మంగళగిరి: పరువు నష్టం వివాదంలో పోసాని కృష్ణమురళిపై నారా లోకేష్ సంచలన వ్యాఖ్యలు చేశారు. లోకేష్ తప్పుడు ఆరోపణలు చేసే ప్రత్యర్థులపై పరువునష్టం కేసులు పెట్టే పనిలో పడ్డారు. ఆయన ఇప్పటికే ఓ మీడియా సంస్థపై రెండు పరువు నష్టం కేసులు, ఏపీ స్కిల్ డెవలప్‌మెంట్ కార్పొరేషన్ చైర్మన్ అజయ్ రెడ్డిపై మరో పరువునష్టం కేసులు వేశారు. ఈసారి జగన్ చేత ఆంధ్రప్రదేశ్ రాష్ట్ర చలనచిత్ర, టీవీ, థియేటర్ డెవలప్‌మెంట్ కార్పొరేషన్ ఛైర్మన్‌గా నియమించబడిన నటుడు పోసాని కృష్ణ మురళిపై, తాను జనసేన లీగల్ సెల్‌లో భాగమని చెప్పుకుంటున్న సింగలూరి శాంతి ప్రసాద్‌పై కేసులు పెట్టారు.
అమరావతి ఇన్‌సైడర్‌ ట్రేడింగ్‌లో భాగంగానే లోకేష్ కంతేరులో 14 ఎకరాల భూమిని కొనుగోలు చేశారని యూట్యూబ్‌ ఛానెల్‌కు ఇచ్చిన ఇంటర్వ్యూలో పోసాని ఆరోపించారు. కంతేరులో తనకు కనీసం అరసెంటు భూమి కూడా లేదని, క్షమాపణ చెప్పాలని లోకేష్‌కు నోటీసులు పంపారు. రెండు సార్లు నోటీసులు పంపినా పోసాని స్పందించలేదు. దీంతో లోకేష్ కోర్టును ఆశ్రయించారు. ఔట్‌సోర్సింగ్‌ కాంట్రాక్టుల్లో ఉద్యోగాలు పొందిన ఉద్యోగుల జీతాల్లో లోకేష్ కోత పెట్టారని తన స్నేహితుడు తనతో చెప్పారని శాంతి ప్రసాద్ యూట్యూబ్‌కు ఇచ్చిన ఇంటర్వ్యూలో ఆరోపించారు. నోటీసులపై శాంతి ప్రసాద్ స్పందించలేదు. నారా లోకేష్ ఈ కేసులో మంగళగిరి మున్సిఫ్ కోర్టుకు వెళ్లారు. దీంతో శుక్రవారం లోకేశ్ పాదయాత్రకు విరామం ఇవ్వనున్నారు.