Home స్కోర్ హాకీ కప్…దివాళీ గిఫ్ట్

హాకీ కప్…దివాళీ గిఫ్ట్

పాకిస్థాన్‌పై భారత్ జయభేరి  

ఉత్కంఠ పోరులో గెలుపు మనదే  

3-2 గోల్స్ తేడాతో ప్రత్యర్థి చిత్తు

hockeyక్వాంటాన్ (మలేషియా) : క్రికెట్‌లో ధోనీసేన దివాళీ ధమాకా అందించినట్లే హాకీలోనూ టీమ్ ఇండియా భారత క్రీడాభిమానులకు దివాళీ గిఫ్ట్ ఇచ్చింది. ఏషియన్ ఛాంపియన్స్ ట్రోఫీ హాకీ టైటిల్‌ను భారత్ కైవసం చేసుకుంది. అదికూడా చిరకాల ప్రత్యర్థి పాకిస్థాన్‌పై అద్భుత విజయంతో సిద్ధించింది. దీపావళి రాత్రి హోరాహోరీగా సాగిన ఏషియన్ ఛాంపియన్స్ హాకీ ట్రోఫీ ఫైనల్స్‌లో భారత్ 3-2 గోల్స్ తేడాతో పాకిస్థాన్‌పై విజయం సాధించి టైటిల్‌ను గెల్చుకుంది. ఆద్యంతం ఆసక్తిదాయకంగా సాగిన ఈ మ్యాచ్‌లో చివరకు పాక్ మట్టికరిచింది. భారత్ తరపున రూపీందర్ పాల్‌సింగ్, యూసఫ్ అఫాన్, నికిన్ తిమ్మయ్యలు గోల్స్ చేయగా, పాకిస్థాన్ తరపున మహ్మద్ అలీమ్ బిలాల్, ఆలీ షాన్‌లు గోల్స్ చేశారు. నాలుగేళ్ళుగా సాగుతున్న ఏషియన్ హాకీ టోర్నమెంట్లలో ఈసారి ఇండియా ఆది నుంచీ ఆధిపత్యం చూపుతూ వచ్చింది. ఊహించినట్లుగానే ఫైనల్స్ పాక్‌తో పడింది. అయితే టైటిల్ ఫేవరేట్స్‌గా భారత్ బరిలోకి దిగడం విశేషం. 2014లో దక్షిణ కొరియాలోని లించి యాన్‌లో జరిగిన ఆసియా క్రీడల్లో పాకిస్థాన్ ను భారత్ ఓడించిన తర్వాత ఈ రెండు జట్లు ఆసియా రీజియన్‌లో టైటిల్ పోరు కోసం తలపడటం ఇదే ప్రథమం. 2011లో జరిగిన ఏషియన్ ఛాంపియన్స్ ట్రోఫీ తొలి టోర్నీలో పాకిస్థాన్‌ను ఓడించడం ద్వారా భారత్ టైటిల్ సాధించింది. ఆ తదుపరి సంవత్సరం ఫలితం రివర్స యింది. భారత్‌ను ఓడించిన పాక్ టైటిల్ గెలిచింది. ఇక 2013లో భారత్ ఫైనల్స్‌కు చేరకుండానే నిష్క్రమించింది. ఫైనల్స్‌లో జపాన్‌ను ఓడించిన పాక్ తన టైటిల్‌ను నిలబెట్టుకుంది. ఇక ఆ తర్వాత ఏషియన్ ఛాంపియన్స్ ట్రోఫీకి బ్రేక్ పడింది. తిరిగి ఈ ఏడాదే నాల్గవ టోర్నీ జరిగింది. వరల్డ్ నెంబర్ 6 ర్యాంకుతో బరిలోకి దిగిన భారత్ చాలామంది సీజనల్ ప్లేయర్స్ లేకుండానే ఆడింది. కీలక ఆటగాళ్ళకు గాయాల కారణంగా సెలవిచ్చింది. పి.ఆర్. శ్రీజేష్, ఆకాష్ చిక్తే వంటి స్టార్ ఆటగాళ్ళు గాయాలతో విశ్రాంతిలో వున్నారు. మ్యాచ్ ఏడవ నిమిషంలోనే భారత్‌కు తొలి పెనాల్టీ కార్నర్ లభించింది. అయితే దాన్ని గోల్‌గా మలచడంలో భారత్ ఫెయిలైంది. 12వ నిమిషంలో పాకిస్థాన్ ఆధిక్యత సాధించే అవకాశం పొందింది. కానీ భారత కీపర్ చిక్తే తెలివిగా దాన్ని అడ్డుకున్నాడు. 18వ నిమిషంలో రూపీందర్‌పాల్ సింగ్ సాధించిన గోల్‌తో భారత్‌కు 1-0 ఆధిక్యత లభించింది. మరో ఐదు నిమిషాల తర్వాత యూసఫ్ అఫాన్ 23వ నిమిషంలో చేసిన అద్భుతమైన గోల్‌తో భారత్ 2-0 ఆధిక్యత సాధించింది. భారత్ గెలుపు ఖాయమని అనుకుంటున్న తరుణంలో పాక్ విజృంభించింది. 26వ నిమిషంలో బిలాల్, 38వ నిమిషంలో ఆలీ షాన్ చేసిన గోల్స్‌తో ఇరు జట్లు 2-2తో సమంగా నిలిచాయి. దీంతో మైదానంలో టెన్షన్ నెలకొన్నది. ఈ తరుణంలో 51వ నిమిషంలో నికిన్ తిమ్మయ్య సాహసం చేసి అద్భుతమైన గోల్ చేయడంతో భారత్ దశ తిరిగింది. ఇండియా 3-2 గోల్స్ ఆధిక్యతను సాధించింది. అయితే ఆఖరి నిమిషం వరకు విపరీతమైన టెన్షన్ నెలకొన్నది. పాక్ పలుమార్లు గోల్స్ చేసే ప్రయత్నాలు చేసినప్పటికీ, వాటిని ఇండియా కస్టడియన్లు, గోల్ కీపర్ ఎంతో సమర్ధంగా నిలువరించారు. ఆఖరి నిమిషం రానేవచ్చింది. విజయం భారత్‌నే వరించింది.