దీన్ని నేల మాస్ అనొచ్చు

చాలా కష్టపడ్డా…
బ్లాక్‌బస్టర్ మూవీ ‘అల వైకుంఠపురములో’ విడుదలై దాదాపు రెండేళ్లవుతోంది. మళ్ళీ 23 నెలలు తర్వాత ‘పుష్ప’ సినిమా తో ప్రేక్షకుల ముందుకు వస్తున్నాను. ఈ సినిమాలోని పుష్పరాజ్ పాత్ర కోసం చాలా కష్టపడ్డాను. ఈ పాత్ర మేకప్ వేసుకునేందుకు రెండు గంటలు, తీసివేసేందుకు 40 నిమిషాల సమయం పట్టేది. నా కెరీర్‌లోనే ఓ స్పెషల్ మూవీగా ‘పుష్ప’ నిలుస్తుంది.
ఇబ్బందుల మధ్య పనిచేశాము..
మారేడుమిల్లి అడవిలో షూటింగ్ చేస్తున్నప్పుడు మేము చాలా కష్టపడాల్సి వచ్చింది. అక్కడ ఫారెస్ట్‌లో షూట్ చేయడం చాలా కష్టమనిపించింది. పురుగులు బాగా ఉండేవి. అవి వంటి మీద పడకుండా జాగ్రత్తగా చూసుకుంటూ వర్క్ చేయాల్సి వచ్చింది. 200 కార్లు , అలాగే లారీలు ఇలా అన్నీ ఉండేవి. కొన్నిసార్లు వర్షం పడుతుండేది. ఇలా చాలా ఇబ్బందుల మధ్య పనిచేశాము.
మూడు వేరియేషన్స్..
సుకుమార్ అండ్ టీం ఈ సినిమా కోసం చాలా రీసెర్చ్ చేశారు. రియల్ స్మగ్లర్స్ చెప్పిన విషయాలతో కొన్ని వీడియోస్ చూశారు. నేను కూడా కొన్ని వీడియోస్ చూశాను. వాళ్ళు ఎలా మాట్లాడతారు ? ఎలా ప్రవర్తిస్తారు? అనేది బాగా హోం వర్క్ చేశాను. ఇక ముంబయ్ నుండి ఒక స్పెషల్ టీమ్ వచ్చి నా లుక్ డిజైన్ చేశారు. రెండు సార్లు కుదరలేదు, మూడో సారి సెట్ అయింది. సినిమాలో నాకు మూడు లుక్స్ ఉంటాయి. కూలీ లుక్ , ట్రాన్స్ పోర్ట్ లుక్ , ఫైనల్‌గా స్మగ్లర్ లుక్. ఇలా నా క్యారెక్టర్‌లో మూడు వేరియేషన్స్ కనిపిస్తాయి.
ఫిక్షనల్ స్టోరీ..
ఈ సినిమా పూర్తి ఫిక్షన్ కథతో తెరకెక్కింది. ఎలాంటి యదార్థ సంఘటనలు ఇందులో కనిపించవు. శేషాచలం అడవి నేపథ్యంలో ఎర్ర చందనం స్మగ్లింగ్ మీద జరిగే కథ ఇది. అన్ని పాత్రలు సృష్టించినవే తప్ప రియల్ క్యారెక్టర్స్ ఏమీ లేవు. ఇది ‘పుష్ప’ అనే వ్యక్తి ప్రయాణంతో తెరకెక్కిన సినిమా.
చిత్తూరు యాస నేర్చుకున్నా..
ఈ సినిమా కోసం చిత్తూరు యాస నేర్చుకున్నాను. సుకుమార్ సెట్‌లోకి వచ్చాక డైలాగ్స్ మారుస్తుంటారు. అప్పటికప్పుడు ఏది చెప్పినా, ఏం డైలాగ్ ఇచ్చినా చెప్పేసే లెవెల్ వరకూ నేర్చుకున్నాను. దాని వల్ల చిత్తూరు యాసలో డైలాగ్స్ చెప్పడం చాలా ఈజీ అయిపోయింది.
ఇంతకంటే మాస్ చేయలేను..
ఇప్పటి వరకూ నేను మాస్, ఊర మాస్ క్యారెక్టర్ చేశాను. కానీ పుష్పరాజ్ అనేది నేల మాస్ అనొచ్చు. ఇంక ఇంతకంటే మాస్ చేయలేను అన్నట్టుగా ఈ సినిమా చేశాను. రిలీజ్ తర్వాత మాస్ ఆడియన్స్‌కి పుష్పరాజ్ బాగా కనెక్ట్ అవుతాడు.