Home తాజా వార్తలు ఎన్టీఆర్ హీరోగా  ఎమోషనల్ ఎంటర్‌టైనర్

ఎన్టీఆర్ హీరోగా  ఎమోషనల్ ఎంటర్‌టైనర్

ntrఎన్టీఆర్ హీరోగా కొరటాల శివ దర్శకత్వంలో ఒక భారీ చిత్రాన్ని మైత్రీ మూవీస్ సంస్థ నిర్మించబోతోంది. ఈ చిత్రం పూజా కార్యక్రమం నేడు హైదరాబాద్‌లోని మైత్రీ మూవీస్ కార్యాలయంలో చిత్ర బృందం నడుమ జరిగింది. ఈ కార్యక్రమానికి ముఖ్య అతిథులుగా నందమూరి కల్యాణ్‌రామ్, బివిఎస్‌ఎన్ ప్రసాద్, పొట్లూరి వి ప్రసాద్, శ్యాంప్రసాద్ రెడ్డి, దానయ్య డివివి, ఆచంట రామ్, ఆచంట గోపి, వివి వినాయక్, ఎర్రబెల్లి దయాకరరావు, నాగం జనార్దన్‌రెడ్డి, రేవంత్‌రెడ్డి తదితరులు హాజరయ్యారు. ఈ చిత్రానికి ఎన్టీఆర్ క్లాప్ కొట్టగా ఆయన తనయుడు అభయ్‌రామ్‌తో కెమెరా స్విచ్చాన్ చేయించారు. ఈ సందర్భంగా ఎన్టీఆర్ మాట్లాడుతూ “కొరటాల శివతో నాకు ‘బృందావనం’ రోజుల నుండి అనుబంధం ఉంది. ఆయన ఒక అద్భుతమైన రచయిత. ఒక అభిరుచి గల డైరెక్టర్. క్లాస్, మాస్ అంశాలను ఆయన బ్యాలెన్స్ చేసుకునే విధానం నన్ను ఎంతగానో ఆకట్టుకుంది. కొరటాల శివ అందించిన ఈ కథ నాకు బాగా నచ్చింది. మైత్రీ మూవీస్ సంస్థతో పనిచేయడం ఆనందంగా ఉంది”అని అన్నారు. దర్శకుడు కొరటాల శివ మాట్లాడుతూ “ఎన్టీఆర్‌లో ఉన్న నటుడికి, మాస్ ఇమేజ్‌కి సరిపడే కథ ఇది. చాలా ఎమోషనల్‌గా ఉండే ఎంటర్‌టైనర్ చిత్రమిది. జనవరిలో షూటింగ్‌ను ప్రారంభించి, ఆగస్టు 12న విడుదల చేసేందుకు ప్లాన్ చేస్తున్నాం. ఈ చిత్రంలో ఇద్దరు హీరోయిన్‌లు, ఒక ముఖ్య పాత్రలో ఒక ప్రముఖ నటుడు ఉంటారు”అని తెలిపారు. నిర్మాతలు నవీన్ యెర్నేని, వై.రవిశంకర్, మోహన్‌లు మాట్లాడుతూ “ఎన్టీఆర్-కొరటాల శివ కాంబినేషన్‌లో వచ్చే ఈ చిత్రాన్ని భారీ వ్యయంతో, ఎక్కడా రాజీపడకుండా నిర్మిస్తాం. వచ్చే ఏడాది జనవరి నుండి షూటింగ్ ప్రారంభమవుతుంది. కృష్ణా పుష్కరాల సందర్భంగా ఆగస్టు 12న ఈ చిత్రాన్ని విడుదల చేస్తాం”అని అన్నారు. ఈ చిత్రానికి సినిమాటోగ్రఫీః మది, ఎడిటింగ్‌ః కోటగిరి వెంకటేశ్వరరావు, ఆర్ట్‌ః ఎఎస్ ప్రకాష్, ఎగ్జిక్యూటివ్ ప్రొడ్యూసర్‌ః చంద్రశేఖర్ రావిపాటి.