బిజెపి గెలుస్తుందని మోడీ ప్రచారంపై మమత ధ్వజం
ఖానకుల్ (పశ్చిమబెంగాల్ ) : పశ్చిమబెంగాల్ పోలింగ్ దశలు ఇంకా ఆరు ఉండగా, బిజెపి గెలుస్తుందని ప్రధాని మోడీ ప్రచారం చేయడంపై ముఖ్యమంత్రి మమతాబెనర్జీ ఆదివారం ఆశ్చర్యం వ్యక్తం చేశారు. మోడీ భగవంతుడా? లేక అతీత శక్తులున్నవాడా ? అని ఆమె వ్యంగ్యంగా ధ్వజమెత్తారు. బెంగాల్‌లో బిజెపి ప్రభుత్వ ప్రమాణస్వీకారానికి తాను హాజరౌతానని, పిఎం కిసాన్ నిధి స్కీమ్‌ను వీలైనంత త్వరగా అమలు చేయాలని విజ్ఞప్తి చేస్తానని బహిరంగ సభల్లో మోడీ చేసిన వ్యాఖ్యలను ఉదహరిస్తూ మమత తీవ్రంగా ఆక్షేపించారు. ప్రమాణస్వీకారానికి సిద్ధం కావాలని రాష్ట్ర ప్రభుత్వాధికారులను ఉద్దేశించి మోడీ మాట్లాడడం కోడ్ ఆఫ్ కాండక్టు ఉల్లంఘించడమేనని విమర్శించారు. ఏప్రిల్ 6న ఎన్నికలు జరగనున్న హూగ్లీ, హౌరా, దక్షిణ 24 పరగణాల జిల్లాల్లోని ర్యాలీల్లో మమత ప్రసంగిస్తూ మోడీని ఉద్దేశించి ప్రమాణస్వీకారానికి మేం మిమ్మల్ని పిలిచేది లేదని వ్యాఖ్యానించారు.