సింహంతో సవాల్..!

జూపార్కులో లయన్ మోట్ గోడ ఎక్కిన సాయికుమార్
సందర్శకునిలా ప్రవేశించి సింహంతో చెలగాటమాడేందుకు ప్రయత్నం
సందర్శకుల కేకలు, సిబ్బంది అప్రమత్తతో ఆకతాయి క్షేమం
బహదూర్‌పురా పోలీసులకు అప్పగింత

మన తెలంగాణ / రాజేంద్రనగర్ : జూపార్కులోని సింహం నోట్లో తలపెట్టాలనుకున్నాడో ఆకతాయి. ఏకంగా లయన్ మోట్ గోడపైకి క్షణాల్లో ఎక్కి ప్రదర్శనలో ఉన్న మనోహర్ అనే ఆఫ్రికన్ సింహాన్ని రమ్మన్నట్లు దా నితో కొద్ది సేపు ఆటాడుకునే ప్రయత్నం చేశాడు. జూ సిబ్బంది సమయ స్ఫూర్తితో వ్యవహారించి అతన్ని సింహం బారిన పడకుండా ప్రాణాలతో రక్షించారు. తీవ్ర కలకలం సృష్టించిన ఈసంఘటన మంగళవారం నగరంలోని నెహ్రూ జూలాజికల్ పార్కులో జరిగింది. జూ సిబ్బంది, పలువురు సందర్శకుల కథనం ప్రకారం.. మల్లాపూర్‌కు చెందిన జి.సాయికుమార్ (31) వన్య ప్రాణులను తిలకించేందుకు జూపార్కు వచ్చాడు. సాయంత్రం 3.30 ప్రాంతంలో లయన్ మోట్ ఏరియాకు చేరుకున్న సాయి కుమార్ తోటి సందర్శకులతో సింహాలను తిలకిస్తూనే ఉన్నట్టుండి లయన్ మోట్ గోడపైకి ఎక్కాడు. గోడ మధ్యభాగానికి చేరుకున్న సాయికుమార్‌ను పసిగట్టిన మనోహర్ అనే మగ సింహం తన ఆవాసంలోకి కొత్త వ్యక్తి రావడం చూసి గాండ్రించడం మొదలు పెట్టింది. దాంతో అక్కడే మనోహర్‌ను తిలకిస్తున్న పలువురు సందర్శకులు పెద్ద కేకలు వేశారు. అప్పటికే అప్రమత్తమైన జూ సిబ్బంది వెనుకభాగం నుంచి గోడపైకి చేరుకుని సాయికుమార్‌ను కిందకు దింపారు. అయితే సాయికుమార్ సింహంతో మాట్లాడుతున్నట్లు నటించి దాన్ని రెచ్చగొట్టే ప్రయత్నం చేయడంతో సింహం పైకి ఎగిరి కోపంతో పంజా విసిరింది. కానీ గోడ చాలా ఎత్తుగా ఉండడంతో సింహం పంజాకు అతను అందలేదు. ప్రత్యేక పద్ధతిన నిర్మించిన మోట్ గోడలు బండరాళ్లను ఒక దానిపై ఒకటి పెర్చిన విధంగా ఉండడంతో అతను ఎక్కడ జారి మోట్‌లో పడుతాడోనని సందర్శకులు హైరానా పడ్డారు.

మనోహర్ జూ బిడ్డె

సందర్శకుడు నోట్ల తలపెట్టెలా వ్యవహరించిన సింహాం మనోహర్ ఆఫ్రికన్ జాతికి చెందినది అయిన అది జూపార్కులోనే పురుడుపోసుకుంది. ఆరేళ్లుగా సందర్శకులను కనువింధు చేస్తుంది. 2013లో సౌది రాజు కానుకగా ఇచ్చిన ఒక జంట ఆఫ్రికన్ సింహాల బిడ్డనే మనోహర్. కా గా, మనోహర్‌తో పాటు మరో నాలుగు ఆఫ్రికన్ సింహాలతో కలిపి మొత్తం ఆరు ఆ జాతి సింహాలు జూపార్కులో ఉన్నాయి. జూ సిబ్బంది సురక్షితంగా తమ అదుపులోకి తీసుకున్న సాయికుమార్‌ను అనంతరం బహదూర్‌పురా పోలీసులకు అప్పగించారు.
గతంలోనూ ఇదే మోట్‌లో దూకిన వ్యక్తి
గతంలో కూడా ఆఫ్రికన్ సింహాల మోట్‌లోకి ఓ వ్యక్తి మద్యం మత్తులో దూకాడు. మోట్‌లోని నీటిలో ఈదుతూ సింహాల దగ్గరకు వెళ్లె ప్రయత్నం చేసిన సంఘటన అప్పట్లో దేశవ్యాప్తంగా కలకలం రేపింది. తాజాగా మంగళవారం కూడా అదే మోట్ వద్ద అలాంటి ఘటన పునరావృతం కావడం అధికారులను ఆందోళన చెందేలా చేసిందనే చెప్పాలి.