Search
Tuesday 20 November 2018
  • :
  • :
Latest News

భార్యను చంపి ఆపై భర్త ఆత్మహత్య

husband-killed-his-wife

మహబూబ్‌నగర్‌ః మూడు ముళ్ళు.. ఏడు అడుగుల బంధంతో ఒక్కటై నూరేళ్ళు కాపురం చేయాల్సిన దాంపత్య జీవితంలో కలహాలు మొదలై చివరకు ఆ పచ్చని సంసారం విషాదాంతమైంది. కట్టుకున్న భార్యను కడతేర్చి చివరకు భర్త కూడా ఉరివేసుకొని ఆత్మహత్య చేసుకున్న సంఘటనలో వారి ఇద్దరు చిన్నారులు తల్లిదండ్రులు లేని అనాధలయ్యారు. ఈ సంఘటన శుక్రవారం షాద్‌నగర్ పట్టణంలోని రాంనగర్ కాలనీలో చోటు చేసుకుంది. స్థానికుల కథనం ప్రకారం వివరాలు ఇలా ఉన్నాయి.. రాంనగర్ కాలనీకి చెందిన శ్రీనివాస్(35) తన భార్య లావణ్య(30)ను తన చీరకొంగుతో మెడకు ఉచ్చు బిగించి తన ఇంట్లో భార్యను చంపాడు. అనంతరం శ్రీనివాస్ కూడా ఇంట్లో ఉరివేసుకొని ఆత్మహత్యకు పాల్పడ్డాడు. ఇంట్లో ఎవరు లేని సమయంలో తమ ఇద్దరు పిల్లలు నాగరాజు, లక్ష్మిప్రియలు పాఠశాలకు వెళ్ళిపోయాక భార్యభర్తల మద్య కలహం మొదలయ్యింది. గత కొంతకాలంగా ఎలాంటి పనులు చేయకుండా ఇంటివద్దే ఉంటున్న శ్రీనివాస్‌కు భార్య లావణ్యకు మధ్య తరచు సంసార గొడవలు నడిచేవని స్థానికులు వివరిస్తున్నారు. ఇటీవలే శ్రీనివాస్ తండ్రికి ఉన్న మిలటరీ 5 ఎకరాల భూమిని ఇతరులకు విక్రయించినట్లు తెలిసింది. అదే విధంగా 5 లక్షల రూపాయలు అడ్వాన్స్‌గా తీసుకున్న శ్రీనివాస్ తన భార్యతో నిత్యం కలహాలకు దిగే వాడని చెపుతున్నారు. శుక్రవారం ఉదయం పూట పిల్లలు స్కూల్ వెళ్ళాక కూడా భార్య భర్తలు గొడువ పడినట్లు ఇరుగు పొరుగు వారు చెపుతున్నారు. సంఘటన స్థలాన్ని షాద్‌నగర్ పట్టణ ఇన్‌స్పెక్టర్ శంకరయ్య సందర్శించారు. ఇరుగు పొరుగు వారిని విచారించారు. మృతుల బందువులతో మృతుల వివరాలను సేకరించారు.
చంపుతానంటూ బావమరిదికి ఫోన్..
నీ చెల్లెల్ని చంపి నేను కూడా చచ్చిపోతానంటూ మృతుడు శ్రీనివాస్ తన సొంత బావమరిది అయిన రతన్ ప్రసాద్‌కు శుక్రవారం ఉదయం ఫోన్ చేశాడు. తరచూ తనతో గొడువ పడుతుందని ఇక భరించలేనంటూ తన భార్యను చంపి నేను కూడా చనిపోతానంటూ ఫోన్‌లో హెచ్చరించినట్లు బంధువులు తెలిపారు. సికింద్రాబాద్‌లోని బోయిన్‌పల్లిలో ఉంటున్న రతన్ ప్రసాద్ ఈవిషయాన్ని మీడియాకు తెలియజేశారు. తల్లిదండ్రుల శవాలను చూసి చిన్నారులు తల్లడిల్లిపోయారు. స్థానిక షాద్‌నగర్ పబ్లిక్‌స్కూల్‌లో చదువుకుంటున్న నాగరాజు, లక్ష్మిప్రియలు జరిగింది తెలుసుకొని బోరున విలపించారు. చిన్నారుల కంటతడిని చూసి స్థానికులు కూడా ఏడ్చారు.

Comments

comments