యువ సామ్రాట్ నాగ చైతన్య నటిస్తున్న లవ్ అండ్ యాక్షన్ ఎంటర్‌టైనర్ ’తండేల్’. చందూ మొండేటి దర్శకత్వం వహించిన ఈ చిత్రాన్ని అల్లు అరవింద్ సమర్పణలో ప్రతిష్టాత్మక గీతా ఆర్ట్ బ్యానర్‌పై బన్నీ వాసు నిర్మిస్తున్నారు. ఈ సినిమా ఫస్ట్ సింగిల్ ‘బుజ్జి తల్లి‘ సెన్సేషనల్ హిట్ అయింది. రాక్‌స్టార్ దేవి శ్రీ ప్రసాద్ సంగీతం అందిస్తున్న ఈ సినిమాలో సాయి పల్లవి కథానాయికగా నటిస్తోంది. ప్రోమోతో ప్రేక్షకులను ఆకట్టుకున్న మేకర్స్ ఇప్పుడు ఎంతో ఆసక్తిగా ఎదురుచూస్తున్న సెకండ్ సింగిల్ ‘నమో నమః శివాయ‘ లిరికల్ వీడియోను రిలీజ్ చేశారు. మహాదేవ్ స్మరణతో కూడున్న శివ శక్తి పాట అందరినీ అలరిస్తోంది.
ఈ సాంగ్ డ్యాన్స్, ఆధ్యాత్మిక, గ్రాండియర్ విజువల్‌తో ప్రేక్షకులను మైమరపిస్తోంది. రాక్‌స్టార్ దేవి శ్రీ ప్రసాద్ కంపోజ్ చేసిన ఎలక్ట్రిఫైయింగ్ బీట్స్ కట్టిపడేస్తున్నాయి. జొన్నవిత్తుల సాహిత్యం శివుని సర్వశక్తి, ఆధ్యాత్మికత సారాంశాన్ని అద్భుతంగా చూపించింది. అనురాగ్ కులకర్ణి, హరిప్రియ తమ గానంతో అలరించారు. శేఖర్ మాస్టర్ కొరియోగ్రఫీ మరొక హైలైట్. ’లవ్ స్టోరీ’లో తమ ఆన్-స్క్రీన్ కెమిస్ట్రీతో ప్రేక్షకులను ఆకట్టుకున్న లీడ్ పెయిర్ నాగ చైతన్య, సాయి పల్లవి ఈ పాటలో మైమరపించారు. తండేల్ సినిమా ఫిబ్రవరి 7న విడుదల కానుంది.