ముంబై : గత కొద్ది నెలలుగా నష్టాల్లో ఉండడంతో మ్యూచువల్ ఫండ్స్ నుంచి ఇన్వెస్టర్లు పెట్టుబడులను ఉపసంహరించుకున్నారు. పెట్టుబడిదారులు వరుసగా మూడో త్రైమాసికంలో మ్యూచువల్ ఫండ్ల నుండి ఉపసంహరించుకోవడం కొనసాగించారు. అధిక ద్రవ్యోల్బణం, పెరుగుతున్న పాలసీ రేట్ల కారణంగా ఏప్రిల్-జూన్ త్రైమాసికంలో పెట్టుబడిదారులు మ్యూచువల్ ఫండ్స్ నుండి రూ.70,000 కోట్లకు పైగా వెనక్కి తీసుకున్నారు. మ్యూచువల్ ఫండ్ కంపెనీల సంఘం అయిన ఎఎంఎఫ్‌ఐ ప్రకారం, డెట్ ఫిక్స్‌డ్ ఇన్‌కమ్ ఫండ్స్ కోసం ఫండ్ మేనేజర్‌లు నిర్వహించే ఆస్తులు జూన్ చివరినాటికి 5 శాతం క్షీణించి రూ.12.35 లక్షల కోట్లకు పడిపోయాయి. మార్చి చివరి నాటికి రూ.13 లక్షల కోట్లుగా ఉన్నాయి. 2021-22 ఆర్థిక సంవత్సరం మొదటి త్రైమాసికంలో ఫిక్స్‌డ్ ఇన్‌కమ్ కేటగిరీ కింద నిర్వహణలో ఉన్న ఆస్తులు రూ. 14.16 లక్షల కోట్ల ఆల్‌టైమ్ గరిష్ఠ స్థాయికి చేరుకున్నాయి, అయితే అప్పటి నుంచి క్షీణిస్తూనే ఉన్నాయి. డెట్ మ్యూచువల్ ఫండ్స్ నుండి రూ.70,213 కోట్ల నికర ప్రవాహం ఉంది.