Search
Wednesday 26 September 2018
  • :
  • :
Latest News

అవిశ్వాసాల తీరు తెన్నులు!

Kripalani introduced the first non-confidence motion

భారత చరిత్రలో మొట్టమొదటి అవిశ్వాస తీర్మానం ప్రవేశపెట్టింది ఆచార్య కృపలానీ. ఆయన సోషలిస్టు. అప్పటి ప్రధాని జవహర్ లాల్ నెహ్రూకు వ్యతిరేకంగా అగష్టు 1963లో అవిశ్వాస తీర్మానం ప్రవేశపెట్టారు. ఇటీవలివరకు (మూజువాణి) చివరి అవిశ్వాస తీర్మానం పి.వి.నరసింహారావు ప్రభుత్వానికి వ్యతిరేకంగా జులై 1993 లో సిపిఐ సభ్యుడు అజయ్ ముఖోపాధ్యాయ ప్రవేశపెట్టారు. పి.వి.నరసింహరావు ప్రభుత్వం కేవలం 14 ఓట్ల తేడాతో చావు తప్పి కన్నులొట్టబోయినట్లు బతికి బయటపడింది. ఇప్పటివరకు జరిగిన 26 అవిశ్వాస తీర్మానాల్లో కేవలం నాలుగు తీర్మానాల విషయంలోనే వాయిస్ ఓటింగ్ జరిగింది. మిగిలినవన్నీ డివిజిన్ ఆఫ్ ఓటు జరిగాయి. దేశాన్ని అత్యధికంగా పాలించిన కాంగ్రెసు పార్టీ అత్యధికంగా 23 అవిశ్వాస తీర్మానాలు ఎదుర్కొంది. ఇందిరాగాంధీ ప్రభుత్వంపై 15 అవిశ్వాస తీర్మానాలు వచ్చాయి. లాల్ బహదూర్ శాస్త్రి ప్రభుత్వంపై ఒకటి, పి.వి.నరసింహారావు ప్రభుత్వంపై ఒకటి అవిశ్వాస తీర్మానాలు వచ్చాయి. 1967లో ఇందిరా గాంధీ ప్రభుత్వంపై అవిశ్వాస తీర్మానం ప్రవేశపెట్టింది వాజపేయి. పాతికేళ్ళ తర్వాత పి.వి. నరసింహారావు ప్రభుత్వంపై కూడా వాజపేయి అవిశ్వాస తీర్మానం ప్రవేశపెట్టారు. మొరార్జీ దేశాయ్ ప్రభుత్వంపై రెండు సార్లు అవిశ్వాస తీర్మానం వచ్చింది. 1979 జులైలో అవిశ్వాస తీర్మా నం చర్చ సందర్భంగా ప్రధాని మొరార్జీ దేశాయ్ రాజీనామా చేశారు. 1999లో వాజపేయి ప్రభుత్వానికి ఇప్పుడు మోడీ ప్రభుత్వంపై వచ్చిన అవిశ్వాస తీర్మానానికి ఒక పోలిక ఉంది. అప్పుడు ఎన్డీయే మిత్రపక్షం గా ఉన్న అన్నాడిఎంకె నాయకురాలు జయలలిత ఎన్డీయే నుంచి బయటకు వచ్చి మద్దతు ఉపసంహరించినప్పుడు వాజపేయి ప్రభుత్వం బలం నిరూపించుకోలేకపోయింది.ఇప్పుడు ఎన్డీయే మిత్రపక్షంగా ఉన్న తెలుగుదేశం ఎన్డీయే నుంచి బయటకు వచ్చి అవిశ్వాస తీర్మానం ప్రవేశపెట్టింది.అప్పుడు వాజపేయి ప్రభుత్వం కేవలం ఒక్క ఓటుతో ఓడిపోయింది. ఇప్పుడు మోడీ ప్రభుత్వానికి కావలసిన సంఖ్యాబలం ఉంది. 2003లో వాజపేయి ప్రభుత్వానికి వ్యతిరేకంగా సోనియాగాంధీ అవిశ్వాస తీర్మానం ప్రవేశపెట్టారు. ఆ తీర్మానం వీగిపోయింది. రాజీవ్ గాంధీ ప్రభుత్వం 1987లో విశ్వాస తీర్మానం ప్రవేశపెట్టి గెలిచింది. 2003లో వాజపేయి ప్రభుత్వానికి పూర్తి మెజారిటీ ఉందని తెలిసి కూడా కాంగ్రెసు అవిశ్వాస తీర్మానం ప్రవేశపెట్టడానికి కారణం ప్రభుత్వాన్ని ఆరోపణలతో ఇరుకున పెట్టడానికే. ఆ తర్వాత ఎన్నికల్లో ఎన్డీయే ఓడిపోయింది.
అంతకు ముందు 1979లో కాంగ్రెసు మద్దతు ఉపసంహరించుకోవడం వల్ల చరణ్ సింగ్ విశ్వాస తీర్మానం ప్రవేశపెట్టకుండానే రాజీనామా చేశారు. 1990లో వి.పి.సింగ్ ప్రభుత్వానికి బిజెపి మద్దతు ఉపసంహరించినప్పుడు విశ్వాస తీర్మానం సభలోకి వచ్చింది. వి.పి.సింగ్ ప్రభుత్వం సభలో బలం లేనందువల్ల కూలిపోయింది. 1996 మే లో విశ్వాస తీర్మానం కన్నా ముందే వాజపేయి రాజీనామా చేశారు. సభలో బలం లేదన్నది స్పష్టంగా ఉన్నందువల్ల ఆయన రాజీనామా చేశారు. 1997లో హెచ్.డి.దేవెగౌడ ప్రభుత్వానికి కాంగ్రెసు మద్దతు ఉపసంహరించడం ఆ తర్వాత విశ్వాస తీర్మానంలో ప్రభుత్వం పడిపోయింది. అవిశ్వాస తీర్మానం ప్రతిపక్షాలు ప్రవేశపెట్టడం ప్రభుత్వాన్ని ఇరుకున పెట్టే ఒక ఎత్తుగడ. అయితే ప్రభుత్వమే స్వయంగా తన బలాన్ని ప్రదర్శించడానికి విశ్వాస తీర్మానం ప్రవేశపెట్టడం ఆసక్తికరమైన విషయం. 2008లో మన్మోహన్ సింగ్ ప్రభుత్వం న్యూక్లియర్ ఒప్పందం విషయంలో వామపక్షాల మద్దతు కోల్పోయినప్పుడు విశ్వాస తీర్మానం ప్రవేశపెట్టి గెలిచింది. ఎన్డీఏ ప్రభుత్వానికి వ్యతిరేకంగా తెలుగుదేశం అవిశ్వాస తీర్మానం ప్రవేశపెట్టే ప్రయత్నం మార్చిలో కూడా చేసింది. ఆంధ్రప్రదేశ్ పునర్విభజన చట్టం ప్రకారం ప్రత్యేక హోదా ఇవ్వాలని డిమాండ్ చేస్తూ ఎన్డీయే నుంచి వైదొలిగింది. అప్పుడు లోక్‌సభలో వైయస్సార్ సిపి కూడా ఉంది. మొదట వైయస్సార్ సిపి సభ్యులే అవిశ్వాస తీర్మానం గురించి మాట్లాడారు. ప్రతిస్పందించక తప్పని పరిస్థితిలో తెలుగుదేశం కూడా అవిశ్వాస తీర్మానం ప్రవేశపెటడానికి ప్రయత్నించింది. ఆ తర్వాత కాంగ్రెసుకూడా అవిశ్వాస తీర్మానం ప్రవేశపెట్టాలని చూసింది. కాని స్పీకర్ అవిశ్వాస తీర్మానం స్వీకరించడానికి సిద్ధపడలేదు.
మార్చి నెలలో కిసాన్ మార్చ్ తదితర సంఘటనలు జరిగాయి. నీరవ్ మోదీపై ప్రశ్నలు ఎదుర్కొనే స్థితిలో లేదు. కర్నాటక ఎన్నికలు ఉన్నాయి. ఈ కారణాల వల్ల బిజెపి బలహీనమైన పరిస్థితిలో ఉంది. అప్పుడు అవిశ్వాస తీర్మానంపై చర్చ జరిగితే బిజెపి ఇరుకున పడేది. అందుకే చర్చను వాయిదా వేసింది.నీరవ్ మోదీ ఇప్పుడు చాలా మందికి గుర్తులేడు. రాఫెల్ యుద్ధవిమానాల ప్రస్తావన వచ్చినా ఫర్వాలేదనుకుంటోంది. లించింగ్ సంఘటనల విషయంలో బిజెపి వైఖరేమిటో మొత్తం దేశానికి స్పష్టంగా తెలిసినప్పుడు చర్చకు వచ్చినా లెక్కచేయవలసిన పనిలేదనే వైఖరి ఇప్పుడు కనబడుతోంది. అందుకే అనుకూలమైన పరిస్థితులన్నాయని బిజెపి అంచనా. బిజెపి ఇటీవల సంపర్క్ ఫర్ సమర్థన్ ఉద్యమం నడుపుతోంది. వివిధ పక్షాల మద్దతు కూడగట్టుకునే ప్రయత్నంలో ఉంది. త్వరలో కీలకమైన రాష్ట్రాల్లో ఎన్నికలు జరగబోతున్నాయి. త్రిపుల్ తలాక్ వంటి బిల్లుల విషయంలో కాంగ్రెసు తదితర పార్టీలను ఇరుకున పెట్టడానికి బిజెపి సిద్ధంగా ఉంది. కాంగ్రెసు ముస్లిముల పార్టీ అని రాహుల్ గాంధీ చెప్పారన్న వార్త ఫేక్ వార్త అని తేలిపోయినా బిజెపి అగ్రనేతలు అదే వార్తను ప్రచారంలో పెడుతున్నారు. త్రిపుల్ తలాక్ బిల్లుకు మద్దతిస్తేనే మహిళా రిజర్వేషన్ల బిల్లును ప్రవేశపెడతామని రవిశంకర్ ప్రసాద్ అన్నారు. త్రిపుల్ తలాక్ బిల్లు విషయంలో కాంగ్రెసు కొన్ని మార్పులు కోరుతోంది. దానికి బిజెపి ఇష్టపడదు. కాంగ్రెసు ముస్లిముల పార్టీ కాబట్టే త్రిపుల్ తలాక్ బిల్లుకు ఒప్పుకోవడం లేదన్న ప్రచారం చేస్తుంది. అవిశ్వాస తీర్మానం గెలవడం వల్ల పార్టీ శ్రేణుల్లో కొత్త ఉత్సాహాన్ని నింపవచ్చు. ఇది 2019 ఎన్నికలకు ఉపయోగపడుతుంది. చర్చ సందర్భంగా బిజెపి తన వాదన ప్రజల ముందు పెట్టగలదు. ఇంతకు మించి ప్రచారం ఏం కావాలి. పైగా చర్చకు భయపడి పారిపోయారన్న పేరు రావడం ఎన్నికలకు ముందు మంచిది కాదు. ఈ చర్చ తర్వాత అనుకున్న బిల్లులు పాస్ చేయించుకోగలిగితే ఆ పేరు బిజెపికి లాభిస్తుంది. ఒకవేళ త్రిపుల్ తలాక్ బిల్లు వంటి వాటిని ప్రతిపక్షాలు అడ్డుకుంటే ముస్లింల పట్ల బుజ్జగింపు వైఖరి అంటూ ప్రజల వద్దకు వెళ్ళవచ్చు. అలాగే శత్రుఘ్న సిన్హా, సావిత్రీ ఫూలే వంటి అసమ్మతి నేతలపై వేటు వేసే అవకాశం కూడా దొరుకుతంది. లోక్ సభలో 535 సభ్యులున్నారు. కాంగ్రెసు సభ్యుల సంఖ్య 49. తెలుగుదేశం సభ్యుల సంఖ్య 16. ఎన్‌సిపి సభ్యుల సంఖ్య 7, రాష్ట్రీయ జనతాదళ్ సభ్యుల సంఖ్య 4. వైయస్సార్ సిపి పార్టీకి 5 గురు సభ్యుల బలం ఉంది. కాని ఈ సభ్యులు ఐదుగురు రాజీనామా చేయడం వల్ల ప్రస్తుతం లోక్ సభలో 530 మంది సభ్యులు మాత్రమే ఉన్నారు. బిజెపికి 273 మంది సభ్యుల బలం ఉంది. ఎఐఎడిఎంకే సభ్యులు 37, తృణమూల్ కాంగ్రెసు సభ్యులు 34, బిజు జనతాదళ్ సభ్యులు 20, శివసేన 18, తెలంగాణ రాష్ట్ర సమితి సభ్యులు 11, సిపిఎం సభ్యులు 9, సమాజవాది పార్టీ 7 ఒక సభ్యుడు, ఇద్దరు సభ్యులున్న పార్టీలు కూడా ఉన్నాయి. ఈ పార్టీల్లో బిజూ జనతాదళ్, తెలంగాణ రాష్ట్రసమితి సభ్యులు ఓటింగులో పాల్గొనరని ముందే తెలిసిపోయింది. కాబట్టి అవిశ్వాస తీర్మానం వీగిపోడానికి అవసరమైన బలం ప్రభుత్వానికి ఉందన్నది ముందే స్పష్టంగా తెలిసిన విషయం. అవిశ్వాస తీర్మానం ప్రవేశపెట్టిన తెలుగుదేశం, కాంగ్రెసు పార్టీలకు కూడా ఈ విషయం తెలుసు. అయినా అవిశ్వాస తీర్మానం ప్రవేశపెట్టి సాధించిందేమిటి? లాభించిందెవరికి అన్నవి ఆలోచించవలసిన ప్రశ్నలు. ఎవరి వాదన వారు వినిపించారు. అనుకున్నట్లే అవిశ్వాసం వీగిపోయింది. ప్రజలు ఎవరి మాట నమ్మారు? ఎవరి మాటలను నమ్మలేదు? ఎవరు ప్రజల్లోకి చొచ్చుకు పోగలిగారు? ఎవరు వెనుకబడ్డారన్నది ఎన్నికల తర్వాతనే తెలుస్తుంది.

Comments

comments