హైదరాబాద్: తెలంగాణలో రోజురోజుకు కరోనా కేసులు రికార్డుస్థాయిలో నమోదవుతున్నాయి. గడిచిన 24 గంటల వ్యవధిలో 3,840మందికి కరోనా వైరస్ సోకింది. తాజాగా కరోనాతో తొమ్మిది మంది మృత్యువాతపడ్డారు. అదే సమయంలో మరో 1,198 మంది బాధితులు కోలుకున్నారు. రాష్ట్రవ్యాప్తంగా మొత్తం కరోనా కేసుల సంఖ్య 3,41,885కి చేరింది. కోవిడ్ మరణాలు 1,797గా ఉంది. రాష్ట్రంలో ప్రస్తుతం 30,494 కరోనా యాక్టివ్ కేసులుండగా.. ఇప్పటివరకు మొత్తం 3,09,594 మంది ఈ మమ్మారి నుంచి కోలుకుని డిశ్చార్జ్ అయ్యారు. హోం ఐసోలేషన్ లో 20,215 మంది బాధితులు చికిత్స పొందుతున్నారు. జిహెచ్ఎంసి పరిధిలో కొత్తగా 505, మేడ్చల్ లో 407, రంగారెడ్డిలో 302, నిజామాబాద్ లో 303, సంగారెడ్డిలో 175 మందికి కరోనా వైరస్ సోకింది. తెలంగాణలో నిన్న 1,21880 మందికి కరోనా పరీక్షలు నిర్వహించినట్టు వైద్య శాఖ అధికారులు తాజాగా విడుదల చేసిన హెల్త్ బులిటెన్ లో ప్రకటించారు.
