Home జాతీయ వార్తలు కేరళకు తొలకరి కళ

కేరళకు తొలకరి కళ

 

 వారం జాప్యం పిదప రుతుపవనం
 పలు జిల్లాల్లో కుండపోత
 వర్షాల విస్తరణకు అనుకూలత

న్యూఢిల్లీ : వారం రోజుల ఊరింపుల జాప్యం తరువాత ఎట్టకేలకు కేరళలో తొలకరి ఆరంభం అయింది. శనివారంనాడు నైరుతి రుతుపవనాలు కేరళ తీరాన్ని తాకాయని భారత వాతావరణ సంస్థ (ఐఎండి) తెలిపింది. దేశమంతటికి వర్షాకాలపు ఆగమనానికి ఇది ప్రతీక. రుతు పవనాల బలీయ ప్రభావంతో భారీ వర్షసూచన ఉండటంతో కేరళలోని నాలుగు జిల్లాల్లో వచ్చే నాలుగు రోజులు ముందు జాగ్రత్త చర్యలు చేపట్టారు. రాష్ట్రంలోని త్రిస్సూర్, ఎర్నాకులం, మల్లాప్పురం, కొజికోడ్ జిల్లాలో రెడ్ అలర్ట్ ప్రకటించినట్లు అధికార వర్గాలు తిరువనంతపురంలో ధృవీకరించాయి. సాధారణంగా నైరుతి రుతుపవనాలు జూన్ 1వ తేదీన కేరళకు రావాల్సి ఉంది. తొలుత ఇవి ఈసారి నాలుగవ తేదీన వస్తాయని అంచనా వేశారు. అయితే మొత్తం మీద వారం రోజుల ఆలస్యం తరువాత వర్ష పవనాలు నేలను తాకాయి. కేరళలో రుతుపవనాల ప్రవేశం గురించి ఐఎండి డైరెక్టర్ జనరల్‌గా నియుక్తులైన మృత్యుంజయ్ మెహాపాత్ర శనివారం తెలిపారు. రుతు పవనాల రాకతో శనివారం ఉదయం నుంచే కేరళ తీర ప్రాంతాలలో కుండపోత వర్షాలు మొదలయ్యాయి. ఇవి సాయంత్రానికి మరింత జోరందుకున్నాయి. ఈసారి మందగమనంతో వచ్చిన రుతు పవనాలు క్రమేపీ దక్షణ భారతం లోతట్టు ప్రాంతాల్లోకి ప్రవేశిస్తాయి. ఇప్పటికీ భీకరమైన వడగాడ్పులు, తీవ్రస్థాయి గాలిదుమారాలతో తల్లడిల్లుతున్న పశ్చిమ, ఉత్తర భారత ప్రాంతాల్లోకి ఈ నెల 29వ తేదీకి ఇవి చేరుతాయని విశ్లేషించారు. అప్పటివరకూ ఉత్తరభారతం అనివార్యంగా వేసవితాపంతో ఉడుకెత్తి పోవల్సి ఉంటుంది. దేశ ఆర్థిక పరిస్తితికి జిడిపికి మూలమైన వ్యవసాయ రంగం ప్రధానంగా వర్షాధారితం కావడంతో సకాల, సరైన రుతుపవనాల కోసం దేశ ప్రజలంతా ఎదురుచూడటం పరిపాటి. వర్షాకాలంలోనే దేశంలో మొత్తం వర్షపాతంలో 70 శాతం వరకూ కురుస్తుంది. దీనితో ఈ సీజన్ బాగుండటమే కీలకం అయింది.
అరేబియాలో అనుకూలత
అరేబియా సముద్రం ఆగ్నేయ దిశలో తాజాగా నెలకొన్న కదలికల ప్రభావంతో రుతుపవనాల వేగవంత కదలిక జరిగిందని ప్రైవేటు వాతావరణ సంస్థ స్కైమెట్ తెలిపింది. రుతుపవనాల క్రమంలో వాటిపై సవ్యమైన ప్రభావం చూపే పరిణామాలు నెలకొనడం మంచి పరిణామం అవుతుంది. వచ్చే 24 గంటలలో కేరళలో ఈ దిశలోనే అల్పపీడనం ఏర్పడుతుంది. రుతుపవనాలకు ఇది సానుకూలతను తీసుకువస్తుందని భావిస్తున్నారు. ఈసారి వర్షపాతాలు సాధారణ స్థాయిలోనే ఉంటాయని అంచనా వేశారు.

southwest monsoon hits Kerala