ఉన్నప్పుడే ఎంజాయ్ చేయాలి

రాజ్‌తరుణ్ హీరోగా శ్రీను గవిరెడ్డి దర్శకత్వంలో రూపొందుతోన్న అవుట్ అండ్ అవుట్ ఎంటర్‌టైనర్ ‘అనుభవించు రాజా’. ఈ చిత్రాన్ని అన్నపూర్ణ స్టూడియోస్ ప్రై.లి., శ్రీవెంకటేశ్వర సినిమాస్ ఎల్‌ఎల్‌పి సంయుక్తంగా నిర్మిస్తున్నాయి. ఈ చిత్రానికి సుప్రియ యార్లగడ్డ నిర్మాతగా వ్యవహరిస్తున్నారు. ఈనెల 26న ఈ సినిమా విడుదల కాబోతోంది. ఈ సందర్భంగా డైరెక్టర్ శ్రీను గవిరెడ్డి విలేకరుల సమావేశంలో మాట్లాడుతూ “ప్రతి మనిషిలోనూ ఓ అనుభవించు రాజా ఉంటాడు. డబ్బు, అమ్మాయిలు, సినిమా… ఇలా ఒక్కొక్కరికీ ఒక్కో స్టైల్లో ఇష్టం ఉంటుంది. లైఫ్ చాలా చిన్నది.. ఉన్నప్పుడే ఎంజాయ్ చేయాలనేది ఈ స్టోరీ. నిజంగా అనుభవించడం ఏంటి? అనేది చెప్పేదే ఈ సినిమా. సెక్యూరిటీ గార్డ్ నేపథ్యంలో చెప్పిన కథ రాజ్ తరుణ్‌కి బాగా నచ్చింది. ఇంత వరకు చూపించని బ్యాక్‌గ్రౌండ్. ఒరిజినల్‌గా సెక్యూరిటీ క్యాంప్‌కు వెళ్లి అక్కడే షూటింగ్ చేశాం. కర్లీ హెయిర్ అనే ట్రాక్ ఉంటుంది. అందుకే కశిష్ ఖాన్‌ను తీసుకున్నాం. ఈ సినిమాను నాగచైతన్య చూసి మెచ్చుకున్నారు”అని అన్నారు.