సమావేశంలో చర్చించారు. ప్రపంచవ్యాప్తంగా ఏటా 40 బిలియన్ టన్నుల బొగ్గుపులుసు వాయువు విడుదలవుతోంది. కాబట్టి 2050 నాటికి వాతావరణంలో బొగ్గుపులుసు వాయువు అస్సలు లేకుండా శూన్యస్థాయికి చేర్చాలంటే వాతావరణం నుంచి బొగ్గుపులుసు వాయువును తొలగించడం కూడా ఈ స్థాయిలో జరగాలి. కాని వాతావరణ కాలుష్యాలకు ఇదొక్కటే కారణం కాదు. ఇతర గ్రీన్ హౌస్ వాయువులు కూడా ఉన్నాయి. మిథేన్, నైట్రస్ ఆక్సయిడ్, క్లోరోఫ్లోరో కార్బన్లు కూడా ఉన్నాయి.

మిథేన్ వాయువు బొగ్గుపులుసు వాయువు కన్నా 84 రెట్లు ప్రమాదకరమైనది. పశువులు, చమురు బావులు, బొగ్గు గనుల నుంచి మిథేన్ వాతావరణంలో కలుస్తుంది. ఆర్కిటిక్ ప్రాంతంలో పర్మా ఫ్రాస్ట్ కరుగుతున్నప్పుడు కూడా విడుదల అవుతుంది. అలాగే నైట్రస్ ఆక్సయిడ్ బొగ్గుపులుసు వాయువు కన్నా 300 రెట్లు ప్రమాదకరమైనది. ఆధునిక వ్యవసాయ పద్ధతుల వల్ల నైట్రస్ ఆక్సయిడ్ కూడా ఎక్కువగానే విడుదలవుతోంది. రిఫ్రిజరేషన్ వాయువులు, క్లోరోఫ్లోరో కార్బన్లు బొగ్గుపులుసు వాయువు కన్నా వేలాది రెట్లు ప్రమాదకరమైనవి. ఇవి కూడా పెరుగుతున్నాయి. కాబట్టి కేవలం బొగ్గుపులుసు వాయువు విడుదలను మాత్రమే అడ్డుకోవడం, లేదా తొలగించడం వల్ల లాభం లేదు. ఈ ఇతర గ్రీన్ హౌస్ వాయువులపై కూడా దృష్టిపెట్టడం అవసరం. ఈ ఇతర గ్రీన్ హౌస్ వాయువుల విడుదల ప్రస్తుతం ఉన్న స్థాయిలో అదుపు చేయగలిగితే చాలా వరకు విజయం సాధించినట్లే. కాని అది కూడా సాధ్యమయ్యేలా కనబడడం లేదు.

చాలా నిరుత్సాహకరమైన పరిస్థితి కనబడుతోంది. భూతాపాన్ని అదుపు చేయడానికి మానవాళి తీవ్రంగా శ్రమించక తప్పదు. కాలుష్యాలను కట్టడిచేయడంలో మనం విఫలమవుతున్నాం. అలాగే కాలుష్యాలను వాతావరణం నుంచి తొలగించి, భూగర్భంలో నిల్వ ఉంచేలా చేసే సాంకేతిక పరిజ్ఞానం కూడా ఏదీ చెప్పుకోదగ్గ స్థాయిలో లేదు. భవిష్యత్తులో మిథేన్ విడుదల మరింత పెరిగేలా ఉంది. ఐక్యరాజ్యసమితి పర్యావరణ మార్పుల సమావేశం COP24 అత్యవరసర ప్రణాళికల గురించి ఆలోచించవలసి ఉంది.

