పంటలకు కనీస మద్దతు ధరపై రైతుల రైల్‌రోకో

పంటలకు కనీస మద్దతు ధర ఇవ్వాలని డిమాండ్ చేస్తూ రైతులు ఆందోళన సాగిస్తున్న సంగతి తెలిసిందే. ఈ నేపథ్యంలో పంజాబీ రైతులు బుధవారం మధ్యాహ్నం 12 నుంచి 3 గంటల వరకు రైలు రోకో చేపట్టారు. రాష్ట్రం లోని అనేక మార్గాల్లో మూడు గంటల పాటు రైల్‌రోకో నిర్వహించారు. సంయుక్త కిసాన్ మోర్చాతోపాటు కిసాన్ మజ్దూర్ మోర్చాలు రైల్‌రోకో నినాదాన్ని ఇచ్చాయి. రైల్వేట్రాకులపై రైతులు బైఠాయించినట్టు కిసాన్ మజ్దూర్ మోర్చా నేత సర్వాన్ సింగ్ పందేర్ తెలిపారు. ఢిల్లీ మార్చ్‌ను అడ్డుకోవడంతో ఫిబ్రవరి 13 నుంచి శంభూ,

కన్నౌరి బోర్డర్ల మధ్య రైతులు ధర్నా చేపడుతున్నవిషయం తెలిసిందే. కన్నౌరి బోర్డర్ పాయింట్ వద్ద పంజాబీ రైతు జగ్జీత్ సింగ్ దల్లేవాల్ ఆమరణ దీక్ష చేపడుతున్నారు. పంటలకు ఎంఎస్పీ ఇవ్వాలని కేంద్రాన్నిరైతులు డిమాండ్ చేస్తున్నారు. 101 మంది రైతులు డిసెంబర్ 6, 8,14 వ తేదీల్లో ఢిల్లీలో ప్రవేశించేందుకు ప్రయత్నించారు. కానీ ఆ ప్రయత్నాలను హర్యానా, భద్రతా దళాలు అడ్డుకున్నాయి. పంటలకు ఎంఎస్పీతోపాటు రుణమాఫీ, పెన్షన్, విద్యుత్తు ధరల తగ్గింపు , పోలీస్ కేసుల ఎత్తివేత వంటి డిమాండ్లపై రైతులు పోరాడుతున్నారు.