మీ సోపతి ఎట్ల కుదిరింది?

హైదరాబాద్: తెలంగాణ అసెంబ్లీలో ఆసక్తికర సన్నివేశాలు చోటు చేసుకున్నాయి. బిజెపి ఎమ్మెల్యే ఈటల రాజేందర్, కాంగ్రెస్ ఎమ్మెల్యే జగ్గారెడ్డితో రాష్ట్ర ఐటీ, పరిశ్రమల శాఖ మంత్రి కెటిఆర్ సరదాగా ముచ్చటించారు. శాసనసభలో మంత్రి కెటిఆర్, ఈటల రాజేందర్ సీటు వద్దకు వెళ్లి ఆప్యాయంగా పలకరించారు. అనంతరం ఈటలను మంత్రి కెటిఆర్ ఆలింగనం చేసుకున్నారు. ఈ సందర్భంగా కెటిఆర్, ఈటల సుమారు పది నిమిషాల పాటు ముచ్చటించారు.
మాది ఒకే కంచం, ఒకే మంచం
ఇక అసెంబ్లీ వెలుపల కెటిఆర్, ఎమ్మెల్యే జగ్గారెడ్డి మధ్య సరదా చర్చ జరిగింది. టీ షర్ట్‌తోఓ ఉన్న జగ్గారెడ్డిని చూసి పిల్లలతో కలిసి తిరిగితే ఎట్లన్నా? అని కెటిఆర్ అనగా, టీషర్ట్ వేసుకుంటే పిల్లలవుతారా? అని జగ్గారెడ్డి అడిగారు. అప్పటికే జగ్గారెడ్డితో టిఎన్జీఓ రాష్ట్ర అధ్యక్షుడు మామిళ్ల రాజేందర్ కలిసి ఉండగా, మీ ఇద్దరికి ఎక్కడ దోస్తాన్ కుదిరిందని కెటిఆర్ అడగ్గా, మాది ఒకే కంచం, ఒకే మంచమని మామిళ్ల రాజేందర్ జవాబిచ్చారు. అయితే జగ్గారెడ్డిని గెలిపిస్తావా? అని కెటిఆర్ ప్రశ్నించగా, సంగారెడ్డిలో జగ్గారెడ్డిని గెలిపిస్తా, మన దగ్గరకు పట్టుకొస్తానని రాజేందర్ సరదాగా వ్యాఖ్యానించారు.