Search
Monday 19 November 2018
  • :
  • :
Latest News

ఉపాయంతో బతకాలి!

Horse

అనగనగా ఒక రాజుగారు తన రాజ్య పర్యటన చేస్తూ ఒక గుర్రాలు అమ్మే అంగడిలోకి వెళ్ళారు. బజారులోని గుర్రాల వ్యాపారస్తులందరూ రాజుగారికి గుర్రాలు అమ్మాలని ప్రయత్నాలు మొదలెట్టారు. ఒకరిని మించి ఒకరు వారి వారి గుర్రాలను పొగుడుతూ వాటి ప్రాముఖ్యతను చెప్పటం మొదలెట్టారు.

నా గుర్రం మీరు చెప్పినట్టు చేస్తుంది అని ఒకరంటే, నా గుర్రం చాలా వేగంగా పరిగెడుతుంది అని ఒకరు, అసలు నా గుర్రానికి భయమే తెలీదు అని మరింకొకరు గొప్పలు చెపుతూ రాజుగారిని ఒప్పించటానికి ప్రయత్నం చేస్తున్నారు. ఇలా ఒక వ్యాపారస్తుడు మరీ అత్యాశకు పోయి, నా గుర్రం ఎగరగలదు అన్నాడు. వెంటనే రాజు గారు ఎంతో ఆసక్తిగా తగిన పరిహారం ఇచ్చి ఆ గుర్రాన్ని కొని, తనతో రాజు మహలుకి తీసుకుని వెళ్ళారు.
మర్నాడు సేనాధిపతిని పిలిచి, ఈ గుర్రం ఎగురుతుంది అని చెప్పారు. సేనాధిపతి ఆశ్చర్యపోయి, గుర్రాన్ని ఎగిరించే ప్రయత్నం చేసారు. కాని గుర్రం ఎలా ఎగురుతుంది? ఎగర లేదు.

రాజు గారు, అదేంటి, నిన్న మరి నాతో వ్యాపారస్తుడు అలా చెప్పాడు, అతన్ని పిలవండి అని ఆదేశించారు.వ్యాపారస్తుడిని రాజుగారి ముందర నిలబెట్టారు. రాజుగారు, నిన్న నీ గుర్రం ఎగురుతుంది అన్నావు కదా, ఏది ఒక సారి ఎగిరించి చూపించు అన్నారు.

మహారాజా! గుర్రం ఎగురుతుంది, అంటే నా ఉద్దేశ్యం నిజంగా ఎగురుతుందని కాదు, అంత వేగంగా పరిగెడుతుంది అని వ్యాపారస్తుడు చెప్పాడు.రాజుగారికి చాలా కోపం వచ్చింది. ఇతని తల నరికేయండి! అని ఆదేశించారు. ఆ తర్వాత ముఖ్యమంత్రిని పిలిచారు. ముఖ్యమంత్రి! నాకు ఈ గుర్రం ఎగిరితే చూడాలని ఉంది! ఈ పని మీరే చేసి చూపాలి ! అన్నారు. ముఖ్యమంత్రి ఆశ్చర్యంగా, భయంగా, మహారాజా… గుర్రం ఎలా ఎగురుతుంది, ఆ వ్యాపారస్తుడు అబద్ధం చెప్పానని ఒప్పుకున్నాడు కదా! అన్నారు. మహారాజు వెంటనే, ఇతని తల నరికేయండి! అని ఆదేశించారు.

ఇలా ఒక్కొక్కరినీ పిలవడం, వాళ్ళను గుర్రం ఎగిరించి చూపించమనడం; వారు అదెలా సాధ్యం అని అడిగితే వారి తల తీసేయడం, కొన్ని రోజులు ఇలా గడిచాయి. కానీ రాజుగారి మొండిపట్టు వదలలేదు. అలా చాలా మందిని ప్రయత్నించారు. మొత్తానికి ఒక రోజు ఒక సభికుడిని పిలిచి, రాజు గారు గుర్రాన్ని ఎగిరించమని ఆజ్ఞాపించారు.

సభికుడు తల వంచి, అలాగే మహారాజా! నాకు ఒక సంవత్సరం గడువు ఇవ్వండి, నేను ప్రయత్నం చేస్తాను! అని ఒప్పుకున్నాడు. రాజుగారు సంతోషించి, ఒక సంవత్సరం గడువు ఇవ్వడానికి వెంటనే ఒప్పుకున్నారు.సభికులు, రాజ్యంలో వున్న వారందరూ ఆశ్చర్యపోయారు. ఎలా ఒప్పుకున్నావు? అసలు గుర్రం ఎలా ఎగురుతుంది? నీ దగ్గిర ఏమైనా ఉపాయముందా? అని రక రకాల ప్రశ్నలు అడిగారు. సభికుడు చిరునవ్వుతో తప్పించుకుని ఇంటికి చేరుకున్నాడు. ఊరంతా నిప్పులా పాకిపోయిన ఈ వార్త ఇంట్లో వున్న అతని భార్యకి కూడా తెలిసింది. ఆందోళనగా అతను ఇంటికి వచ్చే దాకా గుమ్మం మీద కాపు కాసింది. ఇంటికి భర్త రాగానే విన్నది నిజమేనా అని అడిగింది.
నిజమే కానీ కంగారు పడవద్దు అని భార్యను ఇలా ఓదార్చాడు. – మూర్ఖుల మనసులో ఒకటి పడితే అది సాధించాలన్న పట్టుదల బలంగా మొదలవుతుంది. వారితో వాదించడం కష్టం. మహారాజు గారి మనసులో ఈ విషయం అలాగే బలంగా పడిపోయింది. వారిని కాదన్న వారి తలలు నరికించేశారు. నన్ను అడిగిన వెంటనే నేను కూడా కుదరదు అంటే నా తల కూడా వెంటనే తెగేది.అందుకే నేను ఒక ఉపాయం ఆలోచించాను.

ఒక సంవత్సరం గడువు అడిగితే వెంటనే ముందరున్న ప్రమాదం తప్పింది కదా! ఈ ఏడాదిలో ఏమైనా మార్పు రావచ్చు. రాజు గారు ఈ విషయం మరిచిపోవచ్చు! లేదా పట్టుదల తగ్గవచ్చు! అలా ఉపాయంతో రాజుగారిని గెలిచి ప్రమాదం నుండి గట్టెక్కానని అన్నాడు.

Comments

comments