Search
Sunday 18 November 2018
  • :
  • :

కదం తొక్కిన విద్యార్థి లోకం

 ఫీజు రీయింబర్స్‌మెంట్, స్కాలర్‌షిప్‌లు విడుదల చేయాలని డిమాండ్
 మద్దతు తెలిపిన వామపక్ష నేతలు కోమటిరెడ్డి రాంగోపాల్ రెడ్డి, జి.ముకుంద రెడ్డి

1133కరీంనగర్‌టౌన్: ప్రభుత్వం ఫీజు రీయింబర్స్‌మెంట్ బకాయిల విడుదల, స్కాల ర్‌షిప్ విడుదలలో జాప్యం చేస్తుందని శనివారం విద్యార్థి లోకం కదం తొక్కి కలెక్టరేట్ ఎదుట ధర్నా నిర్వహించారు. విద్యార్థు లకు మద్దతుగా సిపిఐ జిల్లా కార్యదర్శి కొమటిరెడ్డి రాంగోపాల్ రెడ్డి, సిపిఎం జిల్లా కార్యదర్శి జి.ముకుంద రెడ్డి పాల్గొని ప్రభు త్వం అనుసరిస్తున్న వ్యతిరేక విధానాలను ఎండగట్టారు. సిపిఐ జిల్లా కార్యదర్శి రామ్‌గోపాల్ రెడ్డి మాట్లాడుతూ ప్రభుత్వం విద్యార్థి లోకంతో పెట్టుకుంటే గద్దె దిగడం ఖాయమనిహెచ్చరించారు. తెలంగాణ వస్తే విద్యార్థుల భవిష్యత్తు బాగుపడుతుందని అనుకుంటే దానికి విరుద్ధంగా ప్రభుత్వం వ్యవహరిస్తుందని ఆరోపించారు. ఎన్నికల హామీలను నెరవేర్చకుండా, కొత్త పథకాలను ముందుకు తెచ్చి, ఇటు విద్యార్థులను అటు ప్రజలను మోసం చేయాలని చూస్తే తగిన గుణపాఠం చెబుతారన్నారు. విద్యార్థులకు రావాల్సిన బకాయిలు ఇవ్వకుండా వారి భవిష్యత్తును బుగ్గిపాలు చేస్తూ కొనసాగుతున్న పాలకులకు పాపం తప్పక తగులుతుందని పేర్కొన్నారు. విద్యార్థి ఉద్యమాలతో ఇతర రాష్ట్రాల్లో ప్రభుత్వాలే కూలిపొయాయని, ఈ ప్రభుత్వానికీ అదే గతి పడుతుందని జోస్యం చెప్పారు.

సిపిఎం జిల్లా కార్యదర్శి జి.ముకుంద రెడ్డి మాట్లాడుతూ ప్రభుత్వం విద్యార్థులకు చెల్లించాల్సిన బకాయిలను చెల్లించకుండా జాప్యం చేస్తుందని దీని వలన విద్యార్థులు తీవ్ర ఇబ్బందులు ఎదుర్కొంటున్నారన్నారు. గతేడాది ఫీజులు, ఉపకార వేతనాలు కొంత మాత్రమే విడుదల చేసి ప్రభుత్వం చేతులు దులుపుకుందని మండిపడ్డారు. ఈ ఏడాది రూ.1900 కోట్లు విడుదల చేయాల్సి ఉన్నా కాలయాపన చేస్తూ సిఎం విదేశీ పర్యటనలు కొనసాగిస్తున్నారని విమర్శించారు. ముఖ్యమంత్రి ఉద్దేశ్యపూర్వకంగానే ఫీజులు ఎగ్గొంట్టేందుకు కుట్ర పన్నుతున్నారని ఆరోపించారు. విద్యార్థుల సమస్యలను పరిష్కరించకుంటే వామపక్షల ఆధ్వర్యంలో రాష్ట్ర వ్యాప్తంగా ఆందోళనలు చేపడుతామని ప్రభుత్వాన్ని హెచ్చరించారు.
అనంతరం డిఆర్‌ఒకు విద్యార్థుల సమస్యలతో కూడిన వినతి పత్రాన్ని అందించారు. అంతకుముందు సర్కారు గ్రౌండ్ నుంచి వామపక్ష పార్టీల నేతలు, విద్యార్థులు పెద్దసంఖ్యలో కలెక్టరేట్ వరకు ర్యాలీ చేపట్టారు. ఈ కార్యక్రమంలో ఎస్‌ఎఫ్‌ఐ జిల్లా అధ్యక్షులు, కార్యదర్శి తిప్పారపు సురేశ్, ఎం.తిరుపతి, పిడిఎస్‌యు రాష్ట్ర అధ్యక్షుడు జె.శ్రీనివాస్, జిల్లా అధ్యక్షుడు ఆర్.రమేశ్, ఎఐఎఫ్‌బి రాష్ట్ర అధ్యక్షులు చౌటపల్లి వేణుగోపాల్, ఎఐఎస్‌బి జిల్లా కన్వీనర్ గవ్వ వంశీధర్ రెడ్డి, పిడిఎస్‌యు మహేశ్, టివివి నాయకులు కరికే మహేశ్, ఎఐఎస్‌ఎఫ్ జిల్లా కార్యదర్శి బి.మహేందర్, నాయకులు వేల్పుల శ్రీకాంత్, బి.సంతోష్, ఎ.రాజశేఖర్, రజినీకాంత్, మణికంఠ, రాణా ప్రతాప్, గణేశ్, రమేశ్ గౌడ్ పాల్గొన్నారు.

Comments

comments