ఐదుగురి మృతి..16 మందికి గాయాలు
గువాహటి: మేఘాలయ రాష్ట్ర రోడ్డు రవాణా సంస్థకు చెందిన బస్సు గురువారం తెల్లవారుజామున నదిలో పడిపోయి ఐదుగురు మరణించగా మరో 16 మంది గాయపడ్డారు. తుర నుంచి రాష్ట్ర రాజధాని షిల్లాంగ్ వెళుతున్న నైట్ సూపర్ లగ్జరీ బస్సు తూర్పు గరో హిల్స్ జిల్లాలోని రింగ్డి నదిలో పడిపోవడంతో అందులో ప్రయాణిస్తున్న ఐదుగురు ప్రయాణికులు అక్కడికక్కడే మరణించినట్లు సీనియర్ పోలీసు అధికారి ఒకరు తెలిపారు. గాయపడిన వారిని వెంటనే రోంగ్‌జెంగ్ ప్రాథమిక ఆరోగ్య కేంద్రానికి తరలించారు. తీవ్రంగా గాయపడిన వారిని అక్కడి నుంచి విలియంనగర్‌లోని ప్రభుత్వ ఆసుపత్రికి తరలించామని ఆయన చెప్పారు. బస్సు ప్రమాదానికి లోనైన సమయంలో ప్రయాణికులంతా గాఢ నిద్రలో ఉన్నారని, మృతులలో బస్సు డ్రైవర్ కూడా ఉన్నారని ఆయన చెప్పారు. బస్సు ప్రమాదంపై మేఘాలయ ముఖ్యమంత్రి కాన్రాడ్ కె సంగ్మా తీవ్ర విచారం వ్యక్తం చేశారు. మృతుల కుటుంంబాలకు ప్రగాఢ సంతాపాన్ని ఆయన ప్రకటించారు. గాయపడిన వారు త్వరితంగా కోలుకోవాలని ఆయన ఆకాంక్షించారు.