ముంబైలో నీటి ట్యాంకు శుభ్రం చేస్తూ ఊపిరాడక నలుగురు కార్మికులు మృతి

ముంబై: దక్షిణ ముంబైలో నిర్మాణంలో ఉన్న భవనం నీటి ట్యాంకును శుభ్రం చేస్తూ ఆదివారం నలుగురు కార్మికులు మృతి చెందారని అధికారులు తెలిపారు. ‘నాగ్‌పాడ ప్రాంతంలోని దిమ్తీకర్ రోడ్డులో ఉన్న బిస్మిల్లా స్పేస్ బిల్డింగ్‌లో మధ్యాహ్నం 12.30 గంటలకు ఈ దుర్ఘటన జరిగింది. ట్యాంకులోకి దిగిన ఐదుగురు కార్మికులు స్పృహ తప్పి పడిపోయారు. వారిని అగ్నిమాపక్ సిబ్బంది కాపాడి జెజె ఆసుపత్రికి తరలించారు. కాగా ఆసుపత్రికి చేరిన వారిలో నలుగురు చనిపోయారని డాక్టర్లు తెలిపారు’ అని ఓ పౌర అధికారి తెలిపారు. ఆసుపత్రిలో హసిపాల్ షేఖ్(19), రజా షేఖ్(20), జియావుల్లా షేఖ్(36), ఇమాందు షేఖ్(38) చనిపోగా, పుర్హాన్ షేఖ్(31) కోలుకుంటున్నాడని ఆ అధికారి వివరించారు. ప్రమాద మరణ నివేదికను నమోదు చేసుకుని దర్యాప్తును మొదలెట్టినట్లు జెజె పోలీస్ స్టేషన్ అధికారి తెలిపారు. దర్యాప్తు తర్వాత చర్యలు తీసుకుంటామని కూడా ఆయన స్పష్టం చేశారు.