రైతులకు కేంద్రం శుభవార్త

న్యూఢిల్లీ : 2023-24 ఖరీఫ్ సీజన్‌కు సంబంధించి పలు రకాల పంటల కనీస మద్దతు ధరను కేంద్రం పెంచింది. ప్రధాని నరేంద్రమోడీ అధ్యక్షతన బుధవారం జరిగిన కేంద్ర కేబినెట్ సమావేశం ఈమేరకు ఆమోదం తెలియజేసింది. ఈ సమావేశంలో తీసుకున్న అనే క నిర్ణయాలను కేంద్ర మంత్రి పీయూష్ గోయల్ మీడియాకు తెలియజేశారు. క్వింటాల్ సాధారణ వరికి మద్దతు ధరను రూ.143 చొప్పున పెంచినట్టు తెలిపారు. దీంతో క్వింటాల్ సాధారణ వరిరకం ధర రూ. 2183 కి చేరింది. అలాగే గ్రేడ్ ఎ వరికి రూ. 163 పెంచడంతో క్వింటాల్ ధర రూ.2203కి పెరిగింది. గత ఏడాదితో పోలిస్తే ఈ ఏడాది కనీస మద్దతు ధర అధికంగా పెంచినట్టు పీయూష్ గోయల్ తెలిపారు. రిటైల్ ద్రవ్యోల్బణం తగ్గుముఖం పట్టిన తరుణంలో ఎంఎస్‌పి పెంచడం వల్ల రైతులకు ప్రయోజనం కలుగుతుందని మంత్రి తెలిపారు.

పెసర పంటకు అత్యధికంగా మద్దతు ధర
పెసర పంటకు అత్యధికంగా కనీస మద్దతు ధరను ఈసారి పెంచారు. గత ఏడాది క్వింటాల్ ధర రూ.7755 ఉండగా, ఈసారి 10.4 శాతం పెంచడంతో పెసరకు మద్దతు ధర రూ.8558 కి పెరిగింది. అలాగే హైబ్రిడ్ జొన్న క్వింటాల్ రూ. 3180, జొన్న (మాల్దండి ) , రూ. 3225, రాగి రూ. 3846, సజ్జలు రూ. 2500, మొక్కజొన్న రూ. 2090, పొద్దుతిరుగుడు ( విత్తనాలు )రూ. 6760. వేరుశెనగ రూ. 6377. సొయాబీన్ (పసుపు పచ్చ)రూ. 4600, పత్తి (మధ్యస్థాయి పింజ) రూ. 6620, పత్తి (పొడవు పింజ) రూ. 7020 చొప్పున ఈ సీజన్‌లో ఇవ్వనున్నట్టు కేంద్రం తెలియజేసింది. ఇదిలా ఉండగా హుడా సిటీ సెంటర్ నుంచి గురుగ్రామ్ లోని సైబర్ సిటీకి మెట్రో అనుసంధానానికి కేంద్ర కేబినెట్ ఆమోదం తెలిపింది. 27 స్టేషన్ల మీదుగా 28.50 కిమీ మేర ఈ నిర్మాణం చేపట్టనున్నారు. మంజూరైన తేదీ నుంచి నాలుగేళ్లలో నిర్మాణం పూర్తి చేస్తారు. ఈ ప్రాజెక్టు మొత్తం వ్యయం రూ. 5452 కోట్లు.