Search
Monday 24 September 2018
  • :
  • :

టీచర్ పోస్టుల భర్తీకి ఓకే

టెట్, డిఎస్సీ నిర్వహణ
ఎదురుచూపులకు బ్రేక్
జిల్లాలో 733 పోస్టులు
వచ్చే ఏడాదే కొత్త కొలువులు
TEACHERమన తెలంగాణ/వరంగల్: ఖాళీగా ఉన్న ఉపాధ్యాయ పోస్టుల భర్తీకి ప్రభుత్వం సమాయత్తమైంది. ఎన్నాళ్లుగానో ఎదురుచూస్తున్న నిరుద్యోగులకు శుభవార్త లభించింది. జిల్లాలోని నిరుద్యోగులు సంతోషం వ్యక్తం చేస్తున్నారు. ఇంతకాలం సాగిన పడిగాపులకు బ్రేక్ వేస్తూ టెట్, డిఎస్సీ నిర్వహణకు ముహూర్తం ఖరారు చేశారు. నిర్వహణ తేదీలు మాత్రమే ప్రకటించాల్సి ఉంది. డిప్యూటీ సిఎం, రాష్ట్ర విద్యాశాఖ మంత్రి కడియం శ్రీహరి సోమవారం ఈ మేరకు టెట్, డిఎస్‌సి నిర్వహణపై ప్రకటన చేయడంతో జిల్లాలో మరోసారి ఉపాధ్యాయ పోస్టుల భర్తీ కోసం ఎదురుచూస్తున్న నిరుద్యోగులు పుస్తకాలతో కుస్తీపట్టేందుకు సన్నద్ధమవుతున్నారు. ఇప్పటికే పలుపర్యాయాలు కోచింగ్‌లు, ప్రత్యేక శిక్షణలు పొందిన నిరుద్యోగ అభ్యర్ధులు మరోసారి కోచింగ్ సెంటర్‌లకు క్యూకట్టేందుకు సిద్ధమవుతున్నారు.
జిల్లాలో 733 పోస్టులు …
జిల్లాలో ఇప్పటి వరకు 733 ఉపాధ్యాయ పోస్టులు ఖాళీగా ఉన్నట్లు ప్రభుత్వానికి ప్రతిపాదనలు పంపించారు. ఇందులో మైదాన ప్రాంతంలో 522 పోస్టులున్నాయి. ఏజెన్సీ ఏరియాలో 211 పోస్టులు ఖాళీగా ఉన్నట్లు ప్రకటించారు. మైదానం ప్రాంతంలోని 522 పోస్టుల్లో 274 ఎస్‌జిటి పోస్టులు కాగా, 127 స్కూల్ అసిస్టెంట్ ఉండగా మిగిలినవి వివిధ కేటగిరీ పోస్టులున్నాయి. ఇక ఏజెన్సీ ఏరియాలో 211 పోస్టులు ఖాళీగా ఉన్నాయి. ఇందులో 134 ఎస్‌జిటి పోస్టులుండగా మిగిలినవి స్కూల్ అసిస్టెంట్, ఇతర కేటగిరీ పోస్టులున్నాయి. కాగా, పోస్టుల భర్తీనాటికి ఖాళీ గామారే ఉపాధ్యాయ పోస్టులను పరిగణలోకి తీసుకొని భర్తీచేస్తారా? ఇప్పటి మేరకు ప్రకటించిన ఖాళీ పోస్టులను మాత్రమే భర్తీ చేస్తారా? అనేది నిరుద్యోగులు చర్చించుకుంటున్నారు.
మార్చి టూ జులై …
కొత్త సంవత్సరంలో ఖాళీ ఉపాధ్యాయ పోస్టుల భర్తీకి ప్రభుత్వం నిర్ణయించింది. వచ్చే విద్యాసంవత్సరం ప్రారంభం నుంచి కొత్త పంతుళ్ళు కొలువుల్లో చేరే విధంగా కార్యక్రమాన్ని రూపొందించారు. మంత్రి కడియం ప్రకటించిన వివరాలిలా ఉన్నాయి. మార్చి నుంచి జులై వరకు పంతుళ్ళ అర్హత పరీక్షలు, ఎంపిక, పోస్టింగ్‌లు నిర్వహించనున్నారు. మార్చి మొదటి వారంలో టీచర్స్ ఎలిజిబిలిటి టెస్ట్ (టెట్)కు నోటిఫికేషన్ జారీ చేస్తారు. ఏప్రిల్ మొదటి వారంలో టెట్ పరీక్ష నిర్వహిస్తారు. ఏప్రిల్ చివరి వారంలో డిఎస్‌సికి నోటిఫికేషన్ జారీ చేస్తారు. జూన్ రెండవ వారంలో డిఎస్‌సి పరీక్ష నిర్వహిస్తారు. అదే నెల చివరి వారంలో ఫలితాలు వెల్లడిస్తారు. జులై రెండవ వారంలో అభ్యర్ధుల ఎంపిక, పోస్టింగ్‌లు ఇవ్వనున్నారు.

Comments

comments