హైదరాబాద్ విజయం
మన తెలంగాణ/హైదరాబాద్: బిసిసిఐ ఆధ్వర్యంలో జరుగుతున్న వినుమన్కడ్ అండర్19 క్రికెట్ టోర్నమెంట్‌లో హైదరాబాద్ శుభారంభం చేసింది. అహ్మదాబాద్‌లోని నరేంద్ర మోడీ క్రికెట్ స్టేడియంలో జరిగిన మ్యాచ్‌లో హైదరాబాద్ మూడు వికెట్ల తేడాతో రాజస్థాన్‌ను ఓడించింది. ముందుగా బ్యాటింగ్ చేసిన రాజస్థాన్ 45 ఓవర్లలో ఏడు వికెట్ల నష్టానికి 260 పరుగులు చేసింది. ఎజి చౌహాన్ శతకంతో కదం తొక్కాడు. కీలక ఇన్నింగ్స్ ఆడిన చౌహాన్ 102 పరుగులు చేశాడు. తర్వాత బ్యాటింగ్‌కు దిగిన హైదరాబాద్ ఏడు వికెట్లు కోల్పోయి విజయాన్ని అందుకుంది. వర్షం వల్ల డక్‌వర్త్ లూయిస్ పద్ధతిలో ఫలితాన్ని తేల్చారు. కీలక ఇన్నింగ్స్ ఆడిన తిలక్ వర్మ 156 పరుగులతో నాటౌట్‌గా నిలిచి హైదరాబాద్‌ను గెలిపించాడు. వర్షం వల్ల హైదరాబాద్ లక్ష్యాన్ని 41 ఓవర్లలో 245 పరుగులకు కుదించారు. కెప్టెన్సీ ఇన్నింగ్స్‌తో అలరించిన తిలక్ అజేయ శతకం సాధించి హైదరాబాద్‌కు విజయం సాధించి పెట్టాడు.