సౌదీలో రోడ్డు ప్రమాదం.. 9 మంది భారతీయులు దుర్మరణం

పశ్చిమ సౌదీ అరేబియాలో జిజాన్ సమీపాన ఒక రోడ్డు ప్రమాదంలో తొమ్మిది మంది భారత జాతీయులు దుర్మరణం చెందారని జెడ్డాలోని భారత దౌత్య కార్యాలయం బుధవారం వెల్లడించింది. తాము పూర్తి సహాయం అందజేస్తున్నామని, అధికారులు, కుటుంబాలను సంప్రదిస్తున్నామని కార్యాలయం తెలియజేసింది. ‘సౌదీ అరేబియా రాజ్యం పశ్చిమ ప్రాంతంలోని జిజాన్ సమీపాన ఒక రోడ్డు ప్రమాదంలో తొమ్మిది మంది భారత జాతీయుల దుర్మరణానికి మేము ఎంతో విచారిస్తున్నాం’ అని భారతీయ కాన్సులేట్ ‘ఎక్స్’ పోస్ట్‌లో పేర్కొన్నది.

‘బాధిత కుటుంబాలకు మా ప్రగాఢ సంతాపం. జెడ్డాలోని భారత కాన్సులేట్ జనరల్ పూర్తి సహాయం అందజేస్తున్నారు. అధికారులు, కుటుంబాలను సంప్రదిస్తున్నారు. క్షతగాత్రులు త్వరగా కోలుకోవాలని కూడా ఆకాంక్షిస్తున్నాం. మరిన్ని ప్రశ్నల కోసం ప్రత్యేక హెల్ప్‌లైన్ ఏర్పాటు చేయడమైంది’ అని కాన్సులేట్ తెలిపింది. ప్రమాదం, ప్రాణ నష్టం గురించి తెలిసి ‘విచారిస్తున్నాన’ని విదేశాంగ శాఖ మంత్రి ఎస్ జైశంకర్ తెలిపారు.