ప్రదీప్ మాచిరాజు హీరోగా అమృత అయ్యర్ హీరోయిన్‌గా యస్వీ ప్రొడక్షన్స్ బ్యానర్‌పై ఫణి ప్రదీప్‌ని దర్శకుడిగా పరిచయం చేస్తూ యస్వీ బాబు నిర్మించిన చిత్రం ‘30 రోజుల్లో ప్రేమించడం ఎలా’. తాజాగా విడుదలైన ఈ చిత్రం సూపర్ హిట్ టాక్ సొంతం చేసుకొని ఘన విజయం దిశగా దూసుకుపోతోంది. ఈ సందర్భంగా చిత్ర యూనిట్ హైదరాబాద్‌లో సక్సెస్ మీట్‌ను ఏర్పాటు చేశారు. ఈ కార్యక్రమంలో హీరో ప్రదీప్ మాచిరాజు, దర్శకుడు ఫణి ప్రదీప్, చిత్ర నిర్మాత యస్వీ బాబు, సంగీత దర్శకుడు అనూప్ రూబెన్స్, చంద్రబోస్, అనంత్ శ్రీరామ్ తదితరులు పాల్గొన్నారు. ఈ సందర్భంగా చిత్ర నిర్మాత యస్వీ బాబు సినిమా యూనిట్ సభ్యులు అందరినీ పూలదండ, శాలువాలతో ఘనంగా సత్కరించారు. అనంతరం చిత్ర నిర్మాత యస్వీ బాబు మాట్లాడుతూ “సినిమా హిట్ అవుతుందని అనుకున్నాము కానీ ఇంత పెద్ద హిట్ అవుతుందని ఊహించలేదు. మున్నా వెరీ టాలెంటెడ్ డైరెక్టర్. మా బ్యానర్‌కి పెద్ద హిట్ ఇచ్చినందుకు అతనికి థాంక్స్.
ఈ చిత్రంతో ప్రదీప్ హీరోగా ప్రజలందరి హృదయాల్లో మంచి స్థానం సంపాదించుకున్నాడు”అని అన్నారు. దర్శకుడు ఫణి ప్రదీప్ మాట్లాడుతూ “ నీలి నీలి ఆకాశం… పాట కోసం జనాలు థియేటర్‌కి వస్తున్నారు. వచ్చాక నవ్వుకొని.. అమ్మ పాట వచ్చాక ఏడుస్తున్నారు. అందరూ కలిసి ఎంజాయ్ చేసే సినిమా ఇది. తొలి రోజే 4.17 కోట్లు కలెక్ట్ చేయడంతో ఈ సినిమా రేంజ్ ఏంటో అర్ధమవుతుంది”అని పేర్కొన్నారు. హీరో ప్రదీప్ మాచిరాజు మాట్లాడుతూ.. “ఫ్యామిలీ ఆడియన్స్ ఎక్కువమంది థియేటర్స్‌కి వచ్చి ఈ సినిమా చూస్తున్నారు. ఏపీ, తెలంగాణ, యుఎస్… అన్ని ఏరియాల నుండి మంచి స్పందన వస్తోంది. సినిమాని అద్భుతంగా తెరకెక్కించిన మున్నా, బ్యూటిఫుల్ మ్యూజిక్ ఇచ్చిన అనూప్‌కి నా స్పెషల్ థాంక్స్”అని తెలిపారు.
30 Rojullo Preminchadam Ela movie Success meet