పక్కా ప్లాన్‌తో ఒక్కడే చేశాడు

మీర్‌పేట్ హత్యకేసులో భర్త
గురుమూర్తి అరెస్టు
చంపి నాలుగు భాగాలుగా
కట్ చేశాడు నిందితుడికి
పశ్చాత్తాపం లేదు : రాచకొండ
కమిషనర్ సుధీర్‌బాబు

మీర్‌పేట్ హత్యకేసు మమ్మల్నే
నివ్వెరపోయేలా చేసింది :
రాచకొండ కమిషనర్ సుధీర్‌బాబు
మన తెలంగాణ/ఎల్బీనగర్ : సంచలనం సృష్టించిన మీర్‌పేట్ హత్యకేసు నిందితుడు గురుమూర్తిని పోలీసులు అరెస్ట్ చేశారు. గురుమూర్తి భార్య వెంకటమాధవిని కిరాతకంగా హత్యచేసి, మృతదేహన్ని ముక్కలుగా చేసి కుక్కర్‌లో ఉడికించిన సంగతి తెలిసిందే. ఎముకలను బూడిద చేసి చెరువులో పడేశాడు. తరువాత ఏమి తెలియనట్లు మాధవి తల్లితో కలసి గురుమూర్తి జనవరి 16 న మీర్‌పేట్ ఠాణాలో ఫిర్యాదు చేసిన విషయం విదితమే. ఎల్బీనగర్ క్యాంప్ కార్యాలయంలో రాచకొండ కమిషనర్ సుధీర్‌బాబు ఇతర పోలీసు అధికారులతో కలసి మంగళవారం ఏర్పాటు చేసిన మీడియా సమావేశంలో వివరాలు వెల్లడించారు. వెంకటమాధవి హత్యకేసు దర్యాప్తులో ఆధారాలు సేకరించేందుకు సిబ్బంది తీవ్రంగా శ్రమించాల్సి వచ్చిందన్నారు. ఒక మనిషిని ఇంత క్రూరంగా చంపుతరా? అని మేమే నివ్వేరపోయామన్నారు. భార్యను ఇంత దారుణంగా హత్య చేసినా నిందితుడిలో పశ్చాతాపం లేదని, క్షణికావేశంలో జరిగిన హత్యకాదని , పథకమే ప్రకారమే హత్య చేశాడ న్నారు.

‘సంక్రాతి పండుగకు మాధవి, గురుమూర్తి తమ పిల్లల్ని తీసుకుని బంధువుల ఇంటికి వెళ్లారు. 15న పిల్లల్ని బంధువుల ఇంటి వద్ద వదిలేసి రాత్రి 10.41 నిమిషాలకు ఇద్దరు ఇంటికి చేరుకున్నట్లు సీసీ టీవి పుటేజీలో గుర్తించాం. 16న ఉదయం 8 గంటలకు ఆమెతో అకారణంగా గొడవ పెట్టుకుని ఘర్షణకు దిగాడు. మాధవి తలను గోడకేసి కొట్టి కింది పడిపోయిన తరువాత గొంతు నులిమి హతమార్చాడు. ఇంట్లో ఉన్న కత్తితో కాళ్లు, చేతులు, శరీరం, తల నాలుగు భాగాలుగా కట్ చేశాడు. ఉదయం 10 గంటల నుంచి సాయంత్రం 6 గంటల వరకు మృతదేహన్ని ముక్క ముక్కలుగా చేశాడు. వాటర్ హీటర్‌తో నీళ్లు మరిగించి శరీర భాగాలను ఉడకబెట్టాడు. వాటిని పొయ్యిపై పెట్టి కాల్చి రోకలి బండతో ఆ భాగాలను దంచి పొడి చేశాడు. ఆ పొడిని ప్లాస్టిక్ బకెట్‌లో పెట్టుకుని జిల్లెలగూడ చెరువులో పోశాడు. ఇంట్లో మొత్తం అనవాళ్లు లేకుండా చేసి బంధువుల ఇంటికి వెళ్లి పిల్లల్ని తీసుకుచ్చాడు.

పిల్లలు అమ్మ ఏది అని అడిగితే ఎక్కడికో వెళ్లిందని చెప్పాడు. పిల్లలు ఇక్కడ ఉంటే సాక్షాలు దోరుకుతాయనే అనుమానంతో వారిని బంధువుల ఇంటి దగ్గర వదిలివచ్చాడు. భార్యను చంపిన గురుమూర్తిలో కొంచమైనా పశ్చాతాపం లేదు. హత్య కేసులో నిందితుడు వాడిన స్టవ్, కత్తి, రోలర్ స్టోన్, బకెట్, వాటర్ హీటర్, రూమ్ ఫ్రెషనర్, యాసిడ్ బాటిల్, డోర్ మ్యాట్, స్క్రాప్ బకెట్, సర్ప్ ప్యాకెట్, బ్లాక్ కలర్ షర్ట్, మృతిరాలి డ్రెస్, రెండు చరవాణిలతో సహా మొత్తం 16 వస్తువులను సీజ్ చేశారు.