1000 ఎకరాలు దత్తత
బిగ్‌బాస్ టీవీ షో వేదికగా ఎంపి జోగినపల్లి
సంతోష్‌కుమార్ సమక్షంలో నటుడు నాగార్జున ప్రకటన
ప్రతిఒక్కరూ మూడు మొక్కలు నాటి ఈ ఏడాదికి చక్కటి
ముగింపునివ్వాలని పిలుపు గ్రీన్ ఇండియా ఛాలెంజ్‌లో
భాగంగా ఇప్పటివరకు 16కోట్ల మొక్కలు నాటాం :
ఎంపి సంతోష్, గ్రీన్ ఇండియా ఛాలెంజ్ ప్రమోషన్‌కు
అద్భుతమైన షోలో అవకాశం కల్పించినందుకు కృతజ్ఞతలు
బిగ్‌బాస్ వేదికగా ఎంపి సంతోష్ సమక్షంలో నటుడు నాగార్జున ప్రకటన
రిజర్వ్ ఫారెస్ట్ దత్తతకు ముందుకొచ్చిన కింగ్
ప్రతి ఒక్కరు ఈ మూడు వారాలు మూడు మొక్కలు నాటి 2021కి ముగింపునివ్వాలని పిలుపు
బిగ్ బాస్ హౌస్‌లో గ్రీన్ ఇండియా ఛాలెంజ్ మొక్క
కోట్లాది మొక్కలు నాటిన సంతోష్ కుమార్‌కు అభినందనలు
మనతెలంగాణ/హైదరాబాద్ : తెలుగు టీవీ ప్రేక్షకులను అలరిస్తున్న టీవీషో బిగ్ బాస్ సీజన్5లో గ్రీన్ ఇండియా ఛాలెంజ్ నినాదం మార్మోగింది. యువ ప్రతిభావంతులైన నటులకు, వారి ప్రజ్ఞాపాటవాలకు ముగ్ధులవుతున్న కోట్లాదిమంది ప్రజానీకానికి ఒక మంచి సందేశం అందించాలనే ఉద్దేశంతో నిర్వాహకులు గ్రీన్ ఇండియా ఛాలెంజ్‌ను భాగం చేశారు. పచ్చదనమే రేపటి ప్రగతి పథమని ప్రపంచానికి చాటి చెప్పారు. ఈ సందర్భంగా బిగ్ బాస్ హౌస్‌లో గ్రీన్ ఇండియా ఆధ్యులు, రాజ్యసభ సభ్యులు జోగినిపల్లి సంతోష్‌కుమార్, హోస్జ్ నాగార్జున మధ్య ఆదివారంనాటి ఎపిసోడ్‌లో ఆసక్తికరమైన సంభాషణ కొనసాగింది. మీరు ఇప్పటి వరకు ఓ మూడు కోట్ల వరకు మొక్కలు నాటారా..? అంటూ హోస్ట్ నాగార్జున అడగ్గానే, చిన్న చిరునవ్వుతో… 16 కోట్ల మొక్కలు నాటామని బదులిచ్చారు గ్రీన్ ఇండియా ఛాలెంజ్ సృష్టికర్త జోగినిపల్లి సంతోష్ కుమార్.
ఇలా ఇద్దరి మధ్య జరిగిన సంభాషణలతో బిగ్ బాస్ హౌస్ ఒక చక్కటి సందేశాన్ని బుల్లితెర ప్రేక్షకులకు అందించింది. ఈ సంవత్సరం ముగిసిపోవడానికి ఇంకా మూడు వా రాల సమయం ఉందని.. ఇప్పటి వరకు ఎన్నో చేసుం టాం కానీ, ఈ మూడు వారాలు.. వారానికి ఒకటి చొప్పు న మూడు మొక్కలు నాటి 2021కి మంచి ఫినిషింగ్ ఇవ్వాలని నాగార్జున కంటెస్టెంట్స్‌కి, ప్రేక్షకులకు పిలుపునిచ్చారు.అంతేకాదు మొక్కలు నాటడమే ఒక కార్యక్రమంగా పెట్టుకొని కోట్లాది మొక్కలు నాటించిన గ్రీన్ ఇం డియా ఛాలెంజ్ సృష్టికర్త, రాజ్యసభ సభ్యులు జోగినిపల్లి సంతోష్ కుమార్‌ను బిగ్ బాస్ స్టేజిపైకి ఆహ్వానించారు.
జోగినిపల్లిని అభినందించిన నాగార్జున
గత నాలుగైదు సంవత్సరాలుగా, మొక్కలు నాటడం, నాటించడం ఒక దినచర్యగా పెట్టుకొని కోట్లది మొక్కలు నాటారు.. నిజంగా మీ కృషికి హ్యాట్సఫ్ సర్ అంటూ జోగినిపల్లి సంతోష్ కుమార్‌ను కింగ్ నాగార్జున అభినందించారు. ఒక్క మనిషి తన ఆలోచనతో, ప్రకృతి బావుండాలనే తపనతో కోట్లాది మొక్కలు నాటితే.. బిగ్ బాస్ హౌస్ పిలునిస్తే ఇంకా ఎన్ని కోట్ల మొక్కలు నాటొచ్చో ఊహించుకోండని నాగార్జున ప్రేక్షకులను కదిలించే ప్రయత్నం చేశారు. గ్లోబల్ వార్మింగ్‌ను అరికట్టి భవిష్యత్ తరాలు ఈ భూమిపై మనుగడ సాగించాలంటే.. మొక్కలు నాటడం ఒక్కటే మార్గమని నాగార్జున ప్రేక్షకులకు సూచించారు.
నిరంతరం మొక్కల యజ్ఞం చేస్తున్నాం : సంతోష్
ప్రతి ఒక్కరికి మొక్కలు నాటాలి, కాపాడాలి అనే ఆలోచనను కలిగించాలని గ్రీన్ ఇండియా ఛాలెంజ్ కార్యక్రమం తీసుకున్నామని జోగినిపల్లి సంతోష్ కుమార్ తెలిపారు. ఒకచోట ఒకరు ఒకటి రెండు మొక్కలు నాటారు, మరో చోట టీంలుగా కొంతమంది కలిసి మొక్కలు నాటారని అన్నారు. ఇక స్టార్స్, సెలెబ్రెటీలు అయితే ఫారెస్ట్‌లను దత్తత తీసుకున్నారని పేర్కొన్నారు. ప్రభాస్‌ను తీసుకుంటే 1,643 ఎకరాలు, హెటిర్ డ్రగ్స్ పార్ధసారథి రెడ్డి 2,500 ఎకరాల అడవులను దత్తత తీసుకొని మొక్కల్ని పెంచుతున్నారని చెప్పారు. తాము నిరంతరం మొక్కల యజ్ఞం చేస్తున్నామని… శక్తి ఉన్నంతవరకు ఈ కార్యక్రమాన్ని ముందుకు తీసుకెళ్తునే ఉంటామని వెల్లడించారు. తమ ఈ ప్రయత్నం ఇవ్వాల మీ ద్వారా కోట్లమందికి చేరిందని అన్నారు. ఇంత అద్భుతమైన షోలో తమ గ్రీన్ ఇండియా ఛాలెంజ్‌కు భాగస్వామ్యం కల్పించిన నాగార్జునకు, స్టార్ మాకు, బిగ్ బాస్ నిర్వాహకులకు, కంటెస్టెంట్స్‌కు, టెక్నిషీయన్లకు సంతోష్‌కుమార్ కృతజ్ఞతలు తెలిపారు.