Search
Sunday 23 September 2018
  • :
  • :

నా పెళ్లి ఇలా జరిగితే బావుండని అనుకుంటారు

నితిన్, రాశీఖన్నా జంటగా నటించిన చిత్రం ‘శ్రీనివాస కళ్యాణం’. సతీశ్ వేగేశ్న దర్శకత్వంలో దిల్‌రాజు, శిరీశ్, లక్ష్మణ్ ఈ చిత్రాన్ని నిర్మిస్తున్నారు. ఆగస్టు 9న ఈ సినిమా విడుదలకానుంది. ఈ సందర్భంగా నిర్మాత  హైదరాబాద్‌లో విలేకరులతో ముచ్చటిస్తూ చెప్పిన విశేషాలు… 

Dil-Raju

 ‘బొమ్మరిల్లు’ సినిమా రోజునే…
12 ఏళ్ల క్రితం 2006 ఆగస్టు 9న ‘బొమ్మరిల్లు’ చిత్రం విడుదలై నాకు మైలురాయి సినిమాగా నిలిచింది. ఇప్పుడు అదే రోజున ఆగస్టు 9న ‘శ్రీనివాస కళ్యాణం’ విడుదల కానుంది. మహేష్‌బాబు పుట్టిన రోజు కూడా అదే రోజు కావడం విశేషం. మా బ్యానర్‌లో ప్రస్తుతం మహేష్ ఓ సినిమా కూడా చేస్తున్నాడు. సినిమా ప్రారంభంలోనే ‘బొమ్మరిల్లు’ వంటి మంచి సినిమా కుదిరితే అదే డేట్‌లో విడుదల చేద్దామని అనుకున్నాం. ఇప్పుడు అదే రోజున సినిమాను విడుదల చేస్తున్నాం.

 మంచి అనుభూతితో వెళ్తారు…
పెళ్లి గురించి చాలా సినిమాలు, పాటలు చూశాం. మరి మా చిత్రంలో కొత్తగా ఏముంటుందని అందరూ అనుకుంటున్నారు. అయితే సినిమా చూసి బయటకు వచ్చిన తర్వాత మంచి అనుభూతితో ప్రేక్షకులు ఇంటికి వెళ్తారని నమ్మకంగా చెబుతున్నాను.

 ప్రతి ఒక్కరి జీవితంలో…
సూపర్ హిట్ చిత్రం ‘శతమానం భవతి’ తర్వాత సతీశ్ వేగేశ్న పెళ్లిపై సినిమా చేస్తానని అన్నారు. అలాగే ఈ కథ తయారీలో నా జీవితంలో జరిగిన విషయాలు కూడా తోడయ్యాయి. నా జీవితంలో జరిగిన సంఘటనలు ప్రతి ఒక్కరి జీవితంలో, ప్రతి ఒక కుటుంబంలో జరుగుతాయి.

 ప్రేక్షకులే చెబుతారు…
‘బొమ్మరిల్లు’ సినిమా ప్రేక్షకులకు నచ్చడంతో దాన్ని అద్భుతమైన సినిమాగా మలిచారు. ‘శతమానం భవతి’కి అలాంటి మ్యాజిక్ పునరావృతం అయింది. ‘శ్రీని వాస కళ్యాణం’ చూసిన ప్రేక్షకులే సినిమా గురించి అందరికీ చెబుతారు. అన్ని వర్గా ల ప్రేక్షకులకు నచ్చే సినిమా ఇదవుతుంది.

 కొన్ని విషయాలనైనాతెలుసుకుంటారు..
సినిమా చూసి ఇంటికెళ్లిన తర్వాత అమ్మమ్మలు, తాతయ్యలు మా జీవితాన్ని చూపించారని ఫీల్ అవుతారు. తల్లిదండ్రులు తమ పిల్లలకు పెళ్లి చేయాలనుకున్నప్పుడు కొన్ని విషయాలనైనా ఈ సినిమా నుంచి తెలుసుకుంటారు. పెళ్లి చేసుకోవాలనుకునే అమ్మాయిలు, అబ్బాయిలు నా పెళ్లి ఇలా జరిగితే బావుండని అనుకుంటారు.

 ఆ మ్యాజిక్ పునరావృతం…
మా బ్యానర్ నుండి బొమ్మరిల్లు, శతమానం భవతి తర్వాత శ్రీనివాస కళ్యాణం మరో మంచి సినిమా అవుతుంది. అశ్వనీదత్ ‘జగదేక వీరుడు అతిలోక సుందరి’ రిలీజ్ డేట్ రోజునే ‘మహానటి’ని విడుదల చేశారు. మ్యాజిక్ జరిగి సినిమా సూపర్ హిట్ అయింది. అలాగే ‘బొమ్మరిల్లు’ విడుదలైన రోజునే విడుదలవుతున్న ‘శ్రీనివాస కళ్యాణం’తో నాకు అలాగే మ్యాజిక్ పునరావృతం అవుతుందని అనుకుంటున్నాను.

 వెంకటేశ్వర స్వామినే చేయించాడు…
‘దిల్’ తర్వాత హీరో నితిన్‌తో ఈ అద్భుతమైన సినిమా చేశాను. వెంకటేశ్వర స్వామినే మాతో ఈ సిని మా చేయించాడని అనుకుంటున్నాను. ఇక ఇప్పటికే విడుదలైన పాటలకు మంచి స్పందన వస్తోంది.

Comments

comments