హీరో నితిన్ కెరీర్‌లో అత్యంత ప్రతిష్టాత్మకంగా రూపొందుతున్న చిత్రం ‘మ్యాస్ట్రో’. నితిన్ 30వ మూవీగా తెరకెక్కుతోన్న ఈ సినిమాకు మేర్లపాక గాంధీ దర్శకత్వం వహిస్తున్నాడు. ఈ క్రైమ్ కామెడీ చిత్రంలో నభా నటేష్ హీరోయిన్‌గా నటిస్తుండగా హీరోయిన్ తమన్నా కీలక పాత్ర పోషిస్తోంది. ప్రస్తుతం ‘మ్యాస్ట్రో’ సినిమా చిత్రీకరణ తుదిదశకు చేరుకుంది. ఈ సినిమా ఫైనల్ షెడ్యూల్ చిత్రీకరణ సోమవారం హైదరాబాద్‌లో మొదలైంది. హీరో నితిన్, తమన్నాలపై కీలక సన్నివేశాలను చిత్రీకరిస్తున్నాడు దర్శకుడు మేర్లపాక గాంధీ. ఈ షెడ్యూల్ చిత్రీకరణతో ‘మ్యాస్ట్రో’ సినిమా షూటింగ్ పూర్తవుతుంది. కోవిడ్ సెకండ్ వేవ్ తర్వాత చిత్రీకరణను మొదలుపెట్టిన బిగ్ మూవీ ‘మ్యాస్ట్రో’నే కావడం విశేషం. ఇప్పటికే నితిన్ బర్త్ డే సందర్భంగా విడుదల చేసిన ఈ సినిమా ఫస్ట్‌లుక్, టీజర్‌కు ప్రేక్షకుల నుంచి విశేష స్పందన లభించింది. మహతి స్వరసాగర్ ఈ సినిమాకు సంగీతం అందిస్తున్నాడు. శ్రేష్ఠ్ మూవీస్ పతాకంపై రాజ్ కుమార్ ఆకేళ్ళ సమర్పణలో ఎన్.సుధాకర్‌రెడ్డి, నిఖితా రెడ్డి ఈ చిత్రాన్ని నిర్మిస్తున్నారు.