హెచ్‌ఐవి (human immunodefeciency virus) వ్యాధిని హైడ్రొజన్ సల్ఫైడ్ గ్యాస్ ( h2s) అణచి వేస్తుందని బెంగళూరుకు చెందిన పరిశోధకులు కనుగొన గలిగారు. హైడ్రొజన్ సల్ఫైడ్ గ్యాస్‌ను ఎక్కువ చేస్తే మానవ కణాల్లో హైఐవి వైరస్ బ్యాక్టీరియా రెట్టింపు కాకుండా నివారిస్తుందని తెలుసుకున్నారు. ఈ పరిశోధన హెచ్‌ఐవికి వ్యతిరేకంగా యాంటీ రెట్రో వైరల్ వైద్య చికిత్సను అభివృద్ధి చేయడానికి దోహదపడుతుందని చెబుతున్నారు. ప్రస్తుతం వాడుకలో ఉన్న యాంటీ రెట్రొవైరల్ థెరపీ వైరస్‌ను అణచివేయగలుగుతున్నా అది గుప్తంగా ఉండేటట్టు చేస్తోంది.
అంతేకాకుండా రోగులు తగిన ఔషధాలు వాడుతున్నా చాలా కేసుల్లో ప్రస్తుత థెరపీ అంతగా పనిచేయడం లేదు. దుష్ఫ్రభావాలు కూడా దాపురిస్తున్నాయి. విషపూరితమైన కణాలు పేరుకుపోవడం, ఆక్సీకరణ ఒత్తిడికి దారి తీయడం జరుగుతుంది. కణాలకు శక్తి కేంద్రాలైన మైటోకాండ్రియా పనిచేయడం మానేస్తుంది. ఈ దుష్ప్రభావాల ఫలితంగా వాపు మంట ఏర్పడి అవయవాలు దెబ్బతింటాయి. ఈ నేపథ్యంలో మైక్రోబయోలజీ అండ్ సెల్‌బయోలజీ (ఎంసిబి) విభాగం , ఇండియన్ ఇనిస్టిట్యూట్ ఆఫ్ సైన్స్ (ఐఐఎస్‌సి) కి చెందిన సెంటర్ ఫర్ ఇన్‌ఫెక్షియస్ డిసీజ్ రీసెర్చి (సిఐడిఆర్) పరిశోధకులు బెంగళూరు మెడికల్ కాలేజీ అండ్ రీసెర్చి ఇనిస్టిట్యూట్ (బిఎంసిఆర్‌ఐ) పరిశోధకులతో సమన్వయమై సల్ఫర్‌డైయాక్సైడ్ ప్రభావంపై ఇదివరకు జరిగిన పరిశోధనలను కొన సాగించారు.
2015లో ఎంసిబి/సిఐడిఆర్ కు చెందిన అసోసియేట్ ప్రొఫెసర్ అమిత్ సింగ్ తన ప్రయోగశాలలో హెచ్‌ఐవి సోకిన కణాల్లో ఆక్సీకరణ ఒత్తిడిని లెక్కించ గలిగే సాధనాన్ని తయారు చేయగలిగారు. ఆ ప్రయత్నంలో ఎన్‌ఎసిటైల్‌సిస్టైన్ అనే రసాయన మూలకం నిగూఢంగా వైరస్ సంక్రమించే కణాల నుంచి హెచ్‌ఐవి పునః క్రియాశీలతను అణచివేయగలిగిందని తెలుసుకున్నారు. హైడ్రొజన్ సల్ఫైడ్ అణువులను ఎన్‌ఎసిటైల్‌సిస్టైన్ విడుదల చేయడం వల్లనే ఇది సాధ్యమైందని రూఢి అయింది.