పవర్ స్టార్ పవన్ కళ్యాణ్ నటిస్తున్న లేటెస్ట్ మూవీ ‘హరిహర వీరమల్లు’ కోసం ప్రేక్షకులు ఎంత ఆసక్తిగా ఎదురుచూస్తున్నారో అందరికీ తెలిసిందే. ఈ సినిమాను దర్శకుడు జ్యోతికృష్ణ డైరెక్ట్ చేస్తుండగా పీరియాడిక్ యాక్షన్ ఎంటర్‌టైనర్‌గా ఈ సినిమా ప్రేక్షకులను ఆకట్టుకునేందుకు సిద్ధమవుతోంది. అయితే ప్రస్తుతం ఈ సినిమా చివరి షెడ్యూల్ షూటింగ్ జరుపుకుంటోంది. ఇక ఈ షెడ్యూల్‌తో ఈ భారీ చిత్రానికి సంబంధించిన షూటింగ్ ముగుస్తుందని మేకర్స్ తెలిపారు.
ఈ సినిమాలో బాలీవుడ్ నటుడు బాబీ డియోల్ విలన్ పాత్రలో నటిస్తుండగా అందాల భామ నిధి అగర్వాల్ హీరోయిన్‌గా నటిస్తోంది. ఈ సినిమాకు ఎంఎం.కీరవాణి సంగీతం అందిస్తున్నారు. ఈ చిత్రాన్ని మార్చి 28న గ్రాండ్‌గా రిలీజ్ చేసేందుకు మేకర్స్ సిద్ధమవుతున్నారు. అయితే ఈ చిత్రం నుంచి ఫస్ట్ సింగిల్ ఎప్పుడెప్పుడు వస్తుందా అని అభిమానులు ఎంతో ఆసక్తిగా ఎదురుచూస్తున్నారు. పవన్ కళ్యాణ్ స్వయంగా పాడిన ఈ సాంగ్ కొత్త ఏడాది ఆరంభంలో రానుందని తెలిసింది. ఈ స్పెషల్ సాంగ్‌ని జనవరి 1న రాత్రి 12 గంటలకి మేకర్స్ రిలీజ్ చేయనున్నారట. మరి దీనిపై అధికారిక క్లారిటీ రావాల్సి ఉంది. ఇక ఈ చిత్రానికి ఏఎం రత్నం నిర్మాతగా వ్యవహరిస్తున్నారు.