శాంటియాగో: ప్రతిష్టాత్మకమైన శాంటియాగో ఓపెన్ టెన్నిస్ టోర్నమెంట్‌లో నార్వే ఆటగాడు కాస్పర్ రూడ్ టైటిల్‌ను సాధించాడు. ఫైనల్లో రెండో సీడ్ రూడ్ బ్రిటన్‌కు చెందిన కామెరూన్ నొరిను ఓడించాడు. ఆరంభం నుంచే దూకుడుగా ఆడిన రూడ్ అలవోక విజయంతో టైటిల్‌ను సొంతం చేసుకున్నాడు. ఈ మ్యాచ్‌లో రూడ్ ధాటికి నొరి కనీస పోటీ కూడా ఇవ్వకుండానే చేతులెత్తేశాడు. అద్భుత షాట్లతో విరుచుకు పడిన రూడ్ సునాయాసంగా రెండు సెట్లను గెలిచి టైటిల్‌ను దక్కించుకున్నాడు. ఆట ప్రారంభం నుంచే రూడ్ ఆధిపత్యం చెలాయించాడు. ప్రత్యర్థిక ఏమాత్రం అవకాశం ఇవ్వకుండా ఆడుతూ 60, 62తో వరుసగా రెండు సెట్లను గెలిచి మ్యాచ్‌ను కైవసం చేసుకున్నాడు. ఈ విజయంతో రూడ్ తాజా పురుషుల ర్యాంకింగ్స్‌లో 8వ ర్యాంక్‌కు దూసుకెళ్లాడు. కాగా బల్గేరియా వేదికగా జరిగిన ప్రతిష్టాత్మకమైన సోఫియా ఓపెన్ టెన్నిస్ టోర్నమెంట్‌లో ఇటలీకి చెందిన టాప్ సీడ్ జన్నిక్ సిన్నర్ టైటిల్ సాధించాడు. ఫైనల్లో ఫ్రాన్స్ ఆటగాడు మోన్‌ఫిల్స్‌ను ఓడించి సిన్నర్ వరుసగా రెండో ఏడాది కూడా సోఫియా ఓపెన్ సొంతం చేసుకున్నాడు.
Casper Ruud won Santiago Open 2021 Title