అలాంటి ప్రణాళికల్లో జియో ఇంజనీరింగ్ టెక్నాలజీ ఒకటి. దీనిద్వారా భూతాపంలో మార్పులు వచ్చేలా చేయడం జరుగుతుంది. ఇందులో ఒకటి సోలార్ రేడియేషన్ మేనేజిమెంట్ టెక్నాలజీ. ఈ పద్ధతిలో ఏం చేస్తారంటే వాతావరణంలో భూమికి చాలా ఎత్తును ఏరోసాల్ రేణువులను వెదజల్లుతారు. ఈ రేణువులు సూర్యరశ్మి భూమికి చేరకుండా రోదసిలోకి పరావర్తనం అయ్యేలా చేస్తాయి. 1991లో మౌంట్ పినాటుబో అగ్నిపర్వతం పేలినప్పుడు వాతావరణం స్ట్రాటోస్ఫియర్ లో వెదజల్లబడ్డాయి. దీనివల్ల దాదాపు సంవత్సరం పాటు ఒక డిగ్రీ సెంటీగ్రేడ్ వరకు ఉష్ణోగ్రత తగ్గిపోయింది. సోలార్ రేడియేషన్ మేనేజిమెంట్ టెక్నాలజీ అందుబాటులో ఉంది. ప్రయోగాలు జరుగుతున్నాయి.

సోలార్ రేడియేషన్ టెక్నాలజీ వల్ల మనకు కొంత సమయం దొరకుతుంది. ఈ సమయంలోగా గ్రీన్ హౌస్ వాయువులను అదుపు చేయడానికి కావలసిన చర్యలు తీసుకోవచ్చు. భూతాపం 1.5 డిగ్రీల సెంటీగ్రేడు దాటకుండా అవసరమైన చర్యలు తీసుకునే సమయం మనకు లభిస్తుంది. ఐక్యరాజ్యసమితి పర్యావరణ మార్పుల సమావేశం COP24 ఈ విషయాలన్నింటినీ దృష్టిలో ఉంచుకోవాలి. కష్టమైన చర్యలే అయినా భూతాపాన్ని తగ్గించడానికి జియో ఇంజనీరింగ్ చర్యలు తప్పనిసరిగా కనబడుతున్నాయి.

ప్రస్తుతం పరిస్థితి, భూతాపం పెరుగుదల ప్రమాదకరంగా కనిపిస్తున్నాయి. ఆర్కిటిక్ ఉష్ణోగ్రతలు కూడా పెరుగుతున్నాయి. ఆర్కిటిక్ మండలంలో మంచు కరిగిపోతోంది. మిథేన్ వాయువు విడుదల పెరుగుతోంది. ధృవాల్లో మంచు కరగడం వల్ల సముద్ర మట్టం పెరుగుతోంది. తీరప్రాంతాలు ముంపుకు గురవుతున్నాయి. తుఫానులు, వరదలు పెరుగుతున్నాయి. కరువు పరిస్థితులు, అతివృష్ఠి వంటి వాతావరణ విపరీతాలకు ఈ పరిస్థితి దారితీస్తుంది. పంటలు దెబ్బతింటున్నాయి. వ్యవసాయ ఉత్పత్తులపై ప్రభావం పడుతుంది.

ఐక్యరాజ్యసమితి పర్యావరణ మార్పుల సమావేశం COP24 ఈ ప్రమాద సంకేతాలను తక్షణం గుర్తించాలి. ఇక నిరీక్షించి, కాస్త ఆగి, తాపీగా చర్యలు తీసుకునే పరిస్థితి లేదు. పారిస్‌లో తీసుకున్న 1.5 డిగ్రీల సెంటీగ్రేడ్ లక్ష్యాన్ని సాధించాలంటే ఐక్యరాజ్యసమితి గట్టి చర్యలు తీసుకోవాలి. శిలాజ ఇంధనాల విడుదలను తగ్గించాలి. వాతావరణంలో కార్బన్ ను తొలగించడానికి తక్షణం చర్యలు తీసుకోవాలి. కార్బన్ డై ఆక్సయిడ్ కాకుండా ఇతర గ్రీన్ హౌస్ వాయువులను తగ్గించడానికి ప్రణాళికలు చేపట్టాలి. మిథేన్, నైట్రస్ ఆక్సయిడ్, క్లోరోఫ్లోరో కార్బన్లను తగ్గించాలి. జియో ఇంజనీరింగ్, సోలార్ రేడియేషన్ మేనేజిమెంట్ వంటి పద్ధతులను పరిశోధించి కొత్త మార్గాలు కనిపెట్టాలి. ఈ చర్యలన్నీ తీసుకుంటేనే భవిష్యత్తులో ప్రమాదాన్ని తప్పించగలం.

Conference of Climate Change of United Nations

Telangana Latest News