రూ. 4 వేల కోట్ల మేర అక్రమాలు జరిగినట్లు గుర్తించిన ఇడి.. చార్జిషీట్ నమోదు
వస్తువుల విక్రయం ముసుగులో మనీ సర్కులేషన్
మన తెలంగాణ/హైదరాబాద్ : లక్షలాది మందిని తమ సభ్యులుగా చేర్చుకోవడం ద్వారా విపరీతంగా లాభదాయకమైన కమీషన్లను అందించడం ద్వారా భారతదేశంలో మల్టీ-లెవల్ మార్కెటింగ్‌కు పాల్పడ్డ ప్రముఖ డైరెక్ట్ మార్కెటింగ్ కంపెనీ ఆమ్వే ఇండియాపై సోమవారం ఎన్‌ఫోర్స్‌మెంట్ డైరెక్టరేట్ (ఇడి) ఛార్జ్ షీట్ దాఖలు చేసింది. పెద్ద సంఖ్యలో సబ్‌స్క్రైబర్‌లను మోసం చేయడం ద్వారా ఆమ్వే ద్వారా రూ.4,000 కోట్ల విలువైన నేరాల ఆదాయాన్ని గుర్తించినట్లు ఏజెన్సీ వెల్లడించింది. దేశవ్యాప్తంగా 5.5 లక్షల మంది డైరెక్ట్ సెల్లర్లను కలిగి ఉన్న ఆమ్వే ఇండియా ఎంటర్‌ప్రైజ్ ప్రైవేట్ లిమిటెడ్‌పై తెలంగాణ పోలీసులు దాఖలు చేసిన వివిధ ప్రథమ సమాచార నివేదిక(ఎఫ్‌ఐఆర్)ల ఆధారంగా 2011లో మనీలాండరింగ్ విచారణ ప్రారంభమైంది.
వస్తువుల విక్రయం ముసుగులో ఆమ్వే అక్రమ ’మనీ సర్క్యులేషన్ స్కీమ్’ను ప్రోత్సహిస్తోందని, కొత్త సభ్యులను సాధారణ నమోదు చేయడం ద్వారా చాలా ఎక్కువ కమీషన్లు/ఇన్సెంటివ్‌లు, ఈ కమీషన్లు/ప్రోత్సాహకాలను క్లెయిమ్ చేయడం ద్వారా సామాన్య ప్రజలను మోసం చేస్తోందని ఆరోపించారు. ఇది శాశ్వతంగా కొనసాగుతుంది. ఆమ్వే డైరెక్ట్ సెల్లింగ్ ముసుగులో పిరమిడ్ స్కీమ్‌ను ప్రోత్సహిస్తున్నట్లు ఇడి విచారణలో వెల్లడైంది. ‘వస్తువులను నేరుగా అంతిమ వినియోగదారునికి విక్రయించే బదులు, ఆమ్వే సభ్యుల బహుళ-స్థాయి మార్కెటింగ్ పథకాన్ని ప్రవేశపెట్టింది. పంపిణీదారుల పేరుతో అనేక మధ్యవర్తులను ప్రవేశపెట్టింది. ఈ పథకం ఉత్పత్తుల విక్రయంపై దృష్టి పెట్టదు కానీ ప్రధానంగా సభ్యుల నమోదుపై ఆధారపడి ఉంటుంది. ఒక కొత్త వ్యక్తి తనను కంపెనీకి రిఫర్ చేసిన వారి ద్వారా డబ్బు చెల్లించాలని ఒప్పించిన తర్వాత, అతను/ఆమె ప్రతినిధి అవుతాడు, కమీషన్ పొందాలంటే, అతను/ఆమె కొత్త సభ్యులను నమోదు చేసుకోవాలి, వ్యక్తుల సంఖ్య పెరుగుతున్న కొద్దీ, వారు పైన ఎక్కువ కమీషన్, విలాసవంతమైన పర్యటనల వంటి మరిన్ని ప్రోత్సాహకాలను పొందండంటూ ఎంఎల్‌ఎంకు సంస్థ ద్వారాలు తెరిచిందని ఒక ప్రకటనలో వెల్లడించింది.