లండన్: బ్రిటీష్ రచయిత సల్మాన్ రష్దీ ఇరాన్ నుంచి చంపివేత బెదిరింపులు ఎదుర్కొన్నారు. న్యూయార్క్ లో శుక్రవారం జరిగిన ఒక సాహిత్య కార్యక్రమంలో పదేపదే కత్తిపోటుకు గురైన తరువాత ఆయన ప్రస్తుతం వెంటిలేటర్ పై ఉన్నారు. ఆయన ఈ ఘటనలో ఓ కన్నును కోల్పోవచ్చని తెలుస్తోంది. దాడి తర్వాత స్థానిక కాలమానం ప్రకారం ఉదయం 11:00 గంటల ముందు రష్దీకి అత్యవసర శస్త్రచికిత్స కోసం ఆసుపత్రికి ఎయిర్‌లిఫ్ట్ చేయబడ్డాడు. అతని ఏజెంట్ ‘ది న్యూయార్క్ టైమ్స్’ కు తెలిపిన దాంట్లో “వార్త మంచిది కాదు” అని చెప్పాడు. “సల్మాన్ ఒక కన్ను కోల్పోయే అవకాశం ఉంది; అతని చేతి నరాలు తెగిపోయాయి;అతని కాలేయం దెబ్బతింది” అని ఏజెంట్ ఆండ్రూ వైలీ చెప్పాడు. ప్రస్తుతానికి రష్దీ మాట్లాడలేడని కూడా చెప్పాడు.
న్యూయార్క్ రాష్ట్ర పోలీసులు దాడికి పాల్పడిన నిందితుడిని న్యూజెర్సీలోని ఫెయిర్‌ఫీల్డ్‌కు చెందిన 24 ఏళ్ల హాదీ మాతర్‌గా గుర్తించారు. అయితే అతడి దాడి వెనుక కారణం మాత్రం ఇంకా తెలియలేదు. బఫెలో నగరానికి దక్షిణంగా 70 మైళ్ల (110 కిలోమీటర్లు) దూరంలో ఉన్న లేక్‌సైడ్ కమ్యూనిటీలో కళా కార్యక్రమాలను నిర్వహించే చౌటౌక్వా ఇన్‌స్టిట్యూషన్‌లో ఈ దాడి జరిగింది. ఈ కార్యక్రమానికి హాజరైన అమెరికన్ యూనివర్శిటీ రాజకీయాల ప్రొఫెసర్ కార్ల్ లెవాన్ ఏఎఫ్ పి వార్తా సంస్థతో మాట్లాడుతూ, అనుమానితుడు రష్దీ కూర్చున్న వేదికపైకి పరుగెత్తుకెళ్లి “అతన్ని పదే పదే దారుణంగా పొడిచాడు” అని వివరించారు.
75 ఏళ్ల రష్దీ 1981లో తన రెండవ నవల “మిడ్‌నైట్స్ చిల్డ్రన్”తో అందరి దృష్టినీ ఆకర్షించాడు, ఇది స్వాతంత్య్రానంతర భారతదేశాన్ని చిత్రించినందుకు అంతర్జాతీయ ప్రశంసలు, బ్రిటన్ యొక్క ప్రతిష్టాత్మక ‘బుకర్ ప్రైజ్‌’ని గెలుచుకుంది. కానీ అతని 1988 పుస్తకం ‘ది సాటానిక్ వెర్సెస్’ ఇరాన్ విప్లవ నాయకుడు అయతుల్లా రుహోల్లా ఖొమేని ఆగ్రహానికి గురైంది. అంతేకాక రష్దీ మరణానికి పిలుపునిస్తూ ఫత్వా లేదా మతపరమైన డిక్రీని జారీ చేయడంతో చాలా మంది దృష్టిని ఆకర్షించింది. ఈ నవలను కొంతమంది ముస్లింలు మహమ్మద్ ప్రవక్త పట్ల అగౌరవంగా భావించారు.
మతాచారాలు పాటించని ముస్లిం కుటుంబంలో రష్దీ జన్మించాడు. నాస్తికుడిగా గుర్తింపు పొందాడు. అతడిపై బహుమానం ప్రకటించడంతో అజ్ఞాతంలోకి వెళ్లిపోయాడు. దశాబ్ద కాలంగా అతడు అజ్ఞాతంలోనే ఉన్నాడు. అతడికి బ్రిటన్ పోలీస్ రక్షణను కూడా కల్పించింది. ప్రస్తుతం ఆయన న్యూయార్క్ లో ఉంటున్నాడు.