మన తెలంగాణ/హైదరాబాద్: తమిళనాడు రాజధాని చెన్నై వేదికగా జరుగనున్న జాతీయ స్థాయి బీచ్ రెజ్లింగ్ చాంపియన్‌షిప్‌లో పాల్గొనే తెలంగాణ జట్లను ఎంపిక చేశారు. మహిళలు, పురుషుల విభాగంలో తెలంగాణ జట్లు ఈ పోటీల్లో తలపడనున్నాయి. రాష్ట్ర బీచ్ రెజ్లింగ్ సంఘం ఆధ్వర్యంలో జట్ల ఎంపిక జరిగింది. పురుషుల విభాగంలో జైద్ బమాస్, హంజా బదర్ బమాస్, అబ్రార్ అహ్మద్ ఖాన్‌లను ఎంపిక చేశారు. ఇక మహిళల విభాగంలో రోహిణి, కరుహ్యా, శివాణిలు ఎంపికయ్యారు. కాగా ఈ నెల 29 నుంచి చెన్నైలో ఈ పోటీలు జరుగనున్నాయి. ఇక జాతీయ పోటీలకు ఎంపికైన క్రీడాకారులను రాష్ట్ర రెజ్లింగ్ సంఘం అధ్యక్షుడు హంజా బిన్ ఉమర్ జాఫర్, ఆర్గనైజింగ్ సెక్రటరీ ఎండి అస్లం, సంయుక్త కార్యదర్శి మోయిన్ ఖాన్ తదితరులు అభినందించారు. రాష్ట్ర క్రీడాకారులు అద్భుత ప్రతిభతో పతకాలు సాధించాలని వారు ఆకాంక్షించారు. ఇక జాతీయ పోటీలకు ఎంపికైన రెజ్లర్లను శుక్రవారం ఏర్పాటు చేసిన ఓ కార్యక్రమంలో సత్కరించారు.