శ్రీదేవి, భూదేవి సహిత వెంకటేశ్వరస్వామి ఉత్సవమూర్తులు
విశాఖపట్నం : ఆర్‌.కె.బీచ్‌ ఆవరణలో టిటిడి ఆధ్వర్యంలో కార్తీక మహా దీపోత్సవం సోమవారం ఘనంగా నిర్వహించనున్నట్లు పైడా కళాశాలల అధినేత పైడా కృష్ణప్రసాద్‌ తెలిపారు. విలేకరుల సమావేశంలో ఆయన మాట్లాడారు. సోమవారం సాయంత్రం 6.30 గంటల నుంచి కార్తీక మహాదీపోత్సవ కార్యక్రమాలు మొదలవుతాయన్నారు. వేదఘోష, విష్ణుసహస్రనామం, లక్ష్మీ సహస్రనామం అనంతరం దీపోత్సవ కార్యక్రమం జరుగుతుందన్నారు. భక్తులకు పూజా సామగ్రి ఉచితంగా అందిస్తామన్నారు. టిటిడి ఛైర్మన్‌ వై.వి.సుబ్బారెడ్డి, ముఖ్య కార్యనిర్వహణాధికారి జవహర్‌రెడ్డి, శారదా పీఠాధిపతులు స్వరూపానందేంద్ర సరస్వతి హాజరవుతున్నట్టు తెలిపారు. సుమారు 5 వేల మంది వస్తారని భావిస్తున్నామన్నారు. భక్తులు ఎంవిపి కాలనీ టిటిడి ఈ-కౌంటర్‌ ద్వారా పాస్‌లు తీసుకోవాలన్నారు. కార్తీక దీపోత్సవ కమిటీ అధ్యక్షులు గ్రంధి రాజేష్‌, కార్యదర్శి కె.వి.ఎస్‌.కె.ప్రసాద్‌, కోశాధికారి వి.సీతారాం, కమిటీ సభ్యులు గ్రంధి రాంజీ, పి.ఎస్‌.ఎన్‌.మూర్తి, భక్తిచానల్‌ సిఇఒ సురేష్‌ పాల్గొన్నారు.