Search
Wednesday 19 September 2018
  • :
  • :
Latest News

ఎలెక్ట్రిక్ బస్సులు

హైదరాబాద్ రోడ్ల మీద త్వరలో ప్రత్యక్షం, మిగతా రాష్ట్రానికీ విస్తరణ
కాలుష్య నియంత్రణకు ప్రవేశపెట్టనున్న ఆర్‌టిసి

Electric-busహైదరాబాద్: త్వరలో ఆర్‌టిసి ఎలెక్ట్రిక్ బ్యాటరీ బస్సులు పరుగులు పెట్టనున్నాయి. ప్రభుత్వ ప్రయత్నాలు త్వరగా సఫలం అయితే వచ్చే ఏడాది జూన్ నాటికి ఎలెక్ట్రిక్ బస్సులు హైదరాబాద్ రహదారులపై దర్శనం ఇవ్వ నున్నాయి. ఆ తర్వాత రాష్ట్రంలోని మిగతా నగరాల్లో కూడా ఈ బస్సులు పరుగులు పెట్టే అవకాశాలు ఉన్నాయి. ‘ఫేమ్ ఇండియా’ (ఫాస్టర్ అడాప్షన్ అండ్ మాన్యుఫాక్చర్ ఆఫ్ హైబ్రీడ్ ఎలక్ట్రిక్ వెహి కిల్స్) పథకాన్ని ఉపయోగించుకుని తెలంగాణ రాష్ట్ర రోడ్డు రవాణ సంస్థ (టిఎస్‌ఆర్‌టిసి) బ్యాటరీ బస్సులను ప్రవేశపెట్టాలని భావి స్తోంది. ఇందుకు సంబంధించిన కసరత్తు మొదలుపెట్టింది. ఈ కొత్త ఎలెక్ట్రిక్ బ్యాటరీ బస్సులను ఇటీవల ఢిల్లీలో పరిశీలించిన ప్రభుత్వ అధికారుల బృందం, ఆ తరహా బస్సులను రాష్ట్రంలో కూడా ప్రవేశ పెట్టాలని యోచిస్తోంది. తొలుత ప్రయోగాత్మకంగా హైదరాబాద్ రహ దారులపై ఈ బస్సులను పరుగులు పెట్టించాలని, ఆ తర్వాత వరంగల్, హన్మకొండ, కరీంనగర్, నిజామాబాద్‌లాంటి పట్టణాల్లో ప్రవేశపెట్టాలని ప్రభుత్వం ఒక నిర్ణయానికి వచ్చినట్లు తెలుస్తోంది.
ఎలెక్ట్రిక్ బస్సుల వాడకం వాడకం వల్ల కాలుష్య నియంత్రణతో పాటు ఇంధన ఖర్చును కూడా ఆదా చేసుకునే అవకాశాలు ఉన్నాయి. ప్రస్తు తం ఆర్‌టిసి బస్సుకు ఒక కిలోమీటర్‌కు సగటున రూ.38 ఖర్చు అవు తుండగా ఆదాయం మాత్రం రూ. 33 వస్తున్నది. దీంతో సంస్థకు ప్రతి కిలోమీటర్‌కు రూ. 5 వరకు నష్టం జరుగుతుందని అధికారులు చెబుతున్నారు. ప్రతిరోజు ఆర్‌టిసి బస్సులు దాదాపు 30 లక్షల కిలో మీటర్ల వరకు ప్రయాణిస్తూ అందుకు అవసరమైన 7 లక్షల లీటర్ల డీజిల్ కోసం సంస్థ సుమారు రూ. 2.40 కోట్లు ఖర్చు చేస్తున్నది. అదే ఎలెక్ట్రిక్ బస్సులకు రీచార్జ్ చేసేందుకు కిలో మీటర్‌కు రూ. 1 మాత్రమే ఖర్చు అవుతుందని అధికారులు అంచనా వేశారు. ఎలక్ట్రిక్ బస్సుల పనితీరు, నిర్వహణ అధ్యయనం చేసేందుకు ప్రభుత్వ ప్రధాన కార్య దర్శి డాక్టర్ రాజీవ్‌శర్మ నేతృత్వంలోని   ఆర్‌టిసి, రవాణ శాఖ అధికారుల ప్రతినిధి బృందం ఇటీవల ఢిల్లీలో పర్యటించింది. అక్కడ జరిగిన ఎలెక్ట్రిక్ బ్యాటరీ బస్సులు, మోటారు వాహనాల ప్రదర్శనను సందర్శించింది. ఈ సందర్భంగా పలు అంశాలను అధ్యయనం చేసిన అధికారుల బృందం త్వరలోనే ఒక నివేదికను ప్రభుత్వానికి సమర్పించనుందని సమాచారం.
‘ఫేమ్’ను ఉపయోగించుకోనున్న ఆర్‌టిసి
పర్యావరణ హితంగా ఉండే ఎలక్ట్రిక్ మోటారు వాహనాలను ప్రోత్సహించేందుకు గత ఐదు నెలల కింద కేంద్ర భారీ పరిశ్రమల శాఖ ప్రవేశపెట్టిన “ఫేమ్‌” పథకాన్ని ఉపయోగించుకోవాలని ఆర్‌టిసి ప్రణాళికలు రూపొందిస్తున్నది. 2015-16, 2016-17 రెండు ఆర్థిక సంవత్సరాలలో ఫేమ్ పథకం అమలు కోసం భారీ పరిశ్రమల శాఖ రూ.795 కోట్లను కేటాయించింది. వాటిలో సుమారు రూ.500 కోట్లను ఎలెక్ట్రిక్ మోటారు వాహనాలు తయారు చేసే సంస్థలు, కొనుగోలు చేసే వారికి ప్రోత్సాహాకాలుగా ఇచ్చేందుకు కేటాయించింది. ఒక్కోక్క ఎలెక్ట్రిక్ బస్సుకు రూ.34 లక్షల నుంచి రూ.66 లక్షల వరకు ప్రోత్సాహకాన్ని అందించనుంది. ఆ ప్రోత్సాహాలను ఉపయోగించుకోవాలని ఆర్‌టిసి ప్రయత్నాలను మొదలు పెట్టింది. అయితే ఈ ఎలెక్ట్రిక్ బస్సు ధర రూ.1.70 కోట్లు కాగా దానిని కొనుగోలు చేసేందుకు ఆర్‌టిసి సుమారు రూ.1.20 కోట్లు భరించాల్సి ఉంటుందని, మిగిలిన రూ.50 లక్షలు ఫేమ్ ఇండియా పథకం కింద కేంద్రం ప్రొత్సాహక నిధులు లభిస్తాయని ఆర్‌టిసి వర్గాలు పేర్కొంటున్నాయి. ఫేమ్ పథకం కింద కేంద్ర భారీ పరిశ్రమల శాఖ ప్రయోగాత్మకంగా ప్రతి మెట్రో నగరానికి రెండు మూడు ఎలెక్ట్రిక్ బస్సులను కొనుగోలు చేసేందుకు సంబంధిత ఆర్‌టిసిలకు ప్రోత్సాహకాలను అందజేస్తుంది. వాటి పనితీరు, నిర్వహణను పరిశీలించిన అనంతరం ప్రోత్సాహకాలను పూర్తిస్థాయిలో అమలు చేసేందుకు రాష్ట్రాల ఆర్‌టిసిలతో చర్చించి విధివిధానాలను రూపొందించాలని కేంద్ర ప్రభుత్వం భావిస్తోంది.

Comments

comments