మృతులలో 8 మంది చిన్నారులు
ముంబయి: ముంబయిలోని మాల్వానీ ప్రాంతంలో ఒక ఇల్లు కూలి పక్కింటి మీద పడడడంతో 8 మంది పిల్లలతో సహా 11 మంది మరణించారు. మరో ఏడుగురు గాయపడ్డారు. అబ్దుల్ హమీద్ రోడ్డులోని కొత్త కలెక్టర్ కాంపాండ్ వద్ద బుధవారం రాత్రి 11.15 గంటల ప్రాంతంలో ఈ దుర్ఘటన జరిగింది. సంఘటనా స్థలానికి హుటాహుటిన చేరుకున్న అగ్నిమాపక సిబ్బంది, ఇతర సహాయక సిబ్బంది సహాయక చర్యలు చేపట్టారు. ఈ సంఘటనలో 8 మంది పిల్లలు, ముగ్గురు పెద్దలు మరణించినట్లు బృహన్‌ముంబయి మున్సిపల్ కార్పొరేషన్ అధికారి ఒకరు తెలిపారు. గాయపడిన వారిలో ఒకరి పరిస్థితి విషమంగా ఉందని ఆయన చెప్పారు. శిథిలాల కింద చిక్కుకుని గాయపడిన వారిని సమీపంలోని ఆసుపత్రికి తరలించినట్లు ఆయన చెప్పారు. శిథిలాల కింద మరికొందరు చిక్కుకుని ఉండవచ్చని అనుమానిస్తున్నట్లు అధికారులు చెప్పారు. పక్కనే ఉన్న మరో మూడంతస్తుల భవనం కూడా సురక్షితంగా లేదని వారు తెలిపారు.
11 dead members dead in building collapsed in mumbai