పాన్ ఇండియా స్టార్ ప్రభాస్ ‘రాధేశ్యామ్’ లాంటి క్లాస్ లవ్ స్టోరీ తర్వాత వరుసగా మాస్ సినిమాలను లైన్‌లో పెట్టేశాడు. ఇప్పటికే ‘రాధేశ్యామ్’ విడుదలకు సిద్ధమవుతుండగా.. మరోవైపు రెండు సినిమాలను బ్యాలెన్స్ చేస్తూ షూటింగ్ పూర్తి చేస్తున్నాడు. కేజీఎఫ్ సినిమా డైరెక్టర్ ప్రశాంత్ నీల్ దర్శకత్వంలో ప్రభాస్ ‘సలార్’ అనే సాలిడ్ మాస్ మూవీ చేస్తున్నాడు. ఇదివరకే ఈ సినిమాను వచ్చే ఏడాది విడుదల చేయనున్నట్లు మేకర్స్ ప్రకటించారు. ఈ సినిమాలో ప్రభాస్ జోడిగా శృతిహాసన్ నటిస్తోంది. ‘సలార్’తో పాటుగా ప్రభాస్ బాలీవుడ్ డైరెక్టర్ ఓంరౌత్ దర్శకత్వంలో ‘ఆదిపురుష్’ సినిమా చేస్తున్నాడు. రామాయణం నేపథ్యంలో పౌరాణిక చిత్రంగా ‘ఆదిపురుష్’ తెరకెక్కుతోంది. ఈ సినిమాలో ప్రభాస్ సరసన హీరోయిన్‌గా కృతిసనన్ నటిస్తోంది. వీటితో పాటు ప్రభాస్ ఇదివరకే మహానటి ఫేమ్ నాగ్ అశ్విన్ సినిమాను ఓకే చేశాడు. సైంటిఫిక్ యాక్షన్ థ్రిల్లర్‌గా ఈ సినిమా తెరకెక్కనుంది. ఈ ఏడాది దసరా సందర్భంగా నాగ్ అశ్విన్‌తో సినిమా ప్రారంభం కానున్నట్లు తెలిసింది. పాన్ వరల్డ్ సినిమాగా నాగ్ అశ్విన్ ఈ సినిమాను ప్లాన్ చేస్తున్నాడు. అయితే ఈ సినిమాలతో పాటు ప్రభాస్.. బాలీవుడ్ యాక్షన్ మూవీస్ డైరెక్టర్ సిద్ధార్థ్ ఆనంద్ దర్శకత్వంలో ఓ సాలిడ్ యాక్షన్ మూవీ ప్లాన్ చేశాడు. ఈ సినిమాలో ప్రభాస్ హీరోయిన్‌గా బాలీవుడ్ సుందరి కత్రినా కైఫ్ నటించనున్నట్లు టాక్.