జగద్గిరిగుట్టలో 13 కిలోల గంజాయి పట్టివేత

హైదరాబాద్: మేడ్చల్ మల్కాజ్ గిరి జిల్లా కుత్బుల్లాపూర్‌ మండలంలో పెద్ద ఎత్తున గంజాయి చాక్లెట్ల దందాను సైబరాబాద్ పోలీసులు గుట్టు రట్టు చేశారు. జగద్గిరిగుట్టలో 13 కేజీల గంజాయి చాకెట్లను పోలీసులు పట్టుకున్నారు. విశ్వసనీయ సమాచారం మేరకు పోలీసులు, ఎస్ఒటి బాలానగర్ టీమ్ సంయుక్తంగా రింగ్ బస్తీలో కిరాణా దుకాణంపై దాడి చేసి 13 కేజీల గంజాయి చాక్లెట్లను పట్టుకున్నారు. దుకాణం యజమాని బీహార్ కు చెందిన సునీల్ కుమార్ ఝా ను అదుపులోకి తీసుకుని 61 ప్యాకెట్లలో ఉన్న (13 కేజీల) 2400 గంజాయి చాక్లెట్లను స్వాదీనం చేసుకున్నారు. గంజాయి చాక్లెట్ల ను బీహార్ నుంచి తీసుకొచ్చి హైదరాబాద్ లో సునీల్ అమ్ముతున్నాడు. ఒక్కోచాక్లెట్ రూ.40 లకు వలస కార్మికులకు అమ్ముతున్నట్లు విచారణలో తేలింది.  గంజాయి మొత్తం ధర రూ. 97,600 ఉంటుందని పోలీసులు వెల్లడించారు. జగద్గిరిగుట్ట పోలీసులు కేసు నమోదు చేసి దర్యాప్తు చేస్తున్నారు. పట్టుబడ్డ సునీల్ కుమార్ ఝా 20 సంవత్సరాల క్రితం కూలీ పనుల కోసం బీహార్ నుండి హైదరాబాద్ కు వలస వచ్చాడు. గత కొన్ని సంవత్సరాల  నుంచి కిరాణా షాప్‌ను నిర్వహిస్తున్నాడని స్థానికులు తెలిపారు.