పాక్ గెలుపు సంబర సంబంధం
ఆగ్రా : స్థానిక పోలీసులు కశ్మీర్‌కు చెందిన ఇక్కడి ముగ్గురు ఇంజనీరింగ్ విద్యార్థులపై కేసులు నమోదు చేశారు. టి 20 వరల్డ్ కప్ క్రికెట్ మ్యాచ్‌లో పాకిస్థాన్ విజయం తరువాత వీరు సంబరాలు చేసుకున్నట్లు అభియోగాలు ఉన్నాయి. సంబంధిత వేడుకలను తెలిపే వాట్సాప్ పోస్టింగ్‌ల ప్రాతిపదికన వీరిపై ఆగ్రాపోలీసులు ఎఫ్‌ఐఆర్‌లు దాఖలు చేశారని అధికారులు తెలిపారు. ఈ విద్యార్థులు స్థానిక రాజా బల్వంత్ సింగ్ కాలేజీలో సాంకేతిక విద్యను అభ్యసిస్తున్నారు. వీరిపై విద్వేష చర్యలకు పాల్పడే యత్నాలు, ప్రజల్లో కలవరం కల్గించే చర్యలకు సంబంధించిన ఐపిసి సెక్షన్‌లు 153 ఎ , ఇతర నిబంధనల పరిధిలో కేసులు దాఖలు అయ్యాయని ఇక్కడి జగదీష్‌పురా పోలీసు స్టేషన్ అధికారులు ధృవీకరించారు. ఈ విద్యార్థులపై కఠిన చర్యలు తీసుకోవాలని మితవాద సంస్థలతో పాటు పలు సంఘాలు బుధవారం కలెక్టరేట్ ఆవరణలో నిరసనలకు దిగాయి.