ప్రముఖ మరాఠీ నటి కారొకటి మెట్రో ప్రాజెక్టు పనులు చేస్తున్న కార్మికులపై దూసుకుపోవడంతో ఒకరు చనిపోయారు. మరొకరికి తీవ్ర గాయాలయ్యాయి. ఆ నటి, డ్రైవర్ కారులో షూటింగ్ ముగించుకుని తిరిగొస్తుండగా ముంబైలోని కండివ్లిలో ఈ దుర్ఘటన జరిగింది. పోలీసుల కథనం ప్రకారం నటి ఊర్మిళ కొఠారే ఉరఫ్ ఊర్మిళ కనేత్కర్ శుక్రవారం రాత్రి షూటింగ్ ముగించుకుని తిరిగొస్తుండగా ఈ ప్రమాదం జరిగింది. పోయిసర్ మెట్రో స్టేషన్ వద్ద మెట్రో ప్రాజెక్ట్ పనులు చేస్తున్న ఇద్దరు కార్మికులపై కారు దూసుకెళ్లింది. అత్యంత స్పీడుగా నడిపిన కారు డ్రైవర్ అదుపు తప్పడంతో ప్రమాదం చోటుచేసుకుంది.
కాగా ఈ ప్రమాదంలో ఒక కార్మికుడు అక్కడికక్కడే చనిపోయాడు, మరో కార్మికుడు ఆసుపత్రిలో చికిత్స పొందుతున్నారు. కారు డ్రయివర్‌కి కూడా తీవ్రగాయాలయ్యాయి. నటికి మాత్రం స్వల్ప గాయాలయ్యాయి. హ్యూందాయ్ వెర్నా కారును డ్రయివర్ అత్యంత వేగంగా నడపడం వల్ల ఈ ప్రమాదం జరిగిందని అభిజ్ఞవర్గాల బోగట్టా. ఎయిర్‌బ్యాగ్ తెరుచుకోవడం వల్ల నటికి ప్రాణాపాయం తప్పింది. ఇదిలావుండగా నిర్లక్షంగా, అత్యంత వేగంగా కారు నడిపి, ఓ వ్యక్తి మరణానికి కారణమైన నేరారోపణ సెక్షన్ల కింద డ్రయివర్‌పై కేసు నమోదయింది.