Home ఆఫ్ బీట్ నాడు లైంగిక బాధితురాలు.. నేడు నోబెల్ గ్రహీత

నాడు లైంగిక బాధితురాలు.. నేడు నోబెల్ గ్రహీత

Nobel peace prize 2018 won by Denis Mukwege and Nadia Murad

ఈసారి నోబెల్ శాంతి బహుమతి గురించి ఓ ప్రత్యేకత ఉంది. ఎందుకంటే లైంగిక బాధితురాలైన ఇరాక్‌లోని యాజిదీ తెగకు చెందిన నదియా మురద్‌ను ఈ బహుమతి వరించడం వల్ల మహిళలు గర్వించాల్సిన అవసరం ఉంది. ఇంతకీ మురద్‌ను ప్రత్యేకంగా ఎందుకు చెప్పుకోవాలంటే..ఆమె ఓ లైంగిక బాధితురాలు. ఎన్నోసార్లు ఉగ్రవాదుల చేతిలో సామూహిక అత్యాచారాలకు గురైంది. తల్లిని, తోబుట్టువులను కోల్పోయింది. ఏమీ చేయలేని స్థితిలో ఎన్నో కష్టాలను ఎదుర్కొంది. ఇప్పుడు ఆమే అత్యున్నత నోబెల్ శాంతి బహుమతిని అందుకోబోతోంది. ఇంతకీ ఆమె చేసిన కృషి ఏమంటే.. తనకులాగా నరకం అనుభవిస్తున్న యూజిదీ యువతులను రక్షించడమే లక్షంగా పెట్టుకుని, అందుకు ఎంతో కృషి చేస్తోంది. మురద్‌తో పాటు యుద్ధంలో మహిళలపై లైంగిక హింసను ఆయుధంగా వాడుకోవడాన్ని నిర్మూలించేందుకు చేసిన కృషికి గాను కాంగోకు చెందిన వైద్యుడు డెనిస్ ముక్‌వెగెకు కూడా శాంతి పురస్కారం లభించింది. పాతికేళ్ల నదియా మురద్ యాజిదీ అమ్మాయిగా ఎదుర్కొన్న కష్టాల గురించి తెలిస్తే ఎవరికైనా హృదయం ద్రవీకరించకమానదు.

ఇరాక్‌లో యాజిదీలు ఎక్కువగా నివసించే సింజర్ ప్రాంతం సిరియా సరిహద్దుకు దగ్గరలో ఉంటుంది. అక్కడ నివసిస్తోంది నదియా కుటుంబం. అక్కడ ఇస్లామిక్ స్టేట్ ఉగ్రవాదుల ప్రాబల్యం ఎక్కువ. వారి చేసే అకృత్యాలు మాటల్లో చెప్పలేం. యాజిదీ స్త్రీల పట్ల దుర్మార్గంగా వ్యవహరిస్తారు. 2014 ఆగస్టులో నదియా జీవితంలో నరకం మొదలైంది. ఐఎస్ ఉగ్రవాదులు నల్లని జెండాలతో ట్రక్కుల్లో వచ్చారు. నదియా గ్రామమైన కోచోలో చొరబడి ఇష్టం వచ్చినట్లుగా పురుషులను చంపేశారు. చిన్న పిల్లలను బంధించి ఉగ్రవాదులుగా శిక్షణ ఇచ్చేందుకు తీసుకెళ్లారు. వేలాది యాజిదీ మహిళలను, అమ్మాయిలను పనివాళ్లుగా, లైంగిక బానిసలుగా మార్చేశారు.

అప్పుడే నదియాను కూడా ఉగ్రవాదులు అపహరించారు. కొన్ని నెలల పాటు బంధించి ఆమెపై ఉగ్రవాదులు సామూహికంగా అత్యాచారాలకు పాల్పడ్డారు. విపరీతంగా కొట్టారు. భయంకరంగా హింసించారు. ఉగ్రవాదులు యాజిదీ మహిళలను, బాలికలను మార్కెట్లో అమ్మేసేవారు. వారిని బలవంతంగా ఇస్లాంలోకి మార్చి పెళ్లిళ్లు చేసుకునేవారు. సంప్రదాయబద్ధంగా ఉండే అమ్మాయిల చేత బలవంతంగా మేకప్ వేయించి, బిగుతైన బట్టలు వేయించి జిహాదీలు ఇష్టం వచ్చినట్లుగా ప్రవర్తించారు. అలా ఎన్నో ఇబ్బందులు పడుతూ ఉగ్రవాదుల చెరలో ఉన్న నదియా ఓ ముస్లిం కుటుంబం సాయంతో మోసుల్ నగరం నుంచి తప్పించుకుని బయటపడింది. నకిలీ పత్రాలతో వేల కిలోమీటర్లు ప్రయాణించి యాజిదీలు ఉండే సహాయక శిబిరాలకు చేరుకుంది. అప్పటికే తన తల్లి, ఆరుగురు సోదరులు చనిపోయారని తెలుసుకుంది. దుఃఖాన్ని దిగమింది, జర్మనీలో తన సోదరి ఉంటుందని తెలుసుకుని ఓ సంస్థ సహాయంతో అక్కడికి చేరుకుంది. ప్రస్తుతం ఆమె జర్మనీలోనే ఉంటోంది.
అప్పుడే నిర్ణయించుకుంది నరకకూపంలో మగ్గుతున్న యాజిదీ మహిళలను కాపాడాలని. కనిపించకుండా పోయిన దాదాపు 3వేల మంది యాజిదీల ఆచూకీ కోసం నదియా ప్రయత్నిస్తూనే ఉంది. తనపై జరిగిన అకృత్యాల గురించి, యాజిదీ మహిళలపై జరుగుతున్న దారుణాల గురించి నదియా 2015లో ఐరాస భద్రతా మండలిలో మాట్లాడుతూ కళ్లకు కట్టినట్లు చెప్పింది. ఆమె ధైర్యసాహసాలకు మెచ్చి ఐరాస నదియాను గుడ్‌విల్ అంబాసిడర్‌గా నియమించింది. నదియా జీవితాన్ని తెలియజేస్తూ 2017లో ‘ది లాస్ట్ గర్ల్’ అనే పుస్తకం విడుదలైంది. లైంగిక హింసను అరికట్టేందుకు ఆమె చేస్తున్న కృషికి ఇప్పుడు ఎంతో ప్రతిష్టాత్మకమైన నోబెల్ శాంతి బహుమతి దక్కడం మహిళలకు దక్కిన గౌరవంగా భావించాలి.