Home జిల్లాలు వానొచ్చింది!

వానొచ్చింది!

రోడ్లపైకి వరదొచ్చింది… జనం ఇబ్బందులు

16-LBR-18సిటీబ్యూరో : గత కొన్నాళ్ళుగా ముఖం చాటేసిన వానదేవుడు కరుణించడంతో నగర ప్రజలు కొంత ఊపిరి పీల్చుకున్నారు. ఆదివారం తెల్లవారు జామునుంచి దాదాపు నాలుగు గంటల పాటు ఎడతెరిపి లేకుండా వర్షం కురువడంతో నగరం ఒక్కసారిగా చల్లబడింది. గత రెండు నెలలుగా వర్షాలు లేక ఎండకాలాన్ని తలపిస్తుండడంతో వేడిమితో ప్రజలు ఉక్కిరిబిక్కిరి అవుతున్న ప్రజలు ఆదివారం వర్షం కురవడంతో ప్రజల ఆనందంగా తడిసి ముద్దయ్యారు. నగరంలో పలు ప్రాంతాల్లో తెల్లవారు జాము నుంచి వర్షం కురవడంతో ఆనందం వ్యక్తం చేశారు. వర్షాలు లేక బోర్లు ఎండిపోయి ప్రజలు తీవ్ర ఇబ్బందులు పడుతున్న విషయం తెల్సిందే.

బంజారాహిల్స్, జూబ్లీహిల్స్, అమీర్‌పేట, మాదాపూర్, హైటెక్ సిటీ, పంజాగుట్ట, కూకట్‌పల్లి, బోయిన్‌పల్లి, బేగంపేట్, చిలకలగూడ, సికింద్రాబాద్, తార్నాక, ఉప్పల్, నాగోల్ , ఎల్‌బినగర్, దిల్‌సుఖ్‌నగర్, మలక్‌పేట్, కోఠీ, అబిడ్స్, అబిడ్స్, నాంపల్లి, మెహదీపట్నం, తదితర ప్రాంతాల్లో ఏకధాటిగా వర్షం పడడంతో లోతట్టు ప్రాంతాలు జలమయం కావడంతో పాటు రోడ్లపైకి భారీగా నీరు చేరింది. దీంతో ఎక్కడికక్కడ ట్రాఫిక్ జామ్ ఏర్పడి ప్రయాణికులు తీవ్ర ఇబ్బందులు పడ్డారు. అయితే ఆదివారం సెలవు దినం కావడం ఏకధాటిగా వర్షం కురవడంతో రోడ్లపై జనాలు పలుచగానే కనిపించారు.
వర్షంతో భక్తులకు ఇబ్బందులు
ఆదివారం ఉదయం నుంచే వర్షం ఆగకుండా కురవడంతో నగర శివారు ప్రాంతాల్లో పలు చోట్ల బోనాల పండుగ జరుపుకుంటున్న ప్రజలు కష్టాలు పడాల్సిన పరిస్థితి ఏర్పడింది. వర్షం తెల్లవారు జాము నుంచి 11 గంటల వరకు పడుతూనే ఉండడంతో ఆలయాలకు వెళ్లేందుకు భక్తులు ఇబ్బందులు పడ్డారు. అంతేకాకుండా ఆలయాల వద్ద పండుగ నిర్వాహకులు కూడా అనేక ఇబ్బందులు పడ్డారు. మధ్యాహ్నం 12 గంటల తర్వాత వర్షం ఆగడంతో మహిళలు బోనాలతో అమ్మవార్ల ఆలయాలకు తరలి వెళ్లారు.