మహిళల ఆసియా చాంపియన్స్ ట్రోఫీలో భారత మహిళల హాకీ జట్టు అద్భుతాలు చేస్తోంది. వరుస విజయాలతో సెమీస్ బెర్త్‌ను ఖాయం చేసుకుంది. ఇప్పటికే నాలుగు విజయాలు సాధించిన మహిళా జట్టు ఆదివారం జరిగిన మ్యాచ్‌లో జపాన్‌ను చిత్తుగా ఓడించి, సెమీస్‌లో అడుగుపెట్టింది. హోరాహోరీగా సాగిన గ్రూప్ దశ ఆఖరి మ్యాచ్‌లో 3-0తో జపాన్‌ను ఓడించి గ్రూప్‌లో అగ్రస్థానంలో నిలిచింది. తద్వారా భారత జట్టు సెమీఫైనల్‌కు దూసుకెళ్లింది. ఫైనల్ బెర్తు కోసం జరిగే పోరులో మరోసారి జపాన్‌తోనే తలపడనుంది. బిహార్‌లోని రాజ్‌గిరి హాకీ స్టేడియంలో జరిగిన ఈ మ్యాచ్‌లో టీమిండియా అదినుంచే జపాన్‌పై ఆదిపత్యం చెలాయించింది.
తొలి అర్ధ భాగంలో జపాన్ గోల్‌పోస్ట్‌పై అనేకమార్లు ప్రయత్నం చేసినా ఫలితం దక్కలేదు. జపాన్ డిఫెండర్లు సమర్దంగా అడ్డుపడడంతో మొదటి గోల్ కోసం అరగంట ఆగాల్సి వచ్చింది. ఇక 37వ నిమిషంలో నవ్‌నీత్ కౌర్ బ్యాక్ హ్యాండ్ షాట్ ద్వారా గోల్ సాధించింది. ఆ తర్వాత ఫోర్త్ క్వార్టర్స్‌లో జపాన్ గోల్ కీపర్‌ను బోల్తా కొట్టిస్తూ దీపిక డ్రాగ్ ఫ్లిక్‌తో జట్టుకు రెండో గోల్ అందించింది. ఈ క్రమంలో ఇరు జట్ల మధ్య రసవత్తమైన పోటీ కనిపించింది. జపాన్ మహిళలు గోల్ కోసం శ్రమించారు. కానీ, ఆలోపే భారత అమ్మాయిలు మరో గోల్ సాధించడంతో, 3-0తో భారత్ గెలుపొంది. 15 పాయింట్లతో పట్టికలో మొదటి స్థానంలో నిలిచింది. వరుసగా ఐదు విజయాలతో సెమీఫైనల్లో అడుగుపెట్టింది. దీంతో టీమిండియాకు ప్రశంసలు వెల్లువెత్తుతున్నాయి